PINYIKIANG 25 - Hakcipta - Biatah Bidayuh

Daya Israel di Darŭd Peor

¹ Kan bara daya Israel mbŭh pijog bari ngara di gadung Rubān Acacia, bara dari ngara mbŭh piguru ndai pingandai kais ngga bara dayung daya Moab adi agi diginŭ.

² Bara dayung anŭ bagan ngara ka gawai sadis adi yŭn tapa daya Moab dog nyambah. Daya daya Israel sua man pinguman ngara ka sua nyambah tapa

³ Baal di Peor. Jadi TUHAN mbŭh baji di ngara,

⁴ ka nang di Moses, “Tambit sopŭrŭg pinguru Israel ka siŭ ngara darŭm jawa sandu, ka komŭnŭ Aku re dŭh tia baji di bara daya.”

⁵ Moses nang di bara akim anŭ, “Barang naan angān an siŭ barang naan daya di tibaran-asar ngan adi mbŭh nyambah Baal di Peor.”

⁶ Ndi naan so daya Israel taban dayung daya Midian ngga mŭrŭt bari adŭp-i ka mbŭh giranan dog kiris Moses ngga sopŭrŭg daya Israel, atan ngara gibabŭ ngurid di tiban Bari TUHAN.

⁷ Kan Phinehas, anak dari Eleazar ka sukuh Aaron adi mbŭh jadi imam, kiris kayuh anŭ, ayŭh makat ka bu tingge uruk daya bagŭ. Ayŭh tambit ndi jarok,

⁸ tunda dari ngga dayung anŭ ka darŭm bari ka tabŭk so-duwŭh ngara anŭ ngga jarok. Simŭnŭ inŭh sesak-andam adi pirabur daya Israel dog pirŭŭ,

⁹ pak mbŭh agi 24,000 naan daya kabŭs bada-i.

¹⁰ TUHAN nang di Moses,

¹¹ “Sabab kayuh adi Phinehas mbŭh ndai, Aku dŭh tia baji di daya Israel. Ayŭh dŭh raan tandah daya nyambah tapa adi bŭkŭn adŭ-i Aku, anŭ sabab Aku dŭh pirabur ngara darŭm baji Ku.

¹² Jadi kidaan di Phinehas nang Aku ndai simanya ngga ayŭh adi re adu adu dog ingat.

¹³ Ayŭh ngga bara sesang-i re adu adu jadi imam, amai ayŭh dŭh an tandah Israel nyambah tapa adi bŭkŭn so Aku, buang mbŭh ndai aran yŭn pingapun dosa bara daya.”

¹⁴ Dŭn dari daya Israel anŭ adi dog siŭ ngga dayung daya Midian inŭh Zimri anak dari Salu, adi pingubak rawang darŭm tibaran-asar Simeon.

¹⁵ Dŭn dayung anŭ inŭh Cozbi. Zur, sama-i, inŭh pingubak ndi tibaran so manak daya Midian.

¹⁶ TUHAN pesan Moses,

¹⁷ “Nyerang daya Midian ka siŭ sopŭrŭg ngara,

¹⁸ amai arap adi ngara ndai di angān kan ngara nipu angān di Peor, ka sabab Cozbi, adi dog siŭ di tipuh sesak-andam anŭ di Peor.”