PINYIKIANG 16 - Hakcipta - Biatah Bidayuh

Korah, Dathan, ka Abiram, adi Pinyakar.

^1-2 Korah anak Izhar, adi daya Levi so manak Kohath, rawan Moses. Adi samah ngga ayŭh inŭh taruh naan so tibaran-asar Reuben, anŭ inŭh Dathan ngga Abiram, adi bara anak dari Eliab, ngga On adi anak dari Peleth, samŭn 250 naan daya Israel adi bŭkŭn, bara pinguru adi traŭn, ka adi adŭp daya Israel muko mien.

³ Ngara tikuruk di yŭn Moses ngga Aaron ka nang di ngara, “Angān mbŭh rabis so patut! Sopŭrŭg daya Israel mbŭh tung TUHAN, ka TUHAN mbŭh agi ngga sopŭrŭg ta. Mani meh kaam, Moses, katuh adŭp mai bada bigatung so bara daya TUHAN?”

⁴ Kan Moses dingah pinganang anŭ, ayŭh sipŭŭb di tana ka bidua.

⁵ Komŭnŭ ayŭh nang di Korah ngga di bara pinunda-i, “Isan isan andu sipagi TUHAN re kiren di ata asi tung Jangi; Ayŭh re bada sianŭ adi-I dapu, anŭ inŭh, sianŭ adi-I mbŭh mien, mandŭg ka yŭn adŭp-I sindŭk mija-sambah.

^6-7 Isan isan sipagi kuu ngga bara pinunda mu taban tipaku apui, na bam apui ngga kimanyan dieh, ka taban-i ka mija-sambah. Nganŭ ata bisa tingga asi so ata adi TUHAN mbŭh mien. Angān daya Levi inŭh adi mbŭh rabis so patut!”

⁸ Moses pijuu minyu ngga Korah. “Dingah, angān daya Levi!

⁹ Angān nyirundeng ati kayuh adi sŭ kah, Tapa Israel mbŭh nyidŭrŭ angān so bara daya Israel adi bŭkŭn, isa angān bisa tudu Ayŭh, ndai kraja ngan darŭm Bari TUHAN, ka ndai kraja ngan yŭn bara daya Israel?

¹⁰ Ayŭh mbŭh bada kuu ngga sopŭrŭg daya Levi dapŭd utung kraja anŭ, ka madin kuu suba an jadi imam gŭh kah!

¹¹ Kan kuu mingungut rawan Aaron, sibatur-i kuu ngga bara pinunda mu mbŭh rawan TUHAN.”

¹² Komŭnŭ Moses bagan Dathan ngga Abiram, pak ngara nang, “Kieh dŭh re mandŭg!

¹³ Dŭh kah-i sadang kaam mbŭh taban kieh ngga ruah so tana damŭn Egypt an siŭ kieh digiti di tarun tana-pajam? Kaam raan mritah kieh gŭh kah?

¹⁴ Kaam manŭn dŭh taban kieh ka tarun tana damŭn anŭ puan kah nggen di kieh ŭmŭh ngga teya anggor ndu rata ami, ka madin kaam mbŭh suba an nipu kieh. Kieh dŭh re mandŭg!”

¹⁵ Moses tuas ka nang di TUHAN, “Dŭhnyah kambat tadŭ tadŭ sadis adi ngara anŭ jugan. Aku mating ndai sarah di tadŭ tadŭ ngara; ndi pŭrŭng kaldi ngara mating gŭh aku tambit.”

¹⁶ Moses nang di Korah, “Sipagi kuu ngga 250 pinunda mu dŭh siŭn dŭh mandŭg ka Bari TUHAN; Aaron an agi gŭh diginŭ.

¹⁷ Barang naan angān an taban tipaku apui, na kimanyan dieh, ka komŭnŭ jugan-i di mija-sambah.”

¹⁸ Jadi barang naan ngara taban tipaku apui, na bam apui dieh ka kimanyan di tunduh-i, ka mijog di rawa tiban Bari TUHAN ngga Moses ka Aaron.

¹⁹ Jadi Korah nguruk sopŭrŭg daya Israel, ka ngara mijog nura Moses ngga Aaron di rawa tiban Bari TUHAN. Ka gŭgŭh jawa bragah TUHAN nandŭng di sopŭrŭg daya Israel;

²⁰ ka TUHAN nang di Moses ngga Aaron,

²¹ “Pijo adŭp ngan so bara daya anŭ; Aku re pirabur ngara madin tong-i.”

²² Pak Moses ngga Aaron mutu ubak ngara ka nang, “O Tapa, Kaam inŭh atak sopŭrŭg kayuh adi udip. Kan ndi naan so kieh bidosa, di sopŭrŭg daya Israel kah Kaam baji?”

²³ TUHAN nang di Moses,

²⁴ “Kidaan di bara daya bada bu jo so bari Korah, Dathan, ka Abiram.”

²⁵ Komŭnŭ Moses, ayō bara pinguru Israel, di ka yŭn Dathan ngga Abiram.

²⁶ Ayŭh nang di bara daya, “Bu jo so bari bari daya ati adi ginaka ka dŭhnyah tama tadŭ tadŭ kayuh adi ngara dapu. Angān sua dog pirabur ngga ngara rai-i sitagar dosa ngara.”

