PINYIKIANG 33 - Hakcipta - Biatah Bidayuh

Pimanu So Egypt di ka Moab

¹ Ati dundan pasar tarun tarun adi yŭn bara daya Israel bibari ripas ngara mbŭh ruah so Egypt nanyam ka tibaran tibaran-asar ngara di ribo pinguru Moses ngga Aaron.

² Nimun adi TUHAN mbŭh pesan, Moses nuris dŭn tarun tarun anŭ niap saba ngara pijog bari.

³ Daya Israel bu so Egypt di andu adi simŭng-rimŭh darŭm sibungas buran, andu adi ripas sibungas Gawai Paska. Di ribo pinyigrindung TUHAN ngara bu tingge kupo Rameses di sirung jawin bara daya Egypt,

⁴ adi aŭn kubur bara anak-pinuai dari ngara adi TUHAN mbŭh siŭ. Darŭm ndai simŭnŭ TUHAN kiren adŭp-I rabis bikuasa so bara tapa Egypt.

⁵ Daya Israel bu tingge Rameses ka bibari di Sukkoth.

⁶ Ripas anŭ ngara bibari di Etham di bŭngŭn tarun tana-pajam.

⁷ So nŭ ngara pari ka Pi Hahiroth, tura ka timor Baal Zephon, ka bibari sindŭk Migdol.

⁸ Ngara bu so Pi Hahiroth ka mutas Rawŭt Bireh di ka tarun tana-pajam Shur. Ripas taruh andu bigandon ngara bibari di Marah.

⁹ So nŭ ngara di ka Elim, di yŭn ngara bibari, sabab diginŭ agi simŭng duwŭh rubang piin ka ju puru tŭngŭn kurma.

¹⁰ Ngara bu so Elim ka bibari sindŭk Tanjung Suez.

¹¹ Ripas anŭ ngara bibari di tarun tana-pajam Sin.

¹² Komŭnŭ ngara bibari di Dophkah,

¹³ ka ripas anŭ di Alush.

¹⁴ Komŭnŭ di Rephidim, di yŭn mating piin re ngara nok.

^15-37 So Rephidim ndŭg Darŭd Hor ngara bibari di tarun tarun ati: tarun tana-pajam Sinai, Kibroth Hattaavah (puan kah “Kubur bara daya adi kirarŭn”), Hazeroth, Rithmah, Rimmon Perez, Libnah, Rissah, Kehelathah, Darŭd Shepher, Haradah, Makheloth, Tahath, Terah, Mithkah, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, tarun tana-pajam Zin (anŭ inŭh, Kadesh), ka Darŭd Hor, di bŭngŭn tarun tana Edom.

^38-39 Nimun TUHAN ko pesan, imam Aaron maad Darŭd Hor. Kan umbur-i mbŭh 123 sawa ayŭh kabŭs diginŭ andu adi ndi darŭm buran rimŭh darŭm sawa adi pat puru ripas bara daya Israel ruah so Egypt.

⁴⁰ Raja di Arad di siratan Canaan dingah bara daya Israel mandŭg.

^41-49 So Darŭd Hor ndŭg rabak Moab bara daya Israel ndai bari ngara di tarun tarun ati: Zalmonah, Punon, Oboth, tibawang Abarim di tarun tana Moab, Dibon Gad, Almon Diblathaim, tarun tana Darŭd Abarim sindŭk Darŭd Nebo ka di rabak tarun tana Moab di pah mandi Yang Jordan bistatang ngga Jericho, di asah Beth Jeshimoth ngga Rubān Acacia.

Atur Diŭ so Mutas Yang Jordan

⁵⁰ Diginŭ di rabak Moab di pah mandi Yang Jordan bistatang ngga Jericho TUHAN nggen di Moses

⁵¹ atur ati: “Kan angān mutas Yang Jordan mŭrŭt tarun tana Canaan,

⁵² angān dŭh siŭn dŭh pibu sopŭrŭg daya adi rŭŭ di tarun tana anŭ. Pirusak sopŭrŭg tibudo batuh ngga tibudo basi ngara samŭn sopŭrŭg tarun yŭn ngara bisambah.

⁵³ Ngisi tarun tana anŭ ka rŭŭ diginŭ, sabab Aku nggen-i di angān.

⁵⁴ Kutung tarun tana anŭ dupan tibaran tibaran-asar ngga manak manak pakai dadu. Nggen utung baga di manak adi baga, ka utung siit di manak adi siit.

⁵⁵ Pak kambŭi angān dŭh pibu daya adi rŭŭ diginŭ, ngara anŭ adi dŭm diginŭ re jadi pinyusah keya ka taŭn di batuh ngan ka reja di tigang ngan, ka re makat rawan angān.

⁵⁶ Kambŭi angān dŭh pibu ngara, Aku re pirabur angān, nimun Aku mbŭh sidia an pirabur ngara.”