PINYIKIANG 15 - Hakcipta - Biatah Bidayuh

Ukum-adat pasar Sadis

¹ TUHAN nggen di Moses

² atur-adat ati yŭn daya Israel sita kan ngara mbŭh di tarun tana adi-I re nggen di ngara:

³ Ndi dari sapi, ndi dari biri, ndi biri puan kah kambing bisa dog jugan ka TUHAN ndu sadis badang, puan kah ndu sadis ngga pijadi payu, puan kah ndu sadis adi dog jugan so pinyiraan atin adŭp, puan kah ndu sadis adi angān ndai di tika gawai adat; dagŭn sadis pinguman anŭ pimunos asŭng TUHAN.

^4-5 Asi so angān adi jugan biri puan kah kambing ndu sadis badang ka TUHAN siŭn taban samah ngga barang pŭrŭng dāng anŭ ndi kilogram tibaduk bigaur ngga ndi lita inyo kanā ndu sadis ruwang kayuh, samah ngga ndi lita wain.

⁶ Kan dari biri dog jugan ndu sadis, duwŭh kilogram tibaduk bigaur ngga inyo kanā an dog jugan ndu sadis ruwang kayuh,

⁷ samah ngga ndi lita sitangah wain. Dagŭn sadis sadis anŭ pimunos asŭng TUHAN.

⁸ Kan dari sapi dog jugan ndu sadis badang ka TUHAN, puan kah ndu sadis adi ngga pijadi payu, puan kah ndu sadis bidingan,

⁹ ka taruh kilogram tibaduk bigaur ngga duwŭh lita inyo kanā an dog jugan,

¹⁰ samah ngga duwŭh lita wain. Dagŭn sadis anŭ pimunos asŭng TUHAN.

¹¹ Anŭ inŭh kayuh adi siŭn dog jugan samah ngga dari sapi, dari biri, biri, puan kah kambing.

¹² Kan rabis so ndi dāng dog jugan, sadis tibaduk an dog nambah nanyam adi patut yŭn sukad-i.

¹³ Sopŭrŭg daya Israel siŭn ndai simŭnŭ kan ngara jugan sadis pinguman, adi dagŭn-i pimunos asŭng TUHAN.

¹⁴ Ka kambŭi di tika daya pinami adi rŭŭ di ruang ngan, bait-i nyitiro puan kah adi ruro, ndai sadis pinguman, adi dagŭn-i pimunos asŭng TUHAN; ngara siŭn samah sita atur-adat anŭ.

¹⁵ Atur anŭ an adu adu dog sita ngan, ngga daya pinami adi rŭŭ di ruang ngan. Angān ngga ngara mbŭh brimun di batŭh TUHAN;

¹⁶ ukum-adat ngga atur-adat taŭn mbŭh yŭn ngan ngga ngara.

¹⁷ TUHAN nggen di Moses

¹⁸ atur-adat ati yŭn daya Israel da sita di tarun tana adi-I re nggen di ngara:

¹⁹ Kan angān man pinguman adi dog purun di tarun tana anŭ, kada-i siŭn dog nitah ndu pinganggen adi grua ka TUHAN.

²⁰ Kan angān ndai ruti, sibungas baru so sibungas ruti adi dog ndai so gandom adi bauh siŭn dog jugan ndu pinganggen adi grua ka TUHAN. Anŭ siŭn dog jugan nimun pinganggen grua ngan adi angān ndai so gandom adi angān ngiik.

²¹ Pinganggen adi grua anŭ an adu adu dog nggen ka TUHAN so ruti adi angān ndai.

²² Pak nyamtadar-i agi daya dŭh saji dŭh sita kada atur-adat adi TUHAN mbŭh nggen di Moses.

²³ Ka nyamtadar-i jŭ bara daya Israel dŭh ndai sopŭrŭg kayuh adi TUHAN ko pesan so baba Moses.

²⁴ Kambŭi sarah anŭ timbur sabab daya Israel dŭh puan atur atur-adat, ngara siŭn jugan dari sapi ndu sadis badang, adi dagŭn-i pimunos asŭng TUHAN, samah ngga sadis tibaduk adi ko dog ngŭtŭ ka sadis wain. Nambah ka anŭ, ngara siŭn jugan ndi dari kambing ndu sadis taran dosa.

²⁵ Imam an pimanu adat pibisig yŭn daya Israel, adi ngga ngara siŭn dog apun, sabab sarah anŭ dŭh saji dog ndai ka ngara taban sadis taran dosa ndu sadis pinguman ka TUHAN.

²⁶ Sopŭrŭg daya Israel ngga daya pinami adi rŭŭ di ruang ngara re dog apun, sabab barang naan daya sua darŭm sarah.

²⁷ Kambŭi agi so angān dŭh saji ndai dosa, angān siŭn jugan ndu sadis taran dosa ndi anak dayung kambing adi ndi sawa umbur-i.

²⁸ Di mija-sambah imam siŭn pimanu adat pibisig ngga pibisig angān so dosa, ka angān re dog apun.

²⁹ Atur-adat anŭ mbŭh yŭn sopŭrŭg daya adi dŭh saji ndai dosa, bait-i daya Israel puan kah daya pinami adi rŭŭ ngga angān.

³⁰ Pak daya adi saji-i ndai dosa, bait daya Israel puan kah daya pinami, mbŭh nggen mangŭh di TUHAN, ka ayŭh siŭn dog ukum kabŭs,

³¹ sabab ayŭh mbŭh tirawan pinganang TUHAN ka mbŭh saji-i miranggar ndi so pinyipesan-I. Ayŭh dapu tanggong di pinyikabŭs adŭp-i.

Daya adi Miranggar Adat Sabbath

³² Agi ndi sidah, sitadŭn daya daya Israel gibabŭ bigandon di tarun tana-pajam, ndi naan daya dog dapŭd ndu uwang di andu Sabbath.

³³ Ayŭh dog taban ka yŭn Moses, Aaron, samŭn sopŭrŭg daya Israel,

³⁴ ka dog jaga, sabab gibayuh puan re simuki ngga ayŭh.

³⁵ Komŭnŭ TUHAN nang di Moses, “Daya anŭ dŭh siŭn dŭh dog ukum kabŭs; sopŭrŭg daya Israel siŭn manjan ayŭh ngga batŭh ndŭg kabŭs di sapa tarun yŭn bibari.”

³⁶ Jadi sopŭrŭg daya Israel taban daya anŭ ka sapa tarun yŭn bibari ka manjan ayŭh ngga batŭh ndŭg kabŭs, nimun pesan so TUHAN.

Atur pasar Jabuh Taris

³⁷ TUHAN pesan Moses

³⁸ bada nang di bara daya Israel: “Ndai jabuh taris di sigŭn piraka ngan ka mŭŭng taris adi biru di barang jabuh taris. Angān an adu adu ndai simŭnŭ.

³⁹ Jabuh taris anŭ re jadi tandā pingingat, ka tiap kari angān kiris-i, angān re ingat sopŭrŭg pesan Ku ka tunda-i; simŭnŭ angān dŭh re bu so Aku ka ndai pinyiraan adŭp ngan.

⁴⁰ Jabuh taris anŭ re bada angān ingat ka sita sopŭrŭg pesan Ku; angān re jadi tung jaku ngga sipuno-i.

⁴¹ Aku ati TUHAN adi Tapa ngan; Aku taban angān ruah so Egypt isa Aku jadi Tapa ngan. Aku ati adi TUHAN.”