PINYIKIANG 21 - Hakcipta - Biatah Bidayuh

Manang Rawan Daya Canaan

¹ Kan raja daya Canaan di Arad di tura ka siratan tarun tana Canaan dingah daya daya Israel re mandŭg so tura ka Atharim, ayŭh nyerang ngara ka nakap kada ngara.

² Komŭnŭ bara daya Israel ndai payu ngara ngga TUHAN: “Kambŭi Kaam raan bada kieh ngarah bara daya ati, kieh re kubo nitah ngara ngga kupo kupo ngara ka Kaam ka re pirabur ngara.”

³ TUHAN dingah ngara ka turung ngara ngarah daya daya Canaan. Jadi daya daya Israel pirarap ngara ngga kupo kupo ngara, ka kadŭn tarun anŭ Hormah.

Jippŭh dog Ndai so Timaga

⁴ Daya daya Israel bu tingge Darŭd Hor kadŭg aran adi nuju Tanjung Aqaba amai an panu maning tarun tana Edom. Pak darŭm pimanu ngara mbŭh dŭh tan nŭtŭd adŭp-i,

⁵ ka minyu rawan Tapa ngga Moses. Ngara mingungut, “Mani kaam taban kieh ngga ruah so Egypt da kabŭs di tarun tana-pajam ati, di yŭn mating pinguman puan kah piin? Dŭh kieh tan man pinguman ati adi bidab!”

⁶ Komŭnŭ TUHAN pait dudu jippŭh adi raru bisā ka ruang daya bagŭ, ka bagŭ daya Israel dog nyingŭt ka kabŭs.

⁷ Bara daya mandŭg ka yŭn Moses, ka nang, “Kieh mbŭh bidosa kan kieh minyu rawan TUHAN ka rawan kaam. Jadi madin bidua ka TUHAN bada kadi dudu jippŭh ati.” Jadi Moses bidua yŭn bara daya bagŭ.

⁸ Komŭnŭ TUHAN bada Moses ndai jippŭh so timaga, ka na-i di ndi tiang, isa tadŭ daya adi muko dog nyingŭt bisa tingga-i ka dapŭd bua.

⁹ Jadi Moses ndai jippŭh so timaga ka na-i di tiang. Tadŭ daya adi mbŭh dog nyingŭt tingga jippŭh timaga anŭ ka rasu bua.

So Darŭd Hor di ka Rubān Moab

¹⁰ Daya Israel pijuu pimanu ngara ka bibari di Oboth.

¹¹ Ripas ngara tingge tarun anŭ, ngara bibari di tibawang Abarim di tarun tana-pajam tura ka timor tarun tana Moab.

¹² Komŭnŭ ngara bibari di Rubān Zered.

¹³ So nŭ ngara pijuu panu dinge ka bibari di tura ka utara Yang Arnon, di tarun tana-pajam adi bayah-i ndŭg tarun tana daya Amor. (Arnon inŭh baat di asah daya Moab ngga daya Amor.)

¹⁴ Ngapŭi darŭm Surat Pasar Perang TUHAN agi dog nuris “...kupo Waheb di arong gadung Suphah, ngga rubān rubān;

¹⁵ ngga ired rubān rubān adi bayah-i ndŭg kupo Ar nuju baat tarun tana Moab.”

¹⁶ So nŭ, ngara pijuu pimanu ngara ndŭg tarun adi dog kadŭn Prigi, di yŭn TUHAN nang di Moses, “Nguruk bara daya, ka Aku re nggen di ngara piin nok.”

¹⁷ Di tipuh anŭ daya Israel nang ragu ati: “Prigi, piruah piin ngan; ka kieh re ngadā-i ngga ragu.

