PINYIRUAH 32 - Hakcipta - Biatah Bidayuh

Anak Dari Sapi dog Ndai so Mas

¹ Kan bara daya kiris Moses babŭ mating mūn so darŭd, pak mbŭh tui rŭŭ diginŭ, ngara mandŭg tikuruk maning Aaron, ka nang di ayŭh, “Ata dŭh puan ani mbŭh jadi di Moses, adi mbŭh taban ata ngga ruah so Egypt. Kiang nŭŭh ndai adŭ ndi tapa da nguru ata.”

² Aaron nang di ngara, “Kadi sigating sigating mas adi sawŭn ngan, anak dari ngan, ka anak dayung ngan pakai, ka taban-i ka yŭn ku.”

³ Jadi sopŭrŭg daya kadi sigating mas ngara ka taban-i ka yŭn Aaron.

⁴ Aaron tambit sigating sigating anŭ, piriris-i ka ren-i di suan, ka ndai ndi tibudo anak dari sapi mas. Ka bara daya nang, “O Israel, ati inŭh tapa ta adi mbŭh taban ata ngga ruah so Egypt!”

⁵ Komŭnŭ Aaron ndai ndi mija-sambah tura ka jawin sapi mas anŭ, ka kidaan di bara daya, “Sipagi re agi gawai ngga kibās TUHAN.”

⁶ Awar isan isan andu jawa ndi ngara taban kada dāng yŭn badang ndu sadis, ka adi bŭkŭn yŭn man ndu sadis bidingan. Bara daya guru man ngga nok, ka piguru ndai rubi adi kais.

⁷ TUHAN nang di Moses, “Rikas mūn meh ka sagān, amai bara daya mu adi kuu mbŭh taban ngga ruah so Egypt agi ndai sarah ka nyibireu Aku.

⁸ Ngara mbŭh tingge atur atur adi Aku muko bada ngara tunda; ngara mbŭh ndai sapi so mas adi dog piriris ka nyambah-i, ka jugan sadis dieh. Ngara mbŭh nang anŭ inŭh tapa ngara adi mbŭh taban ngara ngga ruah so Egypt.

⁹ Aku puan munki masam baking-i ngara.

¹⁰ Jadi madin, dŭhnyah suba bitan Aku. Aku mbŭh baji di ngara, ka Aku re pirabur ngara. Pak Aku re bada kuu ngga bara sesang mu jadi bangsa adi bās.”

¹¹ Pak Moses mite so TUHAN adi Tapa-i ka nang, “TUHAN mani Kaam mbŭh paŭh baji di daya daya Mai adi Kaam mbŭh piruah so Egypt ngga pinyibake ka kuasa bās Mai?

¹² Patut kah daya Egypt nang Kaam taban daya Mai ngga ruah so Egypt, yŭn re an siŭ ngara di arong darŭd ka pirarap ngara? Dŭhnyah tia baji; ngubah pikir Mai ka dŭhnyah taban pinyirusag ati ka daya Mai.

¹³ Ingat urun urun Mai Abraham, Isaac, ka Jacob. Ingat janji adi Kaam muko ndai di ngara, an nggen di ngara sikiang kiang bagŭ sesang, bagŭ keya ka bitang di rangit, ka nggen di sesang ngara tana adi Kaam muko bijanji re jadi bisaka ngara adu adu.”

¹⁴ Jadi TUHAN ngubah pikir-I ka dŭh taban pinyirusag anŭ ka daya-I, pinyirusag adi ko-I nang.

¹⁵ Moses mūn so darŭd, taban duwŭh kiping batuh adi yŭn Pinyipesan dog nuris di so-duwŭh parad-i.

¹⁶ Adŭp Tapa ko ndai kiping kiping batuh anŭ, ka mbŭh nuris Pinyipesan dieh.

¹⁷ Joshua dingah bara daya nyirais ka nang di Moses, “Aku dingah sak daya biperang di yŭn ta bibari.”

¹⁸ Moses nang, “Anŭ dŭh sak sirais daya manang biperang, dŭh gŭh sirais daya arah biperang; anŭ sak jawŭn daya biragu.”

