PINYIKIANG 3 - Hakcipta - Biatah Bidayuh

Anak Anak Aaron

¹ Ati inŭh rawang Aaron ngga Moses di tika TUHAN minyu ngga Moses di Darŭd Sinai.

² Aaron biyŭn pat madis anak dari: Nadab, adi pinuai, Abihu, Eleazar, ka Ithamar.

³ Ngara mbŭh dog nginyo ka dog garar jadi imam,

⁴ pak Nadab ngga Abihu dog siŭ kan ngara jugan apui adi dŭh kudus ka TUHAN di Tarun tana-pajam Sinai. Ngara dŭh biyŭn anak, jadi Eleazar ngga Ithamar meh jadi imam di jaman Aaron.

Daya Levi dog Tijuan jadi Tukang Batu bara Imam

⁵ TUHAN nang di Moses,

⁶ “Taban kamati tibaran-asar Levi ka tijuan ngara bada jadi tukang batu Aaron adi imam.

⁷ Ngara re nyiraja di Bari Ku ka ndai kraja ngara yŭn bara imam ka gŭh yŭn sopŭrŭg daya Israel.

⁸ Ngara re nguasa sopŭrŭg pingakas di darŭm Bari Ku ka ndai kraja yŭn sopŭrŭg daya Israel.

⁹ Kaŭs kraja daya Levi inŭh batu Aaron ngga anak anak-i.

¹⁰ Kuu siŭn tijuan Aaron ngga anak anak-i da ndai kraja imam; tadŭ tadŭ daya bŭkŭn adi suba an ndai kraja imam re dog ukum kabŭs.”

¹¹ TUHAN nang di Moses,

^12-13 “Madin daya Levi mbŭh tung jaku. Di tika Aku siŭ bara anak pinuai daya Egypt, Aku nyikudus yŭn adŭp Ku anak pinuai dari di barang rawang daya Israel, samŭn anak bungas barang masam dāng kudip. Pak madin Aku tambit daya Levi jadi tung jaku ngga gati anak anak pinuai dari daya Israel; daya Levi re jadi tung jaku. Aku ati TUHAN.”

Pimirang daya Levi

¹⁴ Di Tarun tana-pajam Sinai TUHAN pesan Moses

¹⁵ da pibŭrŭt dŭn dŭn daya Levi nanyam ka manak ngga rawang, tambit dŭn barang naan anak dari adi mbŭh ndi buran umbur-i puan kah rabis so anŭ,

¹⁶ ka Moses sawŭ ndai simŭnŭ.

^17-20 Levi biyŭn taruh madis anak dari: Gershon, Kohath, ka Merari, adi tayung-babuk manak manak adi tarik dŭn ngara. Gershon biyŭn duwŭh madis anak dari: Libni ngga Shimei; Kohath biyŭn pat madis anak dari: Amram, Izhar, Hebron, ka Uzziel; ka Merari biyŭn duwŭh madis anak dari: Mahli ngga Mushi. Ngara inŭh tayung-babuk manak manak adi tarik dŭn ngara.

²¹ Manak Gershon inŭh rawang rawang Libni ngga Shimei.

²² Prungun bara dari adi ndi buran umbur-i puan kah rabis, adi dog nuris dŭn-i inŭh 7,500.

²³ Manak ati siŭn bibari di tura ka barat di punok Bari TUHAN,

²⁴ ngga Eliasaph anak Lael adi jadi pingubak manak anŭ.

²⁵ Ngara inŭh dapu tanggong di Bari TUHAN, sindung adi tura ka darŭm, sindung adi tura ka sapa, tabir tiban,

²⁶ tabir yŭn badag adi maning Bari TUHAN ngga mija-sambah, ka tabir tiban badag. Ngara inŭh adi dapu tanggong di sopŭrŭg kraja pingandai adi bigagit ngga kayuh kayuh anŭ.

²⁷ Manak Kohath inŭh bara rawang Amram, Izhar, Hebron, ka Uzziel.

²⁸ Prungun bara anak dari adi ndi buran umbur-i puan kah rabis, adi dog nuris dŭn-i inŭh 8,600.

