PINYIKIANG 17 - Hakcipta - Biatah Bidayuh

Sikud Aaron

¹ TUHAN nang di Moses,

² “Kidaan di daya Israel da nggen di kuu simŭng duwŭh sikud, ndi so barang pinguru tibaran-asar. Di barang sikud nuris dŭn daya adi dapu-i

³ ka komŭnŭ nuris dŭn Aaron di sikud adi ngarun Levi. Ndi sikud yŭn barang pinguru tibaran-asar.

⁴ Taban dudu sikud anŭ ka Bari Ku, ka na-i di jawin Pati Simanya, di yŭn Aku bidapŭd ngga kuu.

⁵ Ka sikud sianŭ adi Aku muko mien re prisok. Simŭnŭ Aku bisa bada daya Israel dŭh tia mingungut rawan kuu.”

⁶ Jadi Moses minyu di daya daya Israel, ka barang naan pinguru ngara nggen sikud-i di ayŭh, ndi yŭn ndi tibaran-asar, simŭng duwŭh sopŭrŭg-i, ka sikud Aaron agi dog nguruk ngga tung ngara.

⁷ Moses rasu na sopŭrŭg sikud anŭ di Bari TUHAN, di jawin Pati Simanya TUHAN.

⁸ Andu adi ndi, kan Moses di mŭrŭt ka darŭm Bari TUHAN, ayŭh kiris sikud Aaron, adi ngarun tibaran-asar Levi, mbŭh prisok. Sikud anŭ musu, mirarak, ka piruah asak buwa almond!

⁹ Moses tambit sopŭrŭg sikud anŭ ka kiren-i di daya daya Israel. Ngara kiris ani adi mbŭh jadi, ka barang naan pinguru tambit pari sikud adŭp-i.

¹⁰ TUHAN nang di Moses, “Na sikud Aaron pari di jawin Pati Simanya. Sikud-i anŭ re jadi pinyibakan di daya daya Israel adi an birawan, nang ngara re kabŭs kambŭi ngara dŭh ko mingungut.”

¹¹ Moses ndai nimun TUHAN ko pesan.

¹² Bara daya Israel nang di Moses, “Kambŭi sakanŭ, mŭmbŭh inŭh ata!

¹³ Kambŭi daya adi mandŭg nyindŭk Bari TUHAN dŭh siŭn dŭh kabŭs, mbŭh payah inŭh sopŭrŭg ta!”