PINYIRUAH 14 - Hakcipta - Biatah Bidayuh

Mutas Rawŭt Bireh

¹ Komŭnŭ TUHAN nang di Moses,

² “Kidaan di daya Israel bada pari ka bibari nura Pi Hahiroth, di asah Migdol ngga Rawŭt Bireh, sindŭk Baal Zephon.

³ Raja Egypt re pikir daya Israel bigandon di gadung rais ka taru mutas tarun tana-pajam.

⁴ Aku re bada ayŭh baking, ka ayŭh re tadak angān, ka pimanang Ku ngarah raja ngga bara tibaran soldadu-i re taban bragah ka adŭp Ku. Nganŭ daya Egypt re puan nang Aku ati TUHAN.” Daya Israel ndai nimun adi mbŭh dog kidaan.

⁵ Kan raja Egypt mbŭh dog kidaan nang daya Israel mbŭh bu, ayŭh ngga bara pinurung-i ngubah pikir-i, “Ani ati ndai ta? Ata mbŭh tandah daya Israel bu, ngara adi urun ta!”

⁶ Raja bada krita kuda perang-i ngga bara soldadu-i sidia.

⁷ Ayŭh matak ngga bara adi pakai krita kuda, samŭn nŭm ratus ngara adi siabo pandai birawan, dog nguru pingubak ngara.

⁸ TUHAN bada raja baking, ka ayŭh rasu tadak bara daya Israel, adi mbŭh ruah darŭm pimanang.

⁹ Bara soldadu daya Egypt, ngga sopŭrŭg kuda ngara, krita kuda ngga bara adi tukang pimanu-i, tadak ka nyandat ngara di tarun yŭn ngara mbŭh bibari di bŭngŭn Rawŭt Bireh sindŭk Pi Hahiroth ngga Baal Zephon.

¹⁰ Kan bara daya Israel kiris raja ngga bara soldadu-i mandŭg di nyerang ngara, ngara mbŭh tikaran ka mite turung so TUHAN.

¹¹ Ngara nang di Moses, “Mating kah kubur di Egypt? Kuu mbŭh taban kieh kamati an bada kieh kabŭs di tarun tana-pajam kah? Tingga meh, ani mbŭh jadi darŭm kuu taban kieh ngga ruah so Egypt!

¹² Dŭh kah kieh muko kidaan di kuu sibayuh ata ruah so Egypt nang kayuh adi mun ati re jadi? Kieh muko kidaan di kuu bada tandah adŭ kieh jadi urun daya Egypt. Mbŭh kana dŭ nŭŭh jadi urun di Egypt so nŭŭh kabŭs digiti di tarun tana-pajam.”

¹³ Moses nam, “Dŭhnyah taru! Nyiriang simangi ngan, ka angān re kiris kayuh adi TUHAN re ndai ngga nyiramat angān di andu ati; angān dŭh re tia kiris bara daya Egypt anŭ.

¹⁴ Adŭp TUHAN re birawan yŭn ngan. Angān dŭhsah ndai ani ani.”

¹⁵ TUHAN nang di Moses, “Mani kuu mite turung? Kidaan di bara daya da masang panu.

¹⁶ Pakat sikud mu tiju rawŭt. Piin rawŭt re tipire, ka bara daya Israel re tungang panu mutas rawŭt di tunduh tana badŭh.

¹⁷ Aku re bada bara daya Egypt anŭ raru baking ndŭg ka ngara re tadak ngara mŭrŭt rawŭt, ka Aku re dapŭd bragah so pimanang Ku ngarah raja, bara soldadu-i, bara krita kuda-i, ka ngara adi pimanu krita krita kuda-i.

¹⁸ Kan Aku mbŭh ngarah ngara, daya Egypt re puan nang Aku ati TUHAN.”

¹⁹ Malaikat Tapa, adi panu diŭ di jawin bara soldadu Israel, sigen adŭp-i ka punok.Tŭngŭn abun trigen gŭh ndŭg ka-i mbŭh di

²⁰ asah bara daya Egypt ngga bara daya Israel. Abun anŭ kinarŭm daya Egypt, pak nggen jawa di daya Israel, ka so-duwŭh tibaran soldadu anŭ dŭh tungang nyindŭk dingan-i di ngarŭm anŭ.

²¹ Moses pakat tangan-i tiju rawŭt, ka TUHAN turak piin rawŭt ngga sabak adi daras so timor. Sabak anŭ poh ndi ngarŭm ngarŭm ka bada rawŭt badŭh jadi deyŭh. Rawŭt mbŭh tipire,

²² ka bara daya Israel panu mutas rawŭt di tunduh tana badŭh, ka piin adi tipire jadi keya ka sindung di so-duwŭh parad-i.

²³ Bara daya Egypt tadak ngara ka tunda ngara mŭrŭt rawŭt ngga sopŭrŭg kuda ngara samŭn krita krita kuda samŭn ngara adi pimanu krita kuda.

²⁴ Sindŭk siri jawa TUHAN tingga bara soldadu Egypt so tŭngŭn apui ngga tŭngŭn abun ka bada ngara kandang-kandŭ taru.

²⁵ Ayŭh bada kaja kaja krita kuda ngara bakŭt panu, ndŭg ka ngara mbŭh briyuh buang mbar re panu. Bara daya Egypt anŭ nang, “TUHAN mbŭh birawan ngga ata yŭn daya Israel. Ja bu so ti!”

²⁶ TUHAN nang di Moses, “Pakat tangan mu tiju rawŭt, ka piin re pari ka ngapuh bara daya Egypt ngga sopŭrŭg krita kuda ka ngara adi pimanu krita kuda.”

²⁷ Sawŭ meh Moses pakat tangan-i tiju rawŭt, ka isan isan anŭ piin mbŭh pari mun adi mbŭh. Bara daya Egypt suba bu mangān piin, pak TUHAN pirŭnggŭd ngara di rawŭt.

²⁸ Piin pari ka ngapuh krita krita kuda, bara adi pimanu krita kuda, ka sopŭrŭg bara soldadu Egypt adi tunda daya Israel ka darŭm rawŭt; ndi mating gŭh ngara dŭm.

²⁹ Pak bara daya Israel panu mutas rawŭt di tunduh tana badŭh, ngga piin di so-duwŭh parad ngara jadi keya ka sindung.

³⁰ Di andu anŭ TUHAN nyiramat daya Israel so daya Egypt, ka daya Israel kiris ngara prigure kabŭs di pang rawŭt.

³¹ Kan daya Israel kiris kuasa bās adi TUHAN pakai ngga ngarah bara daya Egypt, ngara mbŭh taru di TUHAN; ka mbŭh biyŭn pinyabah di TUHAN ka di Moses adi urun-I.