PINYIKIANG 14 - Hakcipta - Biatah Bidayuh

Daya Israel Mingungut

¹ Ndi ngarŭm ngarŭm bara daya sien darŭm susah.

² Ngara mingungut rawan Moses ngga Aaron, ka nang, “Kana dŭ nŭŭh kabŭs di Egypt bait digiti di tarun tana-pajam!

³ Mani TUHAN taban ata ka tarun tana anŭ? Ata re dog siŭ darŭm perang, ka bara anak sawŭn ta re dog tambit pinganyu. Dŭh kah-i kana dŭ nŭŭh pari ka Egypt?”

⁴ Jadi ngara nang dupan adŭp ngara, “Ja mien ndi naan pinguru ka ata pari ka Egypt!”

⁵ Komŭnŭ Moses ngga Aaron mutu ubak ngara ka tana di jawin sopŭrŭg daya.

⁶ Ka Joshua anak Nun ngga Caleb anak Jephunneh, duwŭh naan so bara pinyiong, nyiratak piraka ngara darŭm susah

⁷ ka nang di bara daya, “Tarun tana adi kieh ko pirasa inŭh tana adi raru mandis.

⁸ Kambŭi TUHAN munos asŭng-I di ata, Ayŭh re taban ata kamanŭ ka nggen di ata tana adi kaya ka damŭn anŭ.

⁹ Dŭhnyah rawan TUHAN ka dŭhnyah taru di bara daya adi rŭŭ diginŭ. Ata re sanang ngarah ngara. TUHAN agi ngga ata ka mbŭh ngarah tapa tapa adi grindung ngara; ka dŭhnyah meh taru.”

¹⁰ Sopŭrŭg daya Israel raan manjan ngara ngga batuh, pak gŭgŭh bara daya agi kiris sekar jawa bragah TUHAN nyirinyak nandŭng nyirungan Bari TUHAN.

Moses Bidua yŭn Bara Daya

¹¹ TUHAN nang di Moses, “Ndŭg sinde bara daya ati babŭ tirawan Aku? Ndŭg sinde ngara abah bisaya di Aku, sunggu Aku mbŭh ari ndai pingandai-nginga di ruang ngara?

¹² Aku re pait sesak-andam ka pirabur ngara, pak Aku re bada kuu jadi sama bangsa adi bās dŭ ka rabis bake so ngara!”

¹³ Pak Moses nang di TUHAN, “Kaam taban bara daya ati ruah so Egypt ngga kuasa adŭp Mai. Kan daya daya Egypt dingah kayuh adi Kaam ndai di daya Mai,

¹⁴ ngara re kidaan-i di daya adi rŭŭ di tarun tana ati. Ngara mbŭh dingah nang Kaam, TUHAN, agi giranan nandŭng kan abun Mai rŭŭ nyirungan kieh, ka Kaam mbŭh panu diŭ so kieh darŭm tŭngŭn abun sandu ka tŭngŭn apui singarŭm.

¹⁵ Madin kambŭi Kaam siŭ sopŭrŭg daya Mai, bangsa bangsa adi mbŭh dingah adŭn Mai adi timagah re nang

¹⁶ Kaam siŭ daya Mai di tarun tana-pajam sabab Kaam mbŭh dŭh tungang taban ngara ka tarun tana adi Kaam mbŭh bijanji an nggen di ngara.

¹⁷ Jadi madin, TUHAN, aku bidua, kiren di kieh kuasa Mai ka ndai kayuh adi Kaam ko bijanji kan Kaam nang,

¹⁸ ‘Aku adi TUHAN, dŭh re udah baji, ka Aku kiren pinyirindu adi bās ngga pinyitŭtŭd ka apun dosa ngga urah adi birawan. Pak Aku dŭh re kambŭt ngukum bara pinanak ngga bara sukuh ndŭg taruh ngga pat turap sitagar dosa pimas pimas ngara.’

¹⁹ Ka madin, TUHAN, nanyam ka pinyirindu Mai adi raru bās ka adi dŭh bisa birubah, apun, aku mite, dosa ngara, nimun Kaam mbŭh ari apun ngara so andu ngara bu so Egypt.”

²⁰ TUHAN nam, “Aku re apun ngara, nimun pimite mu.

²¹ Pak Aku bijanji ngga adŭp Ku adi udip ka ngga adŭp Ku adi bikuasa di ong,

²² mating so bara daya ati re mŭrŭt tarun tana anŭ. Ngara mbŭh kiris sekar jawa bragah Ku ka pingandai-nginga adi Aku ndai di Egypt ka di tarun tana-pajam, pak ngara mbŭh siraru kinuas Aku ka dŭh an tunda pinganang Ku.

