PINYIRUAH 4 - Hakcipta - Biatah Bidayuh

Tapa Nggen di Moses Kuasa ngga ndai Pingandai-Nginga

¹ Komŭnŭ Moses nam TUHAN, “Pak munki kambŭi bara daya Israel dŭh sabah aku ka dŭh an dingah kayuh nang ku. Ani re ku ndai kambŭi ngara nang Kaam mating pinandŭng adŭp Mai di aku?”

² Jadi TUHAN siken ayŭh, “Ani anŭ adi kuu digŭng?” “Sikud nŭh,” ayŭh nam.

³ TUHAN nang, “Taran sikud anŭ ka tana.” Kan Moses sawŭ taran-i ka tana, sikud anŭ marui jadi jippŭh, ka Moses bu mangān-i.

⁴ Komŭnŭ TUHAN nang di Moses, “Mutu ka nakap di koi-i.” Jadi Moses mutu ka nakap jippŭh anŭ, ka nganŭ gŭh ayŭh rasu marui pari jadi sikud.

⁵ TUHAN nang, “Ndai simŭnŭ ngga kiren di daya Israel nang TUHAN, adi Tapa tayung-babuk ngara, adi Tapa Abraham, Isaac, ngga Jacob, mbŭh nandŭng di kuu.”

⁶ TUHAN minyu dinge di Moses, “Kasŭk tangan mu ka darŭm jipo-ambu mu.” Moses ndai nanyam dog bada; ka kan ayŭh piruah tangan-i ka sapa, tangan-i anŭ biritik buda mun salju dog andam kurit.

⁷ Ka TUHAN nang, “Kasŭk tangan mu dinge ka darŭm jipo-ambu mu.” Ayŭh kasŭk, ka kan ayŭh piruah tangan-i kari ati, tangan-i anŭ bua, nimun parad ganan-i adi bŭkŭn.

⁸ TUHAN nang, “Kambŭi ngara dŭh an sabah di pinganang mu puan kah dŭh bisaya da sibungas pingandai-nginga adi kuu ko ndai, kadŭ ati ndi re bada ngara sabah.

⁹ Kambŭi sunggu so-duwŭh pingandai-nginga anŭ dog ndai ka ngara babŭ gŭh dŭh sabah di kuu, ka kambŭi ngara abah dingah di pinganang mu, tambit piin so Yang Nile ka ren-i di tana. Piin anŭ re marui jadi deya.”

¹⁰ Pak Moses nang, “Dŭh, TUHAN, dŭhnyah pait aku. Aku dŭh daya adi siradik minyu, ka taŭn gi-bŭn so sibungas Kaam minyu ngga aku. Aku daya adi bawa minyu, sitanah buang taru.”

¹¹ TUHAN nang di ayŭh, “Asi garang nggen baba di manusia? Asi bada ayŭh bangam puan kah dŭh pandai minyu? Asi bada ayŭh kiris tarun puan kah bada ayŭh karak? Aku inŭh, adi TUHAN.

¹² Panu madin! Aku re turung kuu minyu, ka Aku re kidaan di kuu kayuh adi re mu nang.”

¹³ Pak Moses nam, “Dŭh, TUHAN, turung pait daya bŭkŭn.”

¹⁴ TUHAN mbŭh baji di Moses ka nang, “Munki ngga jurud mu Aaron, adi daya Levi? Aku puan ayŭh pandai minyu. Sibandar-i ayŭh madin darŭm pimanu-i di dapŭd kuu ka re raru gaŭn bidapŭd ngga kuu.

¹⁵ Kuu bisa minyu di ayŭh ka kidaan di ayŭh ani kayuh adi patut dog nang. Aku re turung so-duwŭh ngan minyu, ka Aku re kidaan di so-duwŭh ngan kayuh adi re angān ndai.

¹⁶ Ayŭh re jadi tukang minyu yŭn mu ka re minyu di bara daya bagŭ yŭn mu. Kuu re keya ka Tapa, amai kidaan di ayŭh kayuh adi re-i nang.

¹⁷ Taban sikud anŭ ngga panu; amai ngga sikud anŭ kuu re ndai pingandai-nginga.”

Moses Pari ka Egypt

¹⁸ Ripas anŭ Moses pari ka yŭn Jethro, adi damŭh-i, ka nang di ayŭh, “Turung bada aku pari ka yŭn bara madis ku di Egypt, an puan gibabŭ udip kah dŭh ngara.” Jethro bada ka nggen siramat panu di ayŭh.

¹⁹ Sitadŭn Moses gibabŭ di Midian, TUHAN nang di ayŭh, “Panu meh pari ka Egypt, amai sopŭrŭg ngara adi an siŭ kuu mbŭh abo kabŭs.”

²⁰ Jadi Moses taban sawŭn-i ka bara anak dari-i; bada ngara guru di tunduh kaldi, ka rasu matak ayō ngara ka Egypt. Ayŭh taban sikud adi Tapa ko kidaan di ayŭh da taban.

²¹ TUHAN nang di Moses dinge, “Amai madin kuu pari ka Egypt, kuu dŭhnyah dŭh ndai sopŭrŭg pingandai-nginga adi Aku muko nggen kuasa di kuu ngga ndai, di sirung jawin raja. Pak Aku re bada atin raja anŭ baking, ka ayŭh dŭh re bada daya Israel bu so Egypt.

²² Nganŭ kuu dŭh siŭn dŭh kidaan di ayŭh nang Aku, adi TUHAN, nang, ‘Israel inŭh anak pinuai Ku.

²³ Aku muko kidaan di kuu da pirupas anak Ku, isa ayŭh nyambah Aku, pak kuu abah bada. Madin Aku re siŭ anak pinuai dari mu.’ ”

²⁴ Di tarun yŭn ngara bibari di atang aran nuju Egypt, TUHAN bidapŭd ngga Moses ka suba re siŭ ayŭh.

^25-26 Nganŭ Zipporah, adi sawŭn Moses, tambit batuh adi reja, ka kapŭg tŭbŭn kurit buat anak dari-i, ka tama kaja Moses ngga kurit anŭ. Sabab di adat bisunat ayŭh nang di Moses, “Kuu banŭh deya di aku.” Ngga sabab anŭ meh TUHAN dŭh siŭ Moses.

²⁷ Di tika anŭ gŭh TUHAN agi minyu di Aaron, “Panu di ka tarun tana-pajam di bidapŭd ngga Moses.” Jadi ayŭh di ka bidapŭd ngga Moses di darŭd kudus; ka kan ngara mbŭh bidapŭd ngga dingan-i, Aaron sium ayŭh.

²⁸ Komŭnŭ Moses kidaan di Aaron sopŭrŭg kayuh adi TUHAN ko kidaan di ayŭh di andu Ayŭh bada ayŭh pari ka Egypt; Moses kidaan gŭh di Aaron pasar pingandai-nginga adi TUHAN ko bada ayŭh ndai.

²⁹ Jadi Moses ngga Aaron matak ka Egypt ka bagan sopŭrŭg pinguru daya Israel da tikuruk.

³⁰ Aaron kidaan di ngara sopŭrŭg kayuh adi TUHAN ko kidaan di Moses, ka diginŭ gŭh Moses ndai sopŭrŭg pingandai-nginga di sirung jawin bara daya.

³¹ Ngara sabah, ka kan ngara dingah nang TUHAN mbŭh mandŭg ka ngara ka mbŭh kiris munki masam ngara dog pijera, ngara mutu ubak ngara ka nyambah.