PINYIKIANG 22 - Hakcipta - Biatah Bidayuh

Raja daya Moab Bagan Balaam

¹ Bara daya Israel pijuu pimanu ngara ka bibari di rabak Moab tura ka timor Yang Jordan, bistatang ngga Jericho.

² Kan raja daya Moab, Balak anak Zippor, dingah kayuh adi daya Israel mbŭh ndai di daya Amor ka munki masam bagŭ-i daya Israel,

³ ayŭh ngga sopŭrŭg daya-i mbŭh jadi taru.

⁴ Bara daya Moab nang di bara pinguru daya Midian, “Dudu bara daya ati re rikas mandŭg di pirusak sopŭrŭg kayuh adi maning ata, keya ka dari sapi man kupai di tarun tana kupai.” Jadi Raja Balak

⁵ pait pinyisung bada bagan Balaam anak Beor, adi agi di Pethor sindŭk Yang Euphrates di tarun tana Amaw. Ngara taban ka ayŭh pinganang ati so Balak: “Aku raan kuu puan nang ndi bangsa bangsa mbŭh mandŭg so Egypt; daya-i mbŭh papah barang ka yŭn-i ka raan tambit tana ami.

⁶ Ngara mbŭh raru bagŭ so kieh, ngapŭi turung mandŭg ka mangu ngara yŭn ku. Komŭnŭ kadŭ kieh tungang ngarah ka pibu ngara so tana ami. Aku puan nang kan kuu nyiberkat daya, daya anŭ dapŭd berkat; ka kan kuu mangu daya, daya anŭ dog nyatŭk pangu.”

⁷ Jadi pinguru daya Moab ngga Midian taban duit upah ngga bayar pangu anŭ, di ka yŭn Balaam, ka nggen di ayŭh pinganang Balak.

⁸ Balaam nang di ngara, “Nyirŭmŭn ngarŭm ati digiti, ka sipagi aku re kidaan di angān ani bait ani adi TUHAN kidaan di aku.” Jadi bara pinguru daya Moab nyirŭmŭn di ramin Balaam.

⁹ Tapa mandŭg tudu Balaam ka siken, “Asi ngara ati adi nyirŭmŭn di ramin mu?”

¹⁰ Ayŭh nam, “Raja Balak so Moab mbŭh pait ngara bada kidaan di aku

¹¹ nang bara daya adi mandŭg so Egypt mbŭh agi di barang ka yŭn-i. Ayŭh mite aku mangu ngara yŭn adŭp-i, isa ayŭh tungang rawan ka pibu ngara so tana-i.”

¹² Tapa nang di Balaam. “Dŭhnyah tunda ngara, ka dŭhnyah mangu daya Israel, amai ngara mbŭh dapŭd berkat so Aku.”

¹³ Isan isan andu jawa ndi, Balaam di ka yŭn bara pinyisung Balak ka nang, “Pari adŭ angān; TUHAN dŭh raan bada aku sua ngga angān.”

¹⁴ Jadi ngara pari ka yŭn Balak ka kidaan di ayŭh nang Balaam abah sua mandŭg ayō ngara.

¹⁵ Komŭnŭ Balak pait rabis bagŭ bara pinguru adi rabis bās dŭ pangkat so ngara anŭ adi diŭ tejah.

¹⁶ Ngara di ka yŭn Balaam ka nggen di ayŭh pinganang so Balak: “Turung dŭhnyah bada tadŭ kayuh matŭn kuu mandŭg ka yŭn ku!

¹⁷ Aku re nggen di kuu bagŭ upah ka ndai tadŭ kayuh adi kuu mite. Turung mandŭg ka mangu bara daya anŭ yŭn ku.”

¹⁸ Pak Balaam nam, “Sunggu kambŭi Balak nggen di aku sopŭrŭg pirak ngga mas adi darŭm istana-i, aku dŭh bisa nyibireu pesan TUHAN adi Tapa ku, pasar har adi siabo sŭ bait kani.

¹⁹ Pak turung nyirŭmŭn digiti, nimun ngara anŭ adi bŭkŭn, isa aku bisa puan nang agi puan kah mating kayuh adi TUHAN an kidaan di aku.”

²⁰ Ngarŭm anŭ Tapa mandŭg ka yŭn Balaam ka nang, “Kambŭi bara daya anŭ mbŭh mandŭg an mite kuu tunda adŭp-i, sidia adŭp mu ka di, pak ndai anŭ adi Aku bada kuu ndai adŭ.”

