PINYIRUAH 12 - Hakcipta - Biatah Bidayuh

Gawai Paska

¹ TUHAN minyu di Moses ngga Aaron di Egypt:

² “Buran ati jadi sibungas buran darŭm sawa yŭn ngan.

³ Nggen ajar ati di barang naan daya Israel: ngga andu adi simŭng darŭm buran ati barang naan pingubak rawang dŭh siŭn dŭh an mien bait-i anak biri puan kah anak kambing yŭn rawang-i.

⁴ Kambŭi rawang-i paŭh sŭ re tungang nyidah man ndi pŭrŭng dāng anŭ, ayŭh ngga rawang adi ngga-i bisindŭk bisa kutung-i, nanyam ka kudu naan ka kiang-ki dapŭd ndi naan man.

⁵ Angān bisa mien bait-i anak biri puan kah anak kambing, pak-i dŭh siŭn dŭh an dari adi ndi sawa umbur-i buang adi pidanah.

⁶ Angān an jaga dāng anŭ ndŭg ka andu adi simŭng pat darŭm buran anŭ. Ka ngga singumi andu anŭ barang naan daya Israel an siŭ-i.

⁷ Ngara siŭn tambit kada deya dāng anŭ ka susen-i di uros tiban ka di sambu tiban ramin ngara adi yŭn ngara man dāng anŭ.

⁸ Ngarŭm anŭ dagin dāng anŭ an dog manggang ka dog man ngga dawŭn kayuh adi pa'it, ka ngga ruti adi dŭh biragi.

⁹ Dŭhnyah man dagin anŭ mata puan kah man-i dog tanŭk ngga piin, pak man-i mŭrŭng dog manggang, samŭn ubak, kaja, ka isi pŭrŭng-i.

¹⁰ Angān dŭh siŭn kidŭm-i ndŭg isan isan; kambŭi agi dŭm, angān dŭh siŭn dŭh badang-i ndŭg ka rŭpŭg.

¹¹ Angān an bigaut man buang mbŭh kibarui adŭp ngan yŭn re panu, kasut di kaja ngan, ka sikud di tangan ngan. Anŭ inŭh Gawai Paska ngga angān kibās Aku, adi TUHAN.

¹² “Ngarŭm anŭ Aku re panu kudak Egypt, siŭ barang anak pinuai dari daya Egypt samŭn anak bungas dari dāng ngara, ka ngukum sopŭrŭg tapa Egypt. Aku ati TUHAN.

¹³ Deya dāng adi susen ngan di uros uros tiban re jadi tandā ramin adi yŭn ngan rŭŭ. Kan Aku kiris deya anŭ, Aku re nandan angān ka dŭh re ngukum angān darŭm Aku panu ngukum daya Egypt.

¹⁴ Angān dŭh siŭn dŭh sita andu anŭ da jadi andu gawai adat adi jadi pingingat di angān pasar kayuh adi Aku adi TUHAN mbŭh ndai. Angān an adu adu sita-i.”

Gawai Ruti Dŭh-Biragi

¹⁵ TUHAN nang, “Yŭn Tipuh ju andu angān dŭh siŭn man ruti adi biragi, adŭ-i man anŭ adi dŭh biragi. Ngga andu adi ndi angān an taran sopŭrŭg ragi so arŭn ngan, amai kambŭi asi asi adi man ruti adi biragi darŭm tipuh ju andu anŭ, ayŭh dŭh re tia dog nyirundeng daya Ku.

¹⁶ Di andu adi ndi, ka dinge di andu adi ju, angān an tikuruk yŭn bisambah. Dŭhnyah nyiraja di andu anŭ, adŭ-i ndai pinguman ngan.

¹⁷ Sita gawai anŭ amai di andu anŭ Aku mbŭh taban tibaran-asar ngan ruah so Egypt. Angān dŭh siŭn dŭh an adu adu sita andu anŭ ngga gawai.

¹⁸ So ngga singumi andu andu adi simŭng-pat darŭm buran adi ndi ndŭg ka singumi andu andu adi duwŭh puru ndi, angān dŭh siŭn man ruti adi biragi.

^19-20 Sitadŭn ju andu ragi dŭh siŭn dog dapŭd darŭm arŭn ngan, amai asi asi so angān, bait-i daya asar puan kah daya pinami, man ruti adi biragi, ayŭh dŭh re tia dog nyirundeng daya Ku.”

Sibungas Gawai Paska

²¹ Moses bagan sopŭrŭg pinguru Israel, ka nang di ngara, “Barang naan siŭn mien ndi anak biri puan kah anak kambing ka siŭ-i, isa rawang ngan bisa sita Gawai Paska.

²² Tambit tugu hyssop ka siruman-i di makuk adi agi deya dāng dieh ka susen deya anŭ di uros tiban ka di parang sambu tiban ramin ngan. Ndi naan so angān dŭh gŭh siŭn ruah so ramin ndŭg andu sipagi.

²³ Kan TUHAN panu kudak tarun tana Egypt di siŭ bara daya Egypt, Ayŭh re kiris deya di parang ka di uros tiban, ka dŭh-I re bada Malaikat Pinyikabŭs mŭrŭt ramin ngan ka siŭ angān.

²⁴ Angān ngga bara anak ngan dŭh siŭn dŭh an adu adu tunda atur ati.

²⁵ Kan angān mŭrŭt tarun tana adi TUHAN mbŭh bijanji an nggen di angān, angān dŭh siŭn dŭh sita adat ati.

