PINYIRUAH 18 - Hakcipta - Biatah Bidayuh

Jethro Munan Moses

¹ Jethro, adi damŭh Moses, ka adi imam gŭh di Midian, mbŭh dingah pasar sopŭrŭg kayuh adi Tapa mbŭh ndai yŭn Moses ka yŭn daya Israel, darŭm Ayŭh taban ngara ruah so Egypt.

² Jadi ayŭh mandŭg ka Moses, taban sawŭn Moses, adi ko dog tingge,

³ ngga anak dari-i adi duwŭh madis, Gershom ngga Eliezer. (Moses agi nang, “Aku mbŭh jadi daya pinami di tarun tana saruh”; sabab anŭ ayŭh kadŭn ndi anak dari-i Gershom.

⁴ Moses muko gŭh nang, “Tapa sama ku mbŭh turung aku ka nyiramat aku so dog siŭ raja Egypt”. Ngga sabab anŭ gŭh ayŭh kadŭn anak dari-i sianŭ ndi Eliezer.)

⁵ Jethro ngga sawŭn Moses ngga anak dari-i adi duwŭh madis mandŭg ka tarun tana-pajam di yŭn Moses bibari di darŭd kudus.

⁶ Jethro muko gŭh pait pinganang ka Moses nang adŭp-i re mandŭg,

⁷ jadi Moses ruah di kambat ayŭh, ka mutu ka ayŭh ka sium ayŭh. Ngara samah bisiken pasar bua sanang dingan-i, ka komŭnŭ ngara mŭrŭt ka darŭm bari Moses.

⁸ Moses nyidundan di Jethro sopŭrŭg adi TUHAN mbŭh ndai di tunduh raja ngga daya Egypt ngga piruah daya Israel. Ayŭh nyuse gŭh pasar jera ngara di pimanu ngara ka munki TUHAN mbŭh nyiramat ngara.

⁹ Kan Jethro dingah sopŭrŭg kayuh anŭ, ayŭh raru gaŭn

¹⁰ ka nang, “Puji ka TUHAN adi mbŭh nyiramat angān so raja ngga so daya Egypt! Puji ka TUHAN adi mbŭh piruah daya-i so dog piurun!

¹¹ Madin aku puan nang TUHAN sawŭ bās dŭ so sopŭrŭg tapa adi bŭkŭn, amai Ayŭh mbŭh ndai simŭnŭ di tika daya Egypt dŭh stabi di daya Israel.”

¹² Komŭnŭ Jethro tambit sadis an-i mŭrŭng badang, ngga sadis adi bŭkŭn an-i jugan ka TUHAN; ka Aaron ngga bara pinguru daya Israel samah ngga ayŭh di man pinguman kudus anŭ ngga nyambah Tapa.

Tijuan Bara Akim

¹³ Di andu jawa ndi, Moses mbŭh ngatur kaii daya bagŭ, ka ayŭh mbŭh dŭh paya so isan isan ndŭg karŭm.

¹⁴ Kan Jethro kiris sopŭrŭg kayuh adi Moses patut ndai, ayŭh siken, “Ani sopŭrŭg ati adi ndai mu yŭn daya bagŭ? Mani kuu ndai sopŭrŭg ati sadi adŭp mu, ka daya bagŭ mijog digiti so isan isan ndŭg karŭm an bisiken ngga kuu?”

¹⁵ Moses nam, “Aku dŭh siŭn dŭh ndai ati, amai daya bagŭ mandŭg tudu aku an birajar pasar pinyiraan Tapa.

¹⁶ Kan duwŭh naan daya bikaii, ngara mandŭg ka yŭn ku, ka aku kidaan asi so ngara adi batur, ka aku kidaan di ngara pesan ngga ukum-adat Tapa.”

¹⁷ Jadi Jethro nang, “Sarah pingandai mu simŭnŭ.

¹⁸ Kuu re pirarah adŭp mu, samŭn bara daya anŭ. Kuu dŭh re nyawa sadi adŭp mu ndai simŭnŭ.

¹⁹ Madin, bada aku nggen kada pinyitayan adi kana di kuu, ka Tapa re agi ngga kuu. Taŭn patut kuu jadi pingarun daya bagŭ di Tapa, ka taban kaii ngara ka Ayŭh.

²⁰ Kuu patut ngajar pesan Tapa di ngara ka kidaan munki ngara patut udip ka ani adi patut ngara ndai.

²¹ Pak nambah anŭ, kuu patut mien kada daya adi bisa jadi pinguru bara daya: pinguru biribu naan daya, biratus naan daya, rimŭh puru ka simŭng naan daya. Ngara dŭh siŭn dŭh daya adi taru di Tapa, adi bisa dog sabah ka dŭh dapŭd dog nyuap.

²² Bada ngara jadi akim adi tatap yŭn daya bagŭ. Ngara bisa taban ka yŭn mu sopŭrŭg kayuh adi mbar dog ngatur, pak sopŭrŭg kaii adi sŭ adŭp ngara patut ngatur. Simŭnŭ kuu pijangan kraja mu, amai ngara agi turung kuu.

²³ Kambŭi kuu ndai simŭnŭ nimun adi Tapa pesan, kuu dŭh re pirarah adŭp mu, ka sopŭrŭg daya anŭ bisa maad darŭm kaii ngara mbŭh tirase dog ngatur.”

²⁴ Moses trima ajar Jethro

²⁵ ka mien daya daya adi patut so dupan sopŭrŭg daya Israel. Ayŭh tijuan ngara bada jadi pinguru adi digen siribu, siratus, rimŭh puru, ka simŭng naan daya.

²⁶ Kraja ngara inŭh jadi akim adi tatap yŭn daya bagŭ, ka taban kaii adi mbar dog ngatur ka yŭn Moses, pak adŭp ngara matŭd itong yŭn kaii adi sŭ.

²⁷ Komŭnŭ Moses nggen siramat panu di Jethro, ka Jethro pari ka ramin adŭp-i.