PINYIRUAH 19 - Hakcipta - Biatah Bidayuh

Daya Israel di Darŭd Sinai

^1-2 Bara daya Israel bu so Rephidim, ka di andu adi ndi darŭm buran adi taruh ripas ngara mbŭh bu so Egypt ngara mandŭg ka tarun tana-pajam Sinai. Diginŭ ngara bibari di sigŭn Darŭd Sinai,

³ ka Moses maad darŭd an bidapŭd ngga Tapa. TUHAN bagan ayŭh so darŭd ka bada ayŭh kidaan di daya Israel, adi sesang Jacob:

⁴ “Angān mbŭh kiris kayuh adi Aku, adi TUHAN, mbŭh ndai di tunduh daya Egypt ka munki Aku mbŭh taban angān keya ka beuh taban anak-i di urad-i, ka taban angān kamati ka yŭn adŭp Ku.

⁵ Madin, kambŭi angān tunda pinganang Ku ka sita simanya Ku, angān re jadi daya Ku. Ndi ong ong ati mbŭh tung jaku, pak angān re jadi daya adi Aku ko mien,

⁶ daya adi dog nitah ka Aku sadi, ka angān re jadi bara imam yŭn Ku.”

⁷ Jadi Moses mūn so darŭd anŭ ka bagan bara pinguru da tikuruk ka kidaan di ngara sopŭrŭg kayuh adi TUHAN ko pesan di ayŭh.

⁸ Komŭnŭ sopŭrŭg daya samah nam, “Kieh re ndai sopŭrŭg kayuh adi TUHAN mbŭh nang,” ka Moses kidaan-i di TUHAN.

⁹ TUHAN nang di Moses, “Aku re mandŭg ka kuu darŭm abun, isa daya dingah Aku minyu ngga kuu ka re so madin sabah di kuu.” Moses kidaan di TUHAN pinyinam daya,

¹⁰ ka TUHAN nang di ayŭh, “Di ka bara daya bagŭ ka kidaan di ngara da pibisig adŭp ngara andu ati ngga andu sipagi. Ngara dŭh siŭn dŭh ngu piraka ngara

¹¹ ka sidia adŭp ngara yŭn girundi. Di andu anŭ Aku re mūn ka Darŭd Sinai, di yŭn sopŭrŭg daya tungang kiris Aku.

¹² Ndai siri baat maning darŭd adi daya dŭh siŭn kabang, ka kidaan di ngara da dŭh maad darŭd bait nyindŭk-i. Asi asi adi kabang baat, ayŭh re dog ukum kabŭs;

¹³ ayŭh dŭh siŭn dŭh dog manjan ngga batuh puan kah dog nimbak ngga reja-panah, buang mating daya re nyingŭg ayŭh. Atur ati yŭn manusia ngga dāng; ngara dŭh siŭn dŭh dog ukum kabŭs. Pak di tika trompet dog mambak, nganŭ daya bisa maad darŭd.”

¹⁴ Komŭnŭ Moses mūn so darŭd ka kidaan di bara daya da sidia adŭp ngara. Jadi ngara ngu piraka ngara,

¹⁵ ka Moses nang di ngara, “Sidia ngga andu girundi ka dŭhnyah diŭ nyibŭŭs ngga sawŭn ngan.”

¹⁶ Isan isan andu adi taruh agi dudū ngga kijat, abun adi tabar tatŭng di tibung darŭd, ka jawŭn trompet adi raru bana dog dingah. Sopŭrŭg daya di bari kimŭtŭr taru.

¹⁷ Moses taban ngara ngga ruah so bari di bidapŭd ngga Tapa; ka ngara mijog di sigŭn darŭd.

¹⁸ Darŭd Sinai mbŭh dog nutu asuh, sabab TUHAN mbŭh mūn ka tunduh-i darŭm apui. Asuh anŭ maad ka rangit mun asuh so buwang apui, ka sopŭrŭg daya mbŭh bana kimŭtŭr taru.

¹⁹ Jawŭn trompet anŭ dŭ dŭ bana. Moses minyu, ka Tapa nam ayŭh ngga jawŭn dudū.

²⁰ TUHAN mūn ka tibung Darŭd Sinai ka bagan Moses da maad ka tibung darŭd. Moses maad

²¹ ka TUHAN nang di ayŭh, “Di mūn ka bakan bara daya da dŭh mutas baat di tingga Aku; kambŭi ngara mutas-i, bagŭ ngara re kabŭs.

²² Ka bara imam adi mandŭg nyindŭk Aku dŭh siŭn dŭh an pibisig adŭp-i; Aku ngukum ngara rai-i.”

²³ Moses nang di TUHAN, “Bara daya dŭh dapŭd maad, sabab Kaam mbŭh pesan kieh da nyirundeng darŭd ati kudus buang ndai baat maning-i.”

²⁴ TUHAN nam, “Di mūn ka taban Aaron ngga pari kamati. Pak bara imam ngga bara daya dŭh siŭn mutas baat di tingga Aku; Aku ngukum ngara rai-i.”

²⁵ Moses rasu mūn ka sagān ka yŭn bara daya ka kidaan di ngara kayuh adi TUHAN mbŭh nang.