²³ Ngara dŭh re mŭrŭt tana anŭ adi Aku ko bijanji an nggen di tayung-babuk ngara. Mating so ngara adi tirawan Aku re mŭrŭt tana anŭ.

²⁴ Pak amai urun Ku Caleb biyŭn pikir-kira bŭkŭn buang mbŭh tŭtŭd di Aku, Aku re taban ayŭh ka tana anŭ adi-i ko pirasa, ka bara sesang-i re dapu tarun tana anŭ

²⁵ adi biyŭn dudu rubān adi yŭn daya Amalek ngga daya Canaan madin rŭŭ. Pari sipagi ka panu ka tarun tana-pajam nuju Tanjung Aqaba.”

TUHAN Ngukum Bara Daya amai Mingungut

²⁶ TUHAN nang di Moses ngga Aaron,

²⁷ “Ndŭg sinde bara daya adi ginaka ati babŭ mingungut rawan Aku? Aku mbŭh dingah ngara mingungut!

²⁸ Madin nggen di ngara pinyinam ati: ‘Aku bipayu ngga adŭp Ku adi udip, Aku re ndai di angān nimun pimite ngan. Aku ati adi TUHAN, mbŭh minyu.

²⁹ Angān re kabŭs ka tadang ngan re mingare di ndi tarun tana-pajam. Sabab angān mbŭh mingungut rawan Aku, mating so angān adi mbŭh rabis duwŭh puru sawa umbur-i re dapŭd mŭrŭt tarun tana anŭ.

³⁰ Aku muko bijanji an bada angān rŭŭ diginŭ, pak mating so angān re tungang, adŭ-i Caleb ngga Joshua.

³¹ Angān nang bara anak ngan re dog nakap pinganyu, pak Aku re taban ngara ka tana anŭ adi abah ngan, ka-i re jadi tarun yŭn ngara rŭŭ.

³² Angān re kabŭs di tarun tana-pajam ati.

³³ Bara anak ngan re bigandon di tarun tana-pajam sitŭkŭd pat puru sawa; re sangsara sitagar angān adi paŭh dŭh tŭtŭd di Aku, ndŭg ka sikasŭn daya so dupan ngan mbŭh kabŭs.

³⁴ Angān re kinyam sarang dosa ngan sitŭkŭd pat puru sawa, anŭ inŭh ndi sawa yŭn barang pat puru andu adi taran ngan di nyibatŭh tana anŭ. Angān re puan nyam ani Aku baji ngga angān!

³⁵ Aku bipayu Aku re ndai simŭnŭ di tunduh ngan daya ginaka adi mbŭh bipekat rawan Aku. Digiti di tarun tana-pajam barang naan angān re kabŭs. Aku adi TUHAN, mbŭh minyu.’ ”

^36-37 Bara daya adi Moses ko pait da pirasa tarun tana anŭ nggen pinganang adi sarah adi bada bara daya mingungut rawan TUHAN. Ngapŭi TUHAN bada ngara dog andam, ka ngara kabŭs.

³⁸ So prungun simŭng duwŭh naan pinyiong anŭ, adŭ-i Joshua ngga Caleb adi gibabŭ udip.

Sibungas Ngara Suba Nyerang Tarun Tana Anŭ

³⁹ Kan Moses kidaan di bara daya Israel kayuh adi TUHAN ko nang, ngara mbŭh raru susah.

⁴⁰ Awar isan isan andu jawa ndi ngara matak di nyerang rais tarun tana sandah, nang, “Madin ata mbŭh sidia an di ka tarun adi TUHAN muko kidaan di ata. Ata ngaku adŭp ta mbŭh bidosa.”

⁴¹ Pak Moses nang, “Jadi mani garang angān dŭh tunda pinganang TUHAN madin? Angān dŭh re manang!

⁴² Dŭhnyah di. TUHAN mating ngga angān; pinganyu re ngarah angān.

⁴³ Kan angān situra ngga daya daya Amalek ngga daya daya Canaan, angān re kabŭs darŭm perang; TUHAN dŭh re ayō angān, sabab angān abah tunda Ayŭh.”

⁴⁴ Pak babŭ gŭh ngara birani di maad rais tarun tana sandah, sunggu Pati Simanya TUHAN ngga adŭp Moses dŭh sua ngga ngara.

⁴⁵ Komŭnŭ daya daya Amalek ngga daya daya Canaan adi rŭŭ diginŭ nyerang ngara ka ngarah ngara, ka tadak ngara jeh ndŭg Hormah.