PINYIKIANG 26 - Hakcipta - Biatah Bidayuh

Pimirang Saba adi Duwŭh

¹ Ripas sesak-andam anŭ TUHAN nang di Moses ngga Eleazar anak dari Aaron,

² “Ndai pimirang nanyam ka rawang yŭn sopŭrŭg daya Israel, yŭn sopŭrŭg dari adi umbur duwŭh puru sawa bait adi tuuh so anŭ adi tungang jadi soldadu.”

^3-4 Moses ngga Eleazar tunda pinganang TUHAN ka nguruk sopŭrŭg dari adi umbur duwŭh puru ngga ka sambu. Ngara tikuruk di rabak Moab di pah mandi Yang Jordan bistatang ngga Jericho. Ngara ati inŭh daya daya Israel adi mbŭh ruah so Egypt:

⁵ Tibaran-asar Reuben (Reuben inŭh anak pinuai dari Jacob): bara manak Hanoch, Pallu,

⁶ Hezron ngga Carmi.

⁷ Kiang bara manak anŭ agi 43,730 naan dari.

⁸ Bara sesang Pallu inŭh Eliab,

⁹ ngga bara anak dari-i Nemuel, Dathan ka Abiram. (Dathan ngga Abiram inŭh dog mien sopŭrŭg daya Israel. Ngara rawan ngamun Moses ngga Aaron, ka tunda bara pinunda Korah kan ngara rawan TUHAN.

¹⁰ Tana tipire ka tŭrŭn ngara, ka ngara kabŭs samah ngga Korah ngga bara pinunda-i kan apui badang 250 naan ngara adi dari. Kayuh anŭ mbŭh jadi pinyibakan yŭn daya bagŭ.

¹¹ Pak bara anak dari Korah dŭh dog siŭ.)

¹² Tibaran-asar Simeon: bara manak Nemuel, Jamin, Jachin,

¹³ Zerah, ka Shaul.

¹⁴ Kiang bara manak ati agi 22,200 naan dari.

¹⁵ Tibaran-asar Gad: bara manak Zephon, Haggi, Shuni,

¹⁶ Ozni, Eri,

¹⁷ Arod, ka Areli.

¹⁸ Kiang bara manak ati agi 40,500 naan dari.

^19-21 Tibaran-asar Judah: bara manak Shelah, Perez, Zerah, Hezron, ka Hamul. (Duwŭh madis anak dari Judah, Er ngga Onan, mbŭh kabŭs di tarun tana Canaan.)

²² Kiang bara manak ati agi 76,500 naan dari.

²³ Tibaran-asar Issachar: bara manak Tola, Puah,

²⁴ Jashub, ka Shimron.

²⁵ Kiang bara manak ati agi 64,300 naan dari.

²⁶ Tibaran-asar Zebulun: bara manak Sered, Elon, ka Jahleel.

²⁷ Kiang bara manak ati agi 60,500 naan dari.

²⁸ Tibaran-asar Joseph, adi sama duwŭh madis anak dari, Manasseh ngga Ephraim.

²⁹ Tibaran-asar Manasseh. Machir anak dari Manasseh inŭh sama Gilead, ka bara manak ati tarik asar ngara so Gilead:

³⁰ bara manak Iezer, Helek,

³¹ Asriel, Shechem,

³² Shemida, ka Hepher.

³³ Zelophehad anak dari Hepher, dŭh biyŭn anak dari, pak bara anak dayung adŭ. Dŭn ngara inŭh Mahlah, Noah, Hoglah, Milcah, ka Tirzah.

³⁴ Kiang bara manak ati agi 52,700 naan dari.

³⁵ Tibaran-asar Ephraim: bara manak Shuthelah, Becher, ngga Tahan.

³⁶ Bara manak Eran tarik asar ngara so Shuthelah.

³⁷ Kiang bara manak ati agi 32,500 naan dari. Anŭ inŭh bara manak adi sesang Joseph.

³⁸ Tibaran-asar Benjamin: bara manak Bela, Ashbel, Ahiram,

³⁹ Shephupham, ngga Hupham.

⁴⁰ Bara manak Ard ngga Naaman tarik asar ngara so Bela.

⁴¹ Kiang bara manak ati agi 45,600 naan dari.

⁴² Tibaran-asar Dan: adi manak Shuham,

⁴³ kiang ngara ati agi 64,400 naan dari.

⁴⁴ Tibaran-asar Asher: bara manak Imnah, Ishvi, ngga Beriah.

⁴⁵ Bara manak Heber ngga Malchiel tarik asar ngara so Beriah.

⁴⁶ Asher biyŭn ndi anak dayung dŭn Serah.

⁴⁷ Kiang bara manak ati agi 53,400 naan dari.

⁴⁸ Tibaran-asar Naphtali: bara manak Jahzeel, Guni,

⁴⁹ Jezer, ngga Shillem.

⁵⁰ Prungun bara manak anŭ agi 45,400 naan dari.

⁵¹ Jadi prungun bara dari daya Israel agi 601,730 naan.

⁵² TUHAN nang di Moses,

⁵³ “Kutung tarun tana yŭn barang tibaran-asar, nanyam ka kiang kudu naan darŭm ndi tibaran.

^54-56 Kutung tana anŭ pakai dadu, ka nggen baga utung di tibaran adi baga, ka sŭ utung di tibaran adi sŭ.”

⁵⁷ Tibaran-asar Levi inŭh bara manak Gershon, Kohath, ka Merari.

⁵⁸ Bara sesang ngara yŭh gŭh bara anak manak Libni, Hebron, Mahli, Mushi, ka Korah. Kohath inŭh sama Amram,

⁵⁹ adi tambit Jochebed anak dayung Levi ndu sawŭn, adi dog biranak di Egypt. Jochebed biranak yŭn Amram duwŭh madis anak dari, Aaron ngga Moses, ka ndi anak dayung dŭn Miriam.

⁶⁰ Aaron biyŭn pat madis anak dari, Nadab, Abihu, Eleazar, ngga Ithamar.

⁶¹ Nadab ngga Abihu kabŭs kan ngara jugan apui adi dŭh kudus ka TUHAN.

⁶² Bara anak dari daya Levi adi umbur ndi buran ngga ka sambu, kiang ngara agi 23,000 naan. Ngara dog mirang sidŭrŭ so bara daya Israel adi bŭkŭn, amai ngara dŭh dog nggen buat-rata di Israel.

⁶³ Sopŭrŭg manak anŭ mbŭh dog mirang Moses ngga Eleazar di tika ngara ndai pimirang yŭn bara daya Israel di rabak Moab di pah mandi Yang Jordan bistatang ngga Jericho.

⁶⁴ Ndi naan mating gŭh dari dŭm so sinadan ngara anŭ adi Moses ngga Aaron muko pibŭrŭt di sibungas pimirang adi dog ndai di tarun tana-pajam di Sinai.

⁶⁵ TUHAN mbŭh nang sopŭrŭg ngara anŭ taŭn re kabŭs di tarun tana-pajam, adŭ-i Caleb anak dari Jephunneh ngga Joshua adi anak dari Nun adi babŭ udip.