PITAS 13 - Hakcipta - Biatah Bidayuh

¹ Anak adi bijak dingah nakit kan sama-i nyara ngajar ayŭh, pak anak adi sambuh abah ngaku adŭp-i sarah.

² Daya adi kana re dog ngupah amai pinganang kana ngara, pak ngara adi pinipu inŭh sikirau pinyiganas.

³ Nakit piruah pinganang mu ka jaga adŭp mu. Daya adi dŭh nakit minyu re bada adŭp-i binasa.

⁴ Munki masam daya adi tibanga gruwŭn an biyŭn kayuh, ayŭh dŭh re dapŭd-i. Daya adi gagah nyiraja re dapŭd barang masam kayuh adi raan-i.

⁵ Daya adi jujur tiru di pinganang kadong, pak pinganang daya ginaka nggen mangŭh.

⁶ Pinŭnggŭn grindung daya adi dŭh sarah; udip ginaka inŭh pinyirabu daya adi bidosa.

⁷ Agi daya ngakar mun daya kaya, pak dŭh biyŭn ani ani. Agi adi ngakar mun daya sirata, pak biyŭn bagŭ buat-rata.

⁸ Daya kaya pakai duit-i ngga nyiramat asŭng-i, pak daya sirata dŭhsah ndai simŭnŭ.

⁹ Daya tŭnggŭn inŭh keya ka jawa adi daras nyekar; daya ginaka keya ka prita adi bŭrŭp bŭrŭp re pura.

¹⁰ Pinyigambung kaŭs-i nimbur pinyusah. Bijak dŭ nŭŭh mite pinyitayan.

¹¹ Pinyikaya adi udah nŭŭh dapŭd, rikas abo; pak buat-rata adi nisŭ nisŭ nŭŭh dapŭd re dŭ dŭ bitambah.

¹² Kan pingarap asur, atin asur gŭh; pak pinyiraan adi jadi bitŭtŭk bada atin pawŭn.

¹³ Kambŭi kuu abah dingah ajar Tapa, kuu re binasa; tunda-i ka kuu re siramat.

¹⁴ Ajar daya adi bijak inŭh atak udip; ajar anŭ re pirupas kuu kan kuu dog har.

¹⁵ Daya adi bijak dog stabi, pak daya adi dŭh bisa dog sabah inŭh kadŭg aran nuju pinyirusag.

¹⁶ Daya bijak ari bipikir diŭ so-i ndai kayuh, pak daya adi budo piranggah budo bawa adŭp-i.

¹⁷ Pinyisung adi dŭh bisa dog sabah taban pinyusah, pak daya adi bisa dog sabah taban damai.

¹⁸ Daya adi abah birajar re sirata ka dog pimangŭh. Daya adi an dog ngajar dog stabi.

¹⁹ Mbŭh raru kana kambŭi tungang dapŭd kayuh adi nŭŭh raan! Daya adi budo abah tagan pingandai arap.

²⁰ Biayo ngga daya adi bijak ka kuu re jadi bijak. Kambŭi kuu bijerā ngga daya adi budo, kuu re rusak.

²¹ Pinyusah tunda daya bidosa di barang ka yŭn-i, pak daya tŭnggŭn re dog ngupah ngga kayuh adi kana.

²² Daya kana re biyŭn buat-rata an-i tingge di bara anak-i, pak buat-rata daya bidosa re di ka tangan daya tŭnggŭn.

²³ Tana tibŭn bisa piruah bagŭ pinguman yŭn daya sirata, pak daya adi dŭh batur pikir-i kinarang ngara biteya dieh.

²⁴ Kambŭi kuu dŭh ngukum anak mu, kuu dŭh rindu ayŭh. Kambŭi kuu rindu ayŭh, kuu re nyara ngajar ayŭh.

²⁵ Daya tŭnggŭn biyŭn sukup pinguman, pak daya ginaka ari sibŭrŭk.