²⁷ Jadi ngara bu jo so bari bari Korah, Dathan, ka Abiram. Dathan ngga Abiram mbŭh ruah ka mijog di rawa tiban bari adŭp ngara, samah ngga bara anak sawŭn ngara.

²⁸ Moses nang di bara daya, “Simuti inŭh angān re puan nang TUHAN mbŭh pait aku bada ndai sopŭrŭg kayuh ati, ka dŭh-i so ka pinyiraan adŭp ku aku ndai sopŭrŭg-i.

²⁹ Kambŭi ngara anŭ kabŭs sadi adŭp-i dŭh sabab ukum so Tapa, sirati-i TUHAN dŭh pait aku.

³⁰ Pak kambŭi TUHAN ndai kayuh adi saruh, ka tana tikuka ka tŭrŭn ngara ngga sopŭrŭg adi ngara dapu, ka ngara udip udip ngara mūn ka ong daya adi mbŭh kabŭs, angān re puan nang ngara mbŭh tirawan TUHAN.”

³¹ Kan ayŭh muko minyu, tana di yŭn Dathan ngga Abiram mijog tipire ka tikuka

³² ka tŭrŭn ngara ngga bara rawang ngara, ngga sopŭrŭg pinunda Korah ngga kayuh kayuh adi ngara dapu.

³³ Jadi ngara mūn udip udip ngara ka ong daya adi mbŭh kabŭs, samŭn kayuh kayuh adi ngara dapu. Tana napuk ngara ka tŭrŭn ngara.

³⁴ Sopŭrŭg daya Israel adi agi diginŭ babak bu kan dingah sirais ngara. Ngara nyirais nang, “Bu! Ata dog tŭrŭn tana gŭh rai-i!”

³⁵ Komŭnŭ TUHAN pait apui ka sigot sopŭrŭg ngara anŭ adi 250 naan adi ko jugan kimanyan.

Tipaku

³⁶ Komŭnŭ TUHAN nang di Moses,

³⁷ “Kidaan di Eleazar anak dari imam Aaron bada kadi dudu tipaku apui timaga so tadang ngara adi dog man apui, ka nabur ŭbŭ adi darŭm tipaku anŭ di tarun bŭkŭn, amai tipaku apui anŭ kudus.

³⁸ Dudu tipaku anŭ jadi kudus di andu-i dog jugan di mija-sambah TUHAN. Ngapŭi meh tambit dudu tipaku apui anŭ so daya daya adi dog ukum kabŭs sitagar dosa ngara, maba-i bada mapet ride, ka ndai ndu tutu mija-sambah. Tutu anŭ re jadi pinyibakan di sopŭrŭg daya Israel.”

³⁹ Jadi Imam Eleazar tambit dudu tipaku apui anŭ ka maba-i da mapet ka ride ndu tutu mija-sambah.

⁴⁰ Kayuh anŭ jadi pinyibakan di daya daya Israel nang mating daya adi dŭh so sesang Aaron bisa mandŭg ka mija-sambah di badang kimanyan yŭn TUHAN. Te ayŭh dog pirabur rai-i mun Korah ngga bara daya-i. Sopŭrŭg anŭ mbŭh dog ndai nimun TUHAN ko pesan Eleazar so Moses.

Aaron Nyiramat bara Daya

⁴¹ Andu adi ndi sopŭrŭg daya Israel mingungut rawan Moses ngga Aaron ka nang, “Kuu mbŭh siŭ kada daya TUHAN.”

⁴² Ripas sopŭrŭg ngara mbŭh tikuruk an nyakar Moses ngga Aaron, ngara bigiring nura Bari TUHAN ka kiris abun mbŭh nutu-i, ka jawa bragah TUHAN gŭh mbŭh tatŭng.

⁴³ Moses ngga Aaron di ka mijog di rawa Bari TUHAN,

⁴⁴ ka TUHAN nang di Moses,

⁴⁵ “Pijo adŭp ngan so bara daya anŭ, ka Aku re pirabur ngara di yŭn ngara mijog!” Ngara duwŭh mutu ubak ngara,

⁴⁶ ka Moses nang di Aaron, “Tambit tipaku apui mu, na bam apui so mija-sambah dieh, ka na kada kimanyan di tunduh bam apui anŭ. Komŭnŭ rikas taban-i ka yŭn bara daya ka pimanu adat pibisig yŭn ngara. Rikas! TUHAN mbŭh raru baji, buang sesak-andam mbŭh piguru.”

⁴⁷ Aaron ndai nimun dog bada, tambit tipaku apui-i ka bikaduh ka yun bara daya adi mbŭh tikuruk. Kan ayŭh kiris sesak-andam mbŭh piguru, ayŭh na kimanyan di tunduh bam apui ka pimanu adat pibisig yŭn bara daya.

⁴⁸ Pingandai Aaron pirŭŭ sesak-andam anŭ, ka ayŭh mbŭh mijog di asah daya adi udip ngga adi kabŭs.

⁴⁹ Kiang daya adi mbŭh kabŭs inŭh 14,700, dŭh ngitong ngara adi kabŭs samah ngga Korah.

⁵⁰ Kan sesak-andam anŭ mbŭh rŭŭ, Aaron pari ka yŭn Moses di tiban Bari TUHAN.