PINYIKIANG 30 - Hakcipta - Biatah Bidayuh

Atur pasar Payu

¹ Moses nggen atur ati di bara pinguru tibaran-asar Israel.

² Kan daya bipayu an nggen kayuh di TUHAN puan kah bipayu pijo adŭp-i so ndi masam kayuh, ayŭh dŭh siŭn kadong janji-i, pak dŭh siŭn dŭh ndai nanyam adi muko-i nang.

³ Kambŭi ndi naan dayung adi gi-mara adi gibabŭ udip rŭŭ di ramin sama-i, bipayu an nggen kayuh di TUHAN puan kah bipayu pijo adŭp-i so ndi masam kayuh,

⁴ ayŭh dŭh siŭn dŭh ndai sopŭrŭg-i nanyam payu puan kah nanyam janji-i kambŭi sama-i puan ayŭh agi ndai simŭnŭ ka dŭh gŭh kijaman.

⁵ Pak kambŭi sama-i kijaman ayŭh sita payu anŭ kan ayŭh puan, dayung anŭ bisa dŭhsah sita-i. TUHAN re apun ayŭh, amai sama-i abah bada ayŭh sita-i.

⁶ Kambŭi dayung adi dŭh banan agi bipayu, singaja puan kah nyimau, puan kah bijanji pijo adŭp-i so ndi masam kayuh, komŭnŭ ka-i banan

⁷ dayung anŭ dŭh siŭn dŭh ndai nimun adi ayŭh mbŭh bipayu puan kah mbŭh bijanji kambŭi banŭh-i puan ayŭh agi ndai simŭnŭ ka dŭh gŭh kijaman.

⁸ Pak kambŭi banŭh dayung anŭ kijaman ayŭh pijadi payu-i kan ayŭh puan, dayung anŭ bisa dŭhsah sita-i. TUHAN re apun ayŭh.

⁹ Dayung uban, puan kah adi mbŭh birakang ngga banŭh-i dŭh siŭn dŭh sita payu-i puan kah janji-i adi pijo adŭp-i so ndi masam kayuh.

¹⁰ Kambŭi dayung adi mbŭh banan bipayu puan kah bijanji pijo adŭp-i so ndi masam kayuh,

¹¹ ayŭh dŭh siŭn dŭh ndai sopŭrŭg-i adi ayŭh bipayu re ndai puan kah bijanji re ndai, kambŭi banŭh-i dŭh kijaman kan ayŭh puan.

¹² Pak kambŭi banŭh-i kijaman ayŭh sita payu-i kan ayŭh puan, ayŭh bisa dŭhsah sita-i. TUHAN re apun ayŭh, amai banŭh-i kijaman ayŭh sita-i.

¹³ Banŭh-i biyŭn hak natu bait kadi tadŭ tadŭ payu puan kah janji adi ayŭh ndai.

¹⁴ Pak kambŭi banŭh-i dŭh kijaman, di andu ayŭh puan, dayung anŭ dŭh siŭn dŭh ndai sopŭrŭg-i nanyam adi mbŭh-i bipayu puan kah bijanji. Banŭh-i mbŭh natu payu anŭ darŭm-i dŭh kijaman di andu ayŭh puan.

¹⁵ Pak kambŭi banŭh-i kadi payu anŭ sundis andu, banŭh-i re dapu tanggong kan payu anŭ dŭh dog sita.

¹⁶ Anŭ inŭh atur-adat adi TUHAN mbŭh nggen di Moses jeja ka payu adi dog ndai dayung adi dŭh banan adi udip rŭŭ di ramin sama-i, puan kah dog ndai dayung adi mbŭh banan.