PITAS 11 - Hakcipta - Biatah Bidayuh

¹ TUHAN tiru di daya adi nipu pakai timbang adi sarah. Ayŭh rindu daya adi pakai timbang adi batur.

² Daya adi sambuh re rikas dog pimangŭh. Daya adi pirapat adŭp-i inŭh bijak.

³ Kambŭi kuu kana, kuu mbŭh dog nyiruton atin jujur. Daya adi dŭh bisa dog sabah inŭh rusak bada atin ngara adi dŭh jujur.

⁴ Pinyikaya dŭh biyŭn guna-i di andu kuu nura pinyikabŭs, pak atin jujur dapŭd nyiramat kuu.

⁵ Udip daya adi jujur sanang sabab atin jujur-i, pak daya ginaka re pirabu adŭp-i.

⁶ Pinŭnggŭn nyiramat daya adi jujur, pak daya adi dŭh dapŭd dog sabah mbŭh dog mirakap udip tama-i.

⁷ Kan daya ginaka kabŭs, pingarap ngara kabŭs ngga ngara. Pinyabah di pinyikaya jadi au-tarun.

⁸ Daya tŭnggŭn dog grindung so pinyusah; pak daya ginaka dog nyatŭk pinyusah.

⁹ Pinganang daya adi arap pirusak kuu, pak pinyibijak daya tŭnggŭn dapŭd nyiramat kuu.

¹⁰ Kupo pawŭn kan daya adi jujur mujur darŭm pimudip, ka diginŭ agi sirais gaŭn kan daya ginaka kabŭs.

¹¹ Kupo jadi bās kan daya tŭnggŭn nggen berkat-ngara; pak kupo rubuh bada pinganang daya adi ginaka.

¹² Ngamun daya inŭh pingandai budo. Kambŭi kuu bijak, kuu pirŭŭ adŭp mu.

¹³ Daya adi pingitong dŭh dapŭd dog sabah nyikŭn rusia, pak daya adi dapŭd dog sabah dapŭd nyikŭn rusia.

¹⁴ Bangsa re rabu kambŭi mating pinguru adi bijak, pak siramat kambŭi biyŭn bagŭ daya adi tukang pitayan.

¹⁵ Kambŭi kuu bijanji an bayar utang daya saruh, kuu re nyesar. Kana dŭ kuu dŭh ndai kayuh adi mun anŭ.

¹⁶ Daya adi kana buang biradat dog stabi daya, pak dayung adi dŭh biyŭn adat dog pimangŭh. Daya adi tibanga dŭh re biyŭn duit, pak daya adi bandar nyiraja re kaya.

¹⁷ Kuu ndai kana di adŭp mu kan kuu mandis. Kambŭi kuu gaok, kuu kandam adŭp mu.

¹⁸ Daya ginaka sibatur-i dŭh dapŭd ani ani, pak kambŭi kuu ndai kayuh adi batur, kuu tatu re dog ngupah.

¹⁹ Daya adi mbŭh natu adŭp-i an ndai kayuh batur re udip, pak daya adi bigŭtŭ an ndai arap re kabŭs.

²⁰ TUHAN tiru di daya adi arap atin-i, pak rindu daya adi ndai kayuh adi batur.

²¹ Daya adi arap manŭn re dog ukum, pak daya tŭnggŭn re siramat.

²² Dayung ramus adi budo inŭh keya ka sisin mas di tukuk ayo.

²³ Kayuh adi daya kana raan, ari pijadi kayuh adi kana; kan daya ginaka dapŭd kayuh adi ngara raan, sopŭrŭg daya baji.

²⁴ Agi daya adi barang ka mun-i pakai duit-i ka babŭ gŭh bitambah kaya. Adi bŭkŭn raru nakit, pak babŭ gŭh bitambah sirata.

²⁵ Daya adi dŭh bidagis re mujur. Daya adi gagā turung daya re dog turung gŭh.

²⁶ Daya mingungut di daya adi bitan gandom, kajŭn rega maad, pak ngara muji sianŭ adi jua-i.

²⁷ Kambŭi pinŭtŭn ngan kana, angān dog stabi, pak kambŭi angān jiroh pinyusah, anŭ inŭh re angān dapŭd.

²⁸ Ngara adi bisangan di pinyikaya re rabu mun dawŭn kayuh ruruh di tipuh jaya, pak daya tŭnggŭn re mujur mun dawŭn barŭm di tipuh paras.

²⁹ Ngara adi taban pinyusah di rawang-i re dapŭd au-tarun. Daya budo re ari jadi urun daya bijak.

³⁰ Pinŭnggŭn nggen udip, pak pinyiganas taban-i ngga bu.

³¹ Ngara adi kana dog ngupah di ong ati, jadi daya adi ginaka buang bidosa manŭn re dog ukum.