PINYIRUAH 5 - Hakcipta - Biatah Bidayuh

Moses ngga Aaron Bidapŭd ngga Raja Egypt

¹ Jadi Moses ngga Aaron di ka yŭn raja Egypt ka nang, “TUHAN adi Tapa Israel, nang, ‘Bada bara daya Ku ruah so Egypt, isa ngara bisa nyambah Aku di tarun tana-pajam.’ ”

² “Asi TUHAN anŭ?” raja siken. “Re ngga mani aku tunda pinganang-I ka bada daya Israel bu ruah so ti? Aku dŭh puan TUHAN anŭ; ka aku dŭh re bada daya Israel ruah so rais ati.”

³ Moses ngga Aaron nam, “Tapa daya Hebrew mbŭh pinandŭng adŭp-I di kieh. Turung bada kieh panu taruh andu ka tarun tana-pajam siŭn kieh bisa jugan sadis ka TUHAN adi Tapa ami. Kambŭi kieh dŭh ndai simŭnŭ, Ayŭh re siŭ kieh ngga andam puan kah ngga perang.”

⁴ Raja nang di Moses ngga Aaron, “Ani rati pingandai ngan anŭ adi re bada bara daya tingge kraja ngara? Bada bara urun anŭ pari di nyiraja!

⁵ Bara ngan mbŭh jadi raru bagŭ so daya Egypt. Jadi madin angān raan ko nyiraja!”

⁶ Di andu anŭ gŭh raja pesan bara daya Egypt adi pinguasa urun ngga daya Israel adi jadi mandor:

⁷ “Dŭh tia nggen di bangsa anŭ siriyang ngga ndai batuh batā. Bada adŭp ngara di jiroh-i.

⁸ Pak bada ngara babŭ ndai batuh batuh batā kiang adi mbŭh ngara ndai, ndi batuh batā dŭh gŭh siŭn kurang. Ngara gibabŭ me nyiraja, ngapŭi meh ngara ari mite aku nyibandar ngara ruah di jugan sadis ka Tapa ngara!

⁹ Bada ngara bandar bandar nyiraja ka nggen bagŭ kraja di ngara, isa ngara dŭh paya dingah dundan kadong.”

¹⁰ Bara pinguasa urun ngga bara daya Israel adi jadi mandor samah ruah ka nang di bara daya Israel, “Raja nang ayŭh dŭh re tia sidia yŭn ngan siriyang.

¹¹ Ayŭh nang adŭp ngan dŭh siŭn dŭh ndu-i di tadŭ tadŭ yŭn angān tungang dapŭd-i, pak angān dŭh siŭn dŭh ndai batā kiang adi mbŭh.”

¹² Jadi bara daya panu di ndi tarun tana Egypt jiroh siriyang.

¹³ Bara pinguasa urun mbŭh situngang tungang ngara takan bara daya ndai batuh batuh batā da kiang adi mbŭh barang andu nimun di tipuh siriyang dog nggen di ngara.

¹⁴ Daya Egypt adi pinguasa urun kijera bara daya Israel adi jadi mandor, adi ngara mbŭh tijuan bada nguasa kraja. Ngara nang, “Mani angān dŭh ndai batuh batuh batā bada nyikiang ngga anŭ adi angān ko ndai dawŭ-i?”

¹⁵ Ripas anŭ bara mandor di mingungut di sirung jawin raja, “Mani kaam ndai simuti di kieh, Tuan Raja?

¹⁶ Kieh dŭh dog nggen siriyang, pak kieh gibabŭ dog bada ndai batuh batā! Ka madin kieh dog kijera, pak adŭp pinurung mai inŭh adi sarah.”

¹⁷ Raja nam bara mandor, “Angān taŭn daya tibanga ka dŭh an nyiraja, ngapŭi ka angān mite aku piruah adŭp ngan da di jugan sadis ka TUHAN.

¹⁸ Pari di nyiraja madin! Angān dŭh re dog nggen siriyang, pak angān dŭh siŭn dŭh ndai batuh batā da kiang adi mbŭh.”

¹⁹ Madin bara mandor rada adŭp ngara darŭm susah kan ngara dog kidaan bada ndai batuh batā barang andu da kiang adi mbŭh.

²⁰ Darŭm ngara ruah bu so yŭn raja, ngara bidapŭd ngga Moses ka Aaron, adi mbŭh agi kajŭn ngara.

²¹ Ngara nang di Moses ngga Aaron, “TUHAN mbŭh kiris kayuh adi angān mbŭh ndai ka re ngukum angān amai angān mbŭh bada raja ngga bara pinurung-i tiru di kieh. Angān mbŭh nggen di ngara aran ngga siŭ kieh.”

Moses Ngadu di TUHAN

²² Komŭnŭ Moses pari ka TUHAN ka nang, “TUHAN, mani Kaam kinanyuh daya Mai? Mani Kaam pait aku kamati?

²³ So sibungas aku di bidapŭd ngga raja di minyu yŭn Mai, ayŭh mbŭh bana kinanyuh ngara. Ka Kaam mating ndai ani ani ngga turung ngara!”