¹⁹ Kan Moses mbŭh sindŭk yŭn ngara bibari ka kiris tibudo sapi ka bara daya birajang, ayŭh mbŭh raru baji. Diginŭ di sigŭn darŭd, ayŭh taran so-duwŭh kiping batuh anŭ adi-i gŭrŭng; kiping batuh anŭ pape.

²⁰ Ayŭh tambit tibubo sapi anŭ adi ngara ko ndai, piriris-i, ka nginges-i da mun tibaduk, ka gaur-i ngga piin. Komŭnŭ ayŭh bada daya Israel nok-i.

²¹ Ayŭh nang di Aaron, “Ani kayuh adi bara daya ati ndai di kuu ka kuu tandah ngara ndai dosa adi raru sipŭ mun anŭ?”

²² Aaron nam, “Dŭhnyah tuas di aku. Kaam puan munki masam ngara ati taŭn bigŭtŭ an ndai arap.

²³ Ngara nang di aku, ‘Kieh mbŭh dŭh puan ani mbŭh jadi di daya anŭ, Moses, adi taban kieh ngga ruah so Egypt; ngapŭi ndai meh ndi tapa yŭn ami da nguru kieh.’

²⁴ Aku bada ngara taban ka yŭn ku pimakai mas ngara; ka sinadan adi biyŭn, pirudos so adŭp-i ka nggen-i di aku. Aku taran pimakai mas anŭ ka apui, ka timbur meh tibudo sapi ati!”

²⁵ Moses kiris Aaron mbŭh tandah adŭ bara daya dŭh tungang dog jaga, ka ndai kayuh adi kiren adŭp ngara budo bawa di sirung jawin pinganyu ngara.

²⁶ Jadi ayŭh mijog di rawa tarun yŭn ngara bibari ka nyirais nang, “Barang naan daya adi mbit parad ka TUHAN, mandŭg kamati.” Jadi sopŭrŭg daya Levi mandŭg maning ayŭh,

²⁷ ka-i nang di ngara, “TUHAN Tapa daya Israel bada barang naan angān nakin pedang ngan ka mŭrŭt sopŭrŭg bari, piguru so rawa ati ndŭg rawa ajeh ndi, ka siŭ bara jurud ngan, jerā ngan, ka rasū ngan.”

²⁸ Bara daya Levi tunda pinganang anŭ, ka siŭ kurang rabis taruh ribu naan adi dari di andu anŭ.

²⁹ Moses nang di bara daya Levi, “Andu ati angān mbŭh garar adŭp ngan jadi imam yŭn TUHAN darŭm angān siŭ anak anak dari ngan, ka jurud ngan. Simŭnŭ TUHAN mbŭh nggen berkat-I di angān.”

³⁰ Andu anŭ ndi Moses nang di bara daya, “Angān mbŭh ndai dosa adi raru sipŭ. Pak madin aku re maad darŭd dinge ka yŭn TUHAN; kadŭ aku tungang dapŭd pingapun so Ayŭh yŭn dosa ngan.”

³¹ Moses sawŭ di pari ka yŭn TUHAN, ka nang, “Ngara anŭ mbŭh ndai dosa adi raru sipŭ-i. Ngara mbŭh agi ndai tapa so mas ka nyambah-i.

³² Turung apun dosa ngara; pak kambŭi Kaam abah ka nŭh kadi adŭ jaku dŭn so surat adi yŭn Mai nuris dŭn bara daya Mai.”

³³ TUHAN nam, “Ngara anŭ adi mbŭh bidosa rawan Aku inŭh adi dapu dŭn adi re Aku kadi so surat Ku.

³⁴ Panu madin, di nguru bara daya anŭ ka tarun adi muko Aku kidaan di kuu. Ingat malaikat Ku re agi nguru angān, pak tipuh re mandŭg kan Aku re ngukum ngara amai dosa ngara.”

³⁵ Jadi TUHAN pait andam da dog bara daya, sabab ngara mbŭh takan Aaron ndai tibudo anak sapi anŭ so mas.