²⁹ Manak ati siŭn bibari di tura ka siratan Bari TUHAN,

³⁰ ngga Elizaphan anak Uzziel adi jadi pingubak-i.

³¹ Ngara dapu tanggong di Pati Simanya, mija, rika prita, mija mija-sambah, pingakas pingakas adi imam pakai di Yŭn Kudus, ka tabir adi di tiban Yŭn adi Siabo Kudus. Ngara inŭh adi dapu tanggong di sopŭrŭg kraja pingandai adi bigagit ngga kayuh kayuh anŭ.

³² Pingubak daya Levi inŭh Eleazar anak imam Aaron. Ayŭh inŭh adi jaga ngara adi ndai kraja di Yŭn Kudus.

³³ Manak Merari inŭh rawang Mahli ngga Mushi.

³⁴ Prungun bara dari adi ndi buran umbur-i puan kah rabis, adi mbŭh dog nuris dŭn-i inŭh 6,200.

³⁵ Manak ati siŭn bibari tura ka utara Bari TUHAN, ngga Zuriel adi anak Abihail jadi pingubak-i.

³⁶ Ngara mbŭh dog tijuan bada dapu tanggong di sibukah Bari TUHAN, dudu parang, tiang, bangan, ka sopŭrŭg pingakas-i. Ngara inŭh adi dapu tanggong di sopŭrŭg kraja pingandai adi bigagit ngga kayuh kayuh anŭ.

³⁷ Ngara gŭh dapu tanggong di dudu tiang, bangan, pagu, ka taris yŭn badag sapa.

³⁸ Moses ngga Aaron ka anak anak dari-i siŭn bibari di jawin Bari TUHAN tura ka timor. Ngara inŭh adi dapu tanggong di simayang adi dog ndai darŭm Yŭn Kudus yŭn bara daya Israel. Tadŭ tadŭ daya bŭkŭn adi suba an ndai simŭnŭ patut dog ukum kabŭs.

³⁹ Prungun bara anak dari daya Levi adi ndi buran umbur-i puan kah rabis adi Moses mbŭh nuris dŭn ngara nanyam ka tibaran manak nunda ka pesan TUHAN inŭh 22,000.

Daya Levi Gati bara Anak Pinuai Israel

^40-41 TUHAN nang di Moses, “Sopŭrŭg anak pinuai dari daya Israel inŭh tung jaku. Sabab anŭ, pibŭrŭt dŭn dŭn barang naan anak pinuai dari daya Israel, adi ndi buran umbur-i puan kah rabis. Pak ngga gati ngara Aku ngaku sopŭrŭg daya Levi yŭn adŭp Ku! Aku ati TUHAN! Aku ngaku gŭh dāng kudip daya Levi ngga gati sopŭrŭg anak bungas dāng kudip daya Israel.”

⁴² Moses ndai nanyam adi mbŭh dog kidaan, ka pibŭrŭt dŭn dŭn sopŭrŭg anak pinuai dari

⁴³ adi ndi buran umbur-i bait rabis. Prungun-i mbŭh 22,273.

⁴⁴ TUHAN nang di Moses,

⁴⁵ “Madin nitah daya Levi yŭn Ku ngga gati sopŭrŭg anak pinuai dari daya Israel, ka nitah dāng kudip daya Levi ngga gati anak bungas dāng kudip daya Israel.

⁴⁶ Amai anak anak pinuai daya Israel bagŭ, agi-i 273 naan bagŭ dŭ so anak pinuai daya Levi, angān dŭh siŭn dŭh miris pari rabis-i.

⁴⁷ Yŭn barang naan ngara bayar rimŭh kiping pirak, nanyam ka anŭ adi dog miratak di Bari TUHAN,

⁴⁸ ka nggen duit anŭ di Aaron ngga anak anak dari-i.”

⁴⁹ Moses ndai nimun adi mbŭh dog kidaan ka tambit

⁵⁰ 1,365 kiping pirak

⁵¹ ka nggen-i di Aaron ngga anak anak dari-i.