¹⁸ Prigi adi dog kareh bara pinguasa ka adi dog kareh bara pinguru daya, dog kareh ngga sikud-pinyipritah raja ka ngga sikud ngara.” Ngara panu so tarun tana-pajam di ka Mattanah,

¹⁹ ka so nŭ ngara pijuu panu ndŭg Nahaliel, ka so Nahaliel di ka Bamoth,

²⁰ ka so Bamoth di ka rubān di tarun tana daya Moab, di ribo tibung Darŭd Pisgah, nura ninjau tarun tana-pajam.

Pimanang ngarah Raja Sihon ngga Raja Og

²¹ Komŭnŭ daya Israel pait pinyisung ka Sihon adi raja daya Amor ka nang:

²² “Bada kieh mutas tarun tana ngan. Kieh ngga dāng kudip ami dŭh re miriseu so aran ka kudak ŭmŭh puan kah teya anggor ngan, ka kieh dŭh gŭh re nok piin so prigi ngan; kieh re adu adu di aran bās adŭ ndŭg ka kieh mbŭh ruah so tarun tana ngan.”

²³ Pak Sihon abah nyibandar daya Israel panu mutas tarun tana-i. Ayŭh nguruk bara soldadu-i ka matak ka Jahaz di tarun tana-pajam ka nyerang bara daya Israel.

²⁴ Pak daya Israel siŭ raru bagŭ pinganyu darŭm perang, ka mŭrŭt tarun tana ngara, piguru so Yang Arnon di utara Jabbok, anŭ inŭh ndŭg daya Ammon, amai baat daya Ammon mbŭh nakit dog jaga.

²⁵ Ngapŭi daya Israel sirabut sopŭrŭg kupo daya Amor, samŭn Heshbon ngga sopŭrŭg anak kupo adi maning tarun tana anŭ, ka rŭŭ dieh.

²⁶ Heshbon inŭh sindŭ kupo raja Sihon adi daya Amor, adi ko biperang ngga raja Moab adi diŭ, ka ko tambit sopŭrŭg tana-i ndŭg Yang Arnon.

²⁷ Ngapŭi bara adi tukang bipatun matun, “Mandŭg ka Heshbon, ka kupo Raja Sihon! Kieh raan kiris-i pari dog pijog bauh mun amba-i.

²⁸ Muko ndi sidah so kupo Heshbon bara soldadu Sihon masang mun apui; ayŭh nyirubuh kupo Ar di Moab ka man dudu tirunduk di sijo Arnon.

²⁹ Munki raru sipŭ-i di angān, daya Moab! Angān adi nyambah Chemosh mbŭh dog nyirubuh! Tapa ngan mbŭh bada bara dari ngan jadi daya adi bu mangān rais adŭp-i, ka bara dayung jadi daya-takap raja daya Amor.

³⁰ Pak madin sesang ngara mbŭh dog siŭ, ndi aran aran so Heshbon ndŭg Dibon, so Nashim ndŭg Nophah, sindŭk Medeba.”

³¹ Jadi bara daya Israel rŭŭ di tarun tana Amor,

³² ka Moses pait daya bada jiroh aran adi kana dŭ ngga nyerang kupo Jazer. Daya Israel sirabut kupo anŭ samŭn anak anak kupo adi maning anŭ, ka pibu daya Amor adi rŭŭ dieh.

³³ Komŭnŭ daya Israel biruit ka aran nuju Bashan, ka Og adi raja di Bashan matak ngga bara soldadu-i di nyerang ngara di Edrei.

³⁴ TUHAN nang di Moses, “Dŭhnyah taru ayŭh. Aku re nggen di kuu pimanang. Kuu re ngarah ayŭh, sopŭrŭg daya-i ngga tana-i. Ndai di ayŭh anŭ adi kuu mbŭh ndai di Sihon, raja daya Amor adi mritah di Heshbon.”

³⁵ Jadi daya Israel siŭ Og, bara anak dari-i, ngga sopŭrŭg daya-i, dŭh kidŭm asi asi. Komŭnŭ ngara ngisi tarun tana anŭ.