PINYIRUAH 39 - Hakcipta - Biatah Bidayuh

Ndai Piraka imam yŭn bara Imam

¹ Ngga banang buruh biri adi biru, bēng, ka bireh, ngara ndai piraka adi sangŭn adi re bara imam nēn kan ngara nyiraja di Yŭn Kudus. Ngara ndai piraka imam yŭn Aaron, nanyam adi TUHAN ko pesan di Moses.

² Ngara ndai efod so banang linen adi duduh, banang buruh biri adi biru, adi bēng, ka adi bireh, ka tiburi mas.

³ Ngara maba ka pijadi kiping kiping mas ka kapŭg-i bada ride sirah tŭngŭn tŭngŭn-i isa-i bisa dog naris di banang linen adi duduh ka di buruh biri adi biru, adi bēng, ka adi bireh.

⁴ Ngara ndai duwŭh song kawin yŭn efod ka nyiit-i di so-duwŭh parad tigang-i isa-i bisa dog ngabŭt di pŭrŭng.

⁵ Ka abŭt kupong adi nakit dog nanun ngga banang linen ka buruh biri gŭh dog pirakat di efod anŭ da sinyadi, nanyam adi TUHAN ko pesan di Moses.

⁶ Ngara sidia batuh batuh akek bireh ka pirakat-i di sinangan mas; dŭn dŭn simŭng duwŭh madis anak Jacob nakit dog mŭŭt di tunduh batuh batuh anŭ.

⁷ Batuh batuh anŭ dog pirakat ngara di song kawin efod ngga ngarun simŭng duwŭh tibaran-asar daya Israel, nanyam adi TUHAN ko pesan di Moses.

Ndai Tutu-Sudo

⁸ Jadi ngara ndai tutu-sudo so samah banang ngga anŭ adi ngga ndai efod ka adi samah butik bunga jiit-i.

⁹ Ayŭh agi misagi ka tikupet nyinuwŭh, 22 sentimita ambu ka 22 sentimita ramba.

¹⁰ Ngara pirakat 4 baris batuh batuh brega dieh: di baris adi sibungas-i, ngara pirakat ndi rubi, ndi topaz, ka ndi garnet,

¹¹ di baris adi numbor duwŭh, ndi zamrud, ndi nilam, ka ndi itan;

¹² di baris adi numbor taruh, ndi firus, ndi akek, ka ndi kecubung;

¹³ ngga di baris adi numbor pat, ndi beril, ndi akek bireh, ka ndi jasper. Sopŭrŭg anŭ dog pirakat di sinangan mas.

¹⁴ Di tiap batuh anŭ adi 12 agi dog mŭŭt dŭn anak anak Jacob ngga ngarun 12 tibaran-asar daya Israel.

¹⁵ Yŭn tutu-sudo anŭ ngara ndai parik so tigŭrŭ mas adi dog ngaring bada mun taris.

¹⁶ Ngara ndai duwŭh sinangan mas ka duwŭh sigarong mas, ka pirakat sigarong mas anŭ adi 2 di sikuh tutu-sudo anŭ tura ka sambu.

¹⁷ Ngara ngabŭt duwŭh parik mas anŭ di duwŭh sigarong mas,

¹⁸ ka ngabŭt tŭbŭn parik anŭ adi duwŭh di duwŭh tigurang ka ngga simŭnŭ meh pirakat-i di song kawin efod tura ka jawin.

¹⁹ Ngara ndai duwŭh sigarong mas ka pirakat-i tura ka sagān bŭngŭn tutu-sudo, di sigŭn tura ka darŭm sindŭk efod anŭ.

²⁰ Ngara ndai duwŭh dinge sigarong mas ka pirakat-i di sagān song kawin anŭ adi duwŭh tura ka jawin, sindŭk tigurang-i di sambu abŭt kupong adi nakit dog nanun.

²¹ Nimun adi TUHAN ko pesan di Moses, ngara mŭŭng sigarong tutu-sudo anŭ di sigarong efod ngga taris adi biru, isa tutu-sudo bisangan di sambu abŭt kupong anŭ ka dŭh rudos.

Ndai Piraka adi bŭkŭn adi Imam Pakai

²² Jipo-ambu adi dog nunduh efod dog ndai so tigŭrŭ banang buruh biri adi biru.

²³ Rubang adi yŭn tungo dog nyigiren ngga jiit banang tanun ngga bada-i dŭh udah tatas.

^24-26 Maning sigŭn-i ngara ngabuh ngga buwa buwa delima adi dog ndai so banang linen adi duduh ka so banang buruh biri adi biru, adi bēng, ka adi bireh; bisarŭt diginŭ agi anak anak ruseng adi dog ndai so tigŭrŭ mas, nimun adi TUHAN ko pesan di Moses.

²⁷ Ngara ndai gŭh jipo yŭn Aaron ngga bara anak-i,

²⁸ ka bubok, tupi, ka sinjang rajut banang linen,

²⁹ ka bŭŭng kupong so banang linen adi duduh ka so banang buruh biri adi biru, adi bēng, ka bireh, adi dog ngabuh ngga butik bunga jiit, nimun adi TUHAN ko pesan di Moses.

³⁰ Ngara ndai abuh bubok adi tandā pinyikudus, so tigŭrŭ mas ka mbŭh dog mŭŭt dieh: “Kudus yŭn TUHAN.”

³¹ Ngara mŭŭng tandā anŭ di tura ka jawin bubok ngga bŭŭng adi biru, nimun adi TUHAN ko pesan di Moses.

Kraja Dog Ngamas

³² Sopŭrŭg kraja pingandai di Bari TUHAN mbŭh kamas. Daya Israel mbŭh ndai sopŭrŭg kayuh nimun adi TUHAN ko pesan di Moses.

³³ Ngara taban ka yŭn Moses Bari TUHAN samŭn pingakas-i, sikait-i, sibukah-i, parang-i, tiang-i ka bangan-i;

³⁴ tutu adi dog ndai so kurit dari biri adi dog nyamŭk bireh; tutu adi dog ndai so birurang adi duduh; ka banang tabir.

³⁵ Pati Simanya adi agi darŭm-i duwŭh kiping batuh anŭ, pinawid-i ngga tŭtŭp-i.

³⁶ Mija ngga sopŭrŭg pingakas-i, ngga ruti adi dog jugan ka Tapa;

³⁷ rika prita adi dog ndai so tigŭrŭ mas ngga prita prita-i; sopŭrŭg pingakas-i, ka inyo prita;

³⁸ mija-sambah mas; inyo kudus; kimanyan adi buuh ramak; banang tabir yŭn tiban Bari TUHAN,

³⁹ Mija-sambah timaga ngga radai timaga-i, pinawid-i, ngga sopŭrŭg pingakas-i; sambong-pinyingu ngga bangan-i;

⁴⁰ banang tabir buwang ka tiang tiang-i ka bangan bangan-i; tabir tiban buwang ngga taris taris-i; pagu pagu Bari TUHAN, sopŭrŭg pingakas adi dog pakai darŭm Bari TUHAN;

⁴¹ Piraka adi imam nēn kan ngara ndai kraja di Yŭn Kudus; piraka piraka adi kudus yŭn imam Aaron samŭn bara anak-i.

⁴² Daya Israel mbŭh ndai sopŭrŭg kraja nimun adi TUHAN ko pesan di Moses.

⁴³ Moses piruh sopŭrŭg kayuh adi ngara ko ndai, ka kiris sopŭrŭg-i mbŭh dog ndai nanyam adi TUHAN ko pesan. Jadi Moses nyiberkat ngara.