²⁶ Kan bara anak ngan siken angān, ‘Ani rati adat ati?’

²⁷ Angān nam, ‘Ati inŭh sadis Gawai Paska ngga kibās TUHAN, sabab Ayŭh mbŭh nandan ramin ramin daya Israel di Egypt. Ayŭh siŭ bara daya Egypt, pak ata Ayŭh dŭh siŭ.’ ” Bara daya Israel sidikang ka nyambah.

²⁸ Jadi ngara di ka ndai nanyam adi TUHAN mbŭh pesan di Moses ngga Aaron.

Pinyikabŭs Anak Pinuai

²⁹ Ngga sitŭrŭp ngarŭm TUHAN siŭ sopŭrŭg anak pinuai dari di Egypt, piguru so anak pinuai dari adŭp raja adi jadi pimunān raja, ndŭg ka anak dari daya-takap adi di darŭm gerok; sopŭrŭg anak bungas dāng dog siŭ gŭh.

³⁰ Ngarŭm anŭ, raja ngga bara pinurung-i ngga sopŭrŭg daya Egypt adi bŭkŭn mbŭh abo burah. Mbŭh agi sien bana di ndi tarun tana Egypt, sabab di barang ramin adi agi anak dari agi gŭh anak dari kabŭs.

³¹ Di ngarŭm anŭ gŭh raja bagan Moses ngga Aaron ka nang, “Bu so ti angān ngga bara daya Israel ngan! Bu so rais ati; bu di nyambah TUHAN, nimun adi ko angān mite.

³² Taban bara biri, kambing ngga sapi ngan ka bu. Bidua gŭh mite berkat yŭn aku.”

³³ Bara daya Egypt ngasu bara daya Israel rikas bu tingge rais ngara; ngara nang, “Sopŭrŭg ami re kabŭs kambŭi angān dŭh bu.”

³⁴ Jadi ngara ngisi kuari ngga tibaduk dŭh biragi, marut ngga banang ka na di kawin ngara.

³⁵ Bara daya Israel ndai nanyam adi Moses ko kidaan, ngara mite mas, pirak samŭn dudu piraka so bara daya Egypt.

³⁶ TUHAN bada bara daya Egypt stabi di ngara ka nggen tadŭ tadŭ kayuh adi ngara mite. Simŭnŭ inŭh daya Israel taban ngga bu pinyikaya daya Egypt.

Bara Daya Israel Bu so Egypt

³⁷ Bara daya Israel makat bidayŭh bu so Rameses di ka Sukkoth. Kurang rabis agi 600,000 naan dari, dŭh ngitong bara dayung ngga anak-anya.

³⁸ Agi gŭh bara bara daya bŭkŭn taban biri, kambing, ka sapi matak ngga ngara.

³⁹ Ngara ndai ruti adi dŭh biragi so tibaduk adi ngara taban so Egypt, amai ngara dog pibu so Egypt ngga bigaut, ndŭg ka ngara mbŭh dŭh sipŭt sidia pinguman puan kah ndai tibaduk adi biragi.

⁴⁰ Daya Israel rŭŭ di Egypt sitŭkŭd 430 sawa.

⁴¹ Di andu 430 sawa anŭ mbŭh ripuan, sopŭrŭg tibaran-asar daya TUHAN mbŭh bu so Egypt.

⁴² Anŭ inŭh ngarŭm adi ngga TUHAN bijaga amai taban ngara ruah so Egypt; ngarŭm anŭ gŭh mbŭh dog nitah adu adu yŭn TUHAN adi ngga daya Israel dŭh siŭn dŭh an bijaga.

Atur-adat Yŭn Gawai Paska

⁴³ TUHAN nang di Moses ngga Aaron, “Ati inŭh atur-adat yŭn Gawai Paska: Daya bangsa bŭkŭn dŭh siŭn sua man pinguman Gawai Paska.

⁴⁴ Pak tadŭ tadŭ urun adi angān muko miris bisa sua man kambŭi angān muko diŭ nyunat ayŭh.

⁴⁵ Daya adi rŭŭ nupang puan kah adi man gaji dŭh gŭh bisa sua man.

⁴⁶ Sopŭrŭg pinguman anŭ dŭh siŭn dŭh dog man di darŭm ramin adi yŭn-i muko dog sidia, ka dŭh bisa dog taban ka sapa, ka dŭhnyah mata tadŭ tadŭ turang dāng anŭ.

⁴⁷ Barang naan daya Israel dŭh siŭn dŭh sita gawai ati.

⁴⁸ Pak dari adi dŭh dog nyunat taŭn dŭh bisa sua man. Kambŭi agi daya so bangsa bŭkŭn adi mbŭh sua rŭŭ di ruang ngan, ka raan sua sita Gawai Paska yŭn stabi di TUHAN, angān dŭh siŭn dŭh diŭ nyunat sopŭrŭg anak dari adi agi di rawang-i. Ayŭh bisa dog bada jadi keya ka daya asar Israel, ka bisa sua sita gawai anŭ.

⁴⁹ Atur-adat ati inŭh yŭn daya asar Israel ka yŭn daya adi so bangsa bŭkŭn adi sua rŭŭ di ruang ngan.”

⁵⁰ Sopŭrŭg daya Israel tunda ka ndai sopŭrŭg kayuh adi TUHAN ko pesan di Moses ngga Aaron.

⁵¹ Di andu anŭ TUHAN taban tibaran tibaran-asar Israel ngga ruah so Egypt.