PINYIRUAH 16 - Hakcipta - Biatah Bidayuh

Manna ngga Manuk Pŭpŭng

¹ Sopŭrŭg daya Israel matak so Elim, ka di andu adi simŭng-rimŭh darŭm buran adi duwŭh ripas ngara mbŭh ruah so Egypt, ngara mandŭg ka tarun tana-pajam Sin, adi di asah Elim ngga Sinai.

² Diginŭ di tarun tana-pajam sopŭrŭg ngara mingungut di Moses ngga Aaron

³ nang, “Kana dŭ kambŭi TUHAN pati ka siŭ kieh di Egypt. Diginŭ kieh bisa piji ka guru man dagin ngga sikiang kiang pinguman kieh raan. Pak kuu mbŭh taban kieh ruah ka tarun tana-pajam ati bada kieh kabŭs sikirau adŭ.”

⁴ TUHAN nang di Moses, “Madin Aku re bada pinguman rabu mun ujen so rangit yŭn sopŭrŭg ngan. Daya dŭh siŭn dŭh an ruah barang andu di nguruk sadang kiang-i yŭn man di andu anŭ. Simŭnŭ Aku bisa suba ngara, an kah abah ngara tunda pingatur Ku.

⁵ Di andu adi nŭm ngara an taban duwŭh rupet so adi ari ngara tambit ka sidia-i.”

⁶ Jadi Moses ngga Aaron nang di sopŭrŭg daya Israel, “Singumi andu ati angān re puan nang TUHAN inŭh adi taban angān ngga ruah so Egypt.

⁷ Ngga isan isan angān re kiris jawa bragah TUHAN. Ayŭh mbŭh dingah angān mingungut rawan adŭp-I, sawŭ, rawan Ayŭh, sabab kieh ati batur ami tunda pingatur-I adŭ.”

⁸ Komŭnŭ Moses nang, “Adŭp TUHAN inŭh adi re nggen di angān dagin yŭn singumi andu, ka ngga sibagŭ ruti nanyam raan ngan yŭn isan isan, sabab Ayŭh mbŭh dingah munki masam angān mingungut rawan Ayŭh. Kan angān mingungut rawan kieh, angān mbŭh mingungut rawan TUHAN.”

⁹ Moses nang di Aaron, “Kidaan di sopŭrŭg daya Israel bada mandŭg ka mijog di sirung jawin TUHAN, sabab Ayŭh mbŭh dingah ngara mingungut.”

¹⁰ Darŭm Aaron minyu di sopŭrŭg daya Israel, ngara bigiring nura tarun tana-pajam, ka gŭgŭh agi jawa bragah TUHAN nyirinyak di abun.

¹¹ TUHAN nang di Moses,

¹² “Aku mbŭh dingah bara daya Israel mingungut. Kidaan di ngara nang ngga singumi andu re agi dagin re ngara man, ka ngga isan isan ngara re man sikiang kiang ruti adi ngara raan. Ngara re puan nang Aku, adi TUHAN, inŭh Tapa ngara.”

¹³ Ngga singumi andu ndi kaban manuk pŭpŭng mandŭg, ka tarun adi yŭn ngara bibari puno da-i, ka ngga isan isan agi sipot-abun di tarun yŭn ngara bibari.

¹⁴ Kan sipot-abun anŭ mbŭh miyap, di tunduh tarun tana-pajam agi kayuh prisupek ka ride mun abun adi maku di tunduh tana.

¹⁵ Kan daya Israel kiris-i, ngara dŭh puan ani kayuh anŭ ka samah siken dingan-i, “Kayuh ani ati?” Moses nang di ngara, “Ati inŭh pinguman adi TUHAN mbŭh nggen di angān da man.

¹⁶ TUHAN mbŭh pesan nang barang naan angān an nguruk-i nanyam raan ngan, anŭ inŭh duwŭh lita yŭn barang naan di rawang-i.”

¹⁷ Bara daya Israel ndai simŭnŭ, agi adi nguruk rabis, agi adi nguruk nisŭ.