²¹ Jadi isan isan andu jawa ndi Balaam na tapas-pinyiguru di tunduh kaldi-i ka matak samah bara pinguru daya Moab.

Balaam ngga Kaldi-I

²² Tapa mbŭh tuas nang Balaam sah di, ka darŭm Balaam panu nunggang kaldi-i, ayō duwŭh naan daya gaji-i, malaikat TUHAN mijog di aran tarang aran-i.

²³ Kan kaldi anŭ kiris malaikat mijog di aran buang digen pedang, ayŭh biruit bu so aran ka di ka ŭmŭh. Balaam madŭs kaldi-i ka taban-i pari ka aran.

²⁴ Komŭnŭ malaikat anŭ mijog di ateng aran di asah duwŭh teya anggor adi agi sindung batuh di barang parad.

²⁵ Kan kaldi kiris malaikat anŭ, ayŭh sigen adŭp-i ka panu ngisi sindung ka ngites kaja Balaam. Balaam madŭs kaldi anŭ dinge.

²⁶ Nganŭ malaikat di ka jawin, ka mijog di tarun adi sikidŭn buang mating aran ngga biruit ka bait ka tauh.

²⁷ Kari ati, kan kaldi kiris malaikat anŭ, ayŭh guring adŭ. Balaam mbŭh raru tuas ka piguru madŭs kaldi ngga sikud-i.

²⁸ Komŭnŭ TUHAN nggen kuasa di kaldi anŭ bada pandai minyu, ka-i nang di Balaam, “Ani mbŭh ku ndai di kaam? Mani kaam mbŭh pitaruh kari madŭs aku?”

²⁹ Balaam nam, “Amai kuu mbŭh bada aku mun daya budo! Kambŭi aku agi pedang, taŭn muko aku siŭ kuu.”

³⁰ Kaldi anŭ nam, “Dŭh kah aku ati kaldi anŭ adi ari mai nunggang tian ti? Mbŭh kah aku simuti ngga kaam dawŭ-i?” “Bŭn” ayŭh nam.

³¹ Komŭnŭ TUHAN bada Balaam kiris malaikat anŭ mijog diginŭ ngga pedang-i; ka Balaam nyipŭŭb di tana nyambah.

³² Malaikat anŭ siken, “Mani kuu mbŭh pitaruh kari madŭs kaldi mu mun anŭ? Aku mbŭh mandŭg di tarang aran mu, amai kuu taŭn dŭh patut ndai pimanu ati.

³³ Kaldi mu kiris aku ka biruit pitaruh kari. Kambŭi ayŭh dŭh biruit, tatu Aku muko siŭ kuu ka tandah kaldi mu udip.”

³⁴ Balaam nam, “Aku mbŭh bidosa. Aku dŭh puan kaam agi mijog di aran tarang aku; pak madin kambŭi kaam nang aku dŭh patut pijuu pimanu ati, aku re pari maad.”

³⁵ Pak malaikat anŭ nang, “Panu adŭ ngga ngara, pak minyu nang anŭ adi aku bada kuu nang.” Jadi Balaam pijuu panu ngga ngara.

Balak kambat Balaam

³⁶ Kan Balak dingah Balaam agi mandŭg, ayŭh ruah di kambat ayŭh di Ar, kupo adi di pang Yang Arnon di baat tarun tana Moab.

³⁷ Balak nang di ayŭh, “Mani kuu dŭh mandŭg sibungas aku bagan kuu? Kuu pikir aku dŭh tungang ngupah kuu ngga sukup kah?”

³⁸ Balaam nam, “Dŭh kah aku agi mandŭg? Pak madin, ani kuasa ku? Kaŭs aku bisa nang anŭ adi Tapa bada aku nang.”

³⁹ Jadi Balaam di ngga Balak ka kupo Huzoth,

⁴⁰ di yŭn Balak simareh dudu sapi ngga dudu biri, ka nggen kada dagin-i di Balaam ngga bara pinguru adi agi sua ngga ayŭh.

Sibungas Pinganang-Binabi Balaam

⁴¹ Ngga isan isan andu jawa ndi Balak taban Balaam ngga di ka Bamoth Baal, di yŭn Balaam dapŭd kiris kada uruk bara daya Israel.