PINYIKIANG 19 - Hakcipta - Biatah Bidayuh

Dabu Apŭk Dayung Sapi Bireh

¹ TUHAN pesan di Moses ngga Aaron,

² bada nggen ka bara daya Israel atur-adat ati: Taban ka yŭn Moses ngga Aaron ndi dayung sapi adi bireh ka adi ramus buang pidanah ka adi bŭn dog bada ndai kraja,

³ ka ngara re nggen-i di imam Eleazar. Dāng anŭ an dog taban ka sapa tarun yŭn bibari ka dog siŭ di sirung jawin-i.

⁴ Komŭnŭ Eleazar an tambit kada deya dāng anŭ ka ngga trinju-i masik-i pikuju kari nura Bari TUHAN.

⁵ Ndi pŭrŭng pŭrŭng dāng anŭ, kurit, dagin, deya ngga kuboi-i an dog badang di sirung jawin imam anŭ.

⁶ Komŭnŭ ka ayŭh an tambit kada kayuh sedar, ndi tugu hyssop, ka taris adi bireh, ka taran-i di apui.

⁷ Ripas anŭ, imam anŭ an ngu piraka-i ka mŭbŭh adŭp-i ngga piin, komŭnŭ nŭ ayŭh bisa mŭrŭt tarun yŭn bibari; pak ayŭh gibabŭ kais nanyam ka adat ndŭg singumi andu.

⁸ Daya adi badang dayung sapi anŭ dŭh siŭn dŭh gŭh an ngu piraka-i ka mŭbŭh adŭp-i ngga piin, pak ayŭh gŭh babŭ kais nanyam ka adat ndŭg singumi andu.

⁹ Jadi ndi naan daya adi bisig nanyam ka adat an nguruk dabu apŭk sapi anŭ ka na-i di tarun adi bisig nanyam ka adat di sapa tarun yŭn bibari, di yŭn-i dog nyikŭn yŭn daya Israel pakai ngga sidia piin ngga kadi pinyikais nanyam ka adat. Atur adat anŭ dog pimanu ngga taran dosa.

¹⁰ Daya adi tukang nguruk dabu apŭk anŭ dŭh siŭn dŭh an ngu piraka-i, pak ayŭh babŭ kais nanyam ka adat ndŭg singumi andu. Atur-adat ati re adu adu simŭnŭ yŭn bara daya Israel samŭn daya pinami adi rŭŭ di ruang ngara.

Tama Tadang

¹¹ Sinadan daya adi tama tadang mbŭh jadi kais nanyam ka adat darŭm tipuh ju andu.

¹² Ayŭh dŭh siŭn dŭh an pibisig adŭp-i ngga piin pinyibisig di andu adi taruh ngga di andu adi ju; simŭnŭ ka ayŭh bisig. Pak kambŭi ayŭh dŭh pibisig adŭp-i di andu adi taruh ngga andu adi ju anŭ, ayŭh taŭn mbŭh dŭh bisig.

¹³ Sinadan daya adi tama tadang ka dŭh pibisig adŭp-i taŭn babŭ kais, amai piin pinyibisig gibayuh dog mŭbŭh di tunduh-i. Ayŭh nyembar Bari TUHAN, ka ayŭh re dŭh tia dog nyirundeng daya Tapa.

¹⁴ Kambŭi agi daya kabŭs di darŭm bari, jadi tadŭ tadŭ daya adi agi di darŭm bari anŭ di tipuh pinyikabŭs anŭ, puan kah agi daya mŭrŭt ka darŭm-i sua jadi kais nanyam ka adat darŭm tipuh ju andu.

¹⁵ Tadŭ tadŭ sapang puan kah priok adi agi di darŭm bari anŭ adi dŭh dog nutu sua gŭh jadi kais.

¹⁶ Kambŭi daya tama daya adi mbŭh dog siŭ puan kah adi kabŭs sadi adŭp-i di sapa tarun, puan kah tama turang daya adi mbŭh kabŭs, puan kah kubur, ayŭh mbŭh jadi kais darŭm tipuh ju andu.

¹⁷ Ngga kadi pinyikais anŭ, tambit kada dabu apŭk dayung sapi bireh adi mbŭh dog badang ngga taran dosa, na-i di darŭm priok ka gaur ngga piin adi bisig.

¹⁸ Yŭn har adi sibungas-i, daya adi bisig nanyam ka adat an tambit ndi tugu hyssop, siruman-i di piin anŭ, ka masik bari anŭ, sopŭrŭg kayuh adi agi di darŭm-i, ngga sopŭrŭg daya adi agi diginŭ. Yŭn har adi numbor duwŭh, daya adi bisig nanyam ka adat an masik piin anŭ di tunduh ngara adi mbŭh tama turang daya adi mbŭh kabŭs puan kah tadang daya puan kah kubur.

¹⁹ Di andu adi taruh ngga di andu adi ju daya adi bisig nanyam ka adat an masik piin anŭ di tunduh daya adi kais. Di andu adi ju ayŭh an pibisig daya anŭ, adi, muko ngu piraka-i ka mŭbŭh adŭp-i ngga piin, jadi bisig nanyam ka adat ngga simŭdŭp batŭh andu.

²⁰ Daya adi mbŭh jadi kais nanyam ka adat, ka dŭh pibisig adŭp-i taŭn babŭ kais, sabab piin pinyibisig babŭ dŭh dog mŭbŭh di tunduh-i. Ayŭh nyembar Bari TUHAN, ka mbŭh dŭh tia dog nyirundeng daya Tapa.

²¹ Angān an adu adu sita atur adat ati. Sianŭ adi tukang masik piin pinyibisig dŭh siŭn dŭh gŭh ngu piraka-i. Tadŭ tadŭ daya adi tama piin anŭ taŭn babŭ kais nanyam ka adat ndŭg singumi andu.

²² Tadŭ tadŭ kayuh adi daya adi kais tama mbŭh jadi kais gŭh; ka tadŭ tadŭ daya bŭkŭn adi tama kayuh anŭ, jadi kais ndŭg singumi andu.