¹⁸ Kan ngara nakar-i, ngara adi nguruk bagŭ dŭh biyŭn rabis so patut, ka ngara adi nguruk nisŭ dŭh biyŭn paŭh nisŭ. Barang naan mbŭh nguruk nanyam kiang adi patut-i nguruk.

¹⁹ Moses nang di ngara, “Dŭhnyah tadŭ tadŭ so angān nyikŭn-i yŭn andu sipagi.”

²⁰ Pak kada so ngara dŭh dingah pinganang Moses ka mbŭh nyikŭn kada-i. Andu jawa ndi ayŭh mbŭh ngŭrŭd buang buuh madam, ka Moses baji di ngara.

²¹ Barang isan ngara nguruk bagŭ kiang nanyam biguna ngara; ka kan batŭh andu mbŭh makin paras, anŭ adi dŭm di tana riris.

²² Di andu adi nŭm ngara nguruk duwŭh rupet pinguman, pat lita yŭn barang naan. Sopŭrŭg pinguru daya Israel mandŭg ka kidaan di Moses pingandai ngara,

²³ ka ayŭh nang di ngara, “TUHAN mbŭh pesan nang andu sipagi inŭh andu kudus yŭn rŭŭ, dog nitah yŭn-I. Pak andu ati angān bisa manggang ani adi angān raan manggang ka tanŭk ngga piin ani adi angān raan tanŭk ngga piin. Anŭ adi dŭm nitah yŭn andu sipagi.”

²⁴ Nimun adi ko Moses pesan, ngara nyikŭn anŭ adi dŭm yŭn andu sipagi. Pinguman anŭ dŭh bangŭs ka dŭh gŭh ngŭrŭd.

²⁵ Moses nang, “Man pinguman ati andu ati, sabab andu ati inŭh andu Sabbath, andu rŭŭ adi dog nitah yŭn TUHAN, ka angān dŭh re dapŭd pinguman di sapa tarun yŭn bibari.

²⁶ Angān dŭh siŭn dŭh nguruk pinguman darŭm nŭm andu, pak di andu adi ju, andu rŭŭ, mating re dog nguruk.”

²⁷ Di andu adi ju agi kada daya ruah an nguruk pinguman, pak ngara dŭh dapŭd ani ani.

²⁸ Jadi TUHAN nang di Moses, “Ndŭg sinde angān dŭh an dingah pinganang Ku?

²⁹ Ingat Aku ati, adi TUHAN, mbŭh nggen di angān andu rŭŭ so kraja, ka anŭ inŭh sabab andu adi nŭm Aku ari nggen sukup pinguman yŭn tipuh duwŭh andu. Barang naan an rŭŭ di yŭn adŭp-i di andu adi ju ka dŭh ruah so arŭn-i.”

³⁰ Jadi sopŭrŭg daya dŭh nyiraja di andu adi ju.

³¹ Daya Israel kadŭn pinguman anŭ manna. Anŭ inŭh mun ruwang kayuh adi anŭk ka buda, ka nyam biskit adi dog ndai ngga ju banyis.

³² Moses nang, “TUHAN mbŭh pesan ata da kidŭm kada manna yŭn bara sesang ta isa ngara bisa kiris pinguman adi-I nggen di ata di tarun tana-pajam di andu Ayŭh piruah ata so Egypt.”

³³ Moses nang di Aaron, “Tambit ndi tipayan, na duwŭh lita manna dieh, ka na-i di sirung jawin TUHAN, nyikŭn yŭn bara sesang ta.”

³⁴ Nimun TUHAN ko pesan di Moses, Aaron na-i di jawin Pati Simanya, yŭn dog nyikŭn.

³⁵ Daya Israel man manna sitŭkŭd pat puru sawa so andu anŭ, ndŭg ka ngara mbŭh ndŭg tarun tana Canaan, di yŭn ngara bituku rŭŭ. (

³⁶ Takar yŭn kayuh badŭh adi kanyet ka patut dog pakai di jaman anŭ inŭh duwŭh puru lita.)