PINYIRUAH 11 - Hakcipta - Biatah Bidayuh

Moses Nggen Puan pasar Pinyikabŭs Anak Pinuai

¹ Komŭnŭ TUHAN nang di Moses, “Aku re pait dŭm ndi sidah adŭ ukum di raja Egypt ngga di bara daya-i. Ripas anŭ ayŭh re bada angān ruah so rais-i. Sibandar-i ayŭh re pibu sopŭrŭg ngan so tarun ati.

² Jadi madin, minyu ngga sopŭrŭg daya Israel ka kidaan di sopŭrŭg ngara da mite so bara rasū ngara pimakai mas ngga pirak.”

³ TUHAN bada bara daya Egypt stabi di bara daya Israel. Sawŭ, bara pinurung raja ngga sopŭrŭg daya nyirundeng Moses daya adi raru bās.

⁴ Komŭnŭ Moses nang di raja, “TUHAN nang, ‘Ngga arong sitŭrŭp ngarŭm Aku re kudak Egypt,

⁵ ka barang naan anak pinuai dari di Egypt re kabŭs, piguru so anak dari adŭp raja adi jadi pimunān raja, ndŭg ka anak dari dayung urun adi ngisar gandom. Anak bungas sopŭrŭg dāng kudip re kabŭs gŭh.

⁶ Re agi sien bana di ndi tarun tana Egypt; gi-bŭn-i mun anŭ ka dŭh-i re tia.

⁷ Pak di dupan daya Israel mating ani ani har, bait-i kasong ngakang daya Israel puan kah ngakang dāng ngara. Simŭnŭ meh kuu re puan nang Aku adi TUHAN adi ndai pingatŭn di asah daya Egypt ngga daya Israel.’ ”

⁸ Ngga kubo pinganang-i Moses nang, “Sopŭrŭg pinurung mai re di ka aku ka re mutu ubak ngara ka aku, ka ngara re mite aku taban sopŭrŭg daya ku ngga bu. Ripas anŭ, aku re bu.” Ka Moses bu so yŭn raja ngga atin adi raru tuas.

⁹ TUHAN mbŭh nang di Moses, “Raja re babŭ dŭh raan dingah pinganang mu, isa Aku bisa nambah pingandai-nginga Ku di Egypt.”

¹⁰ Moses ngga Aaron ndai sopŭrŭg pingandai-nginga anŭ di sirung jawin raja, pak TUHAN bada ayŭh baking ka abah-i bada daya Israel ruah so rais-i.