PINYIKIANG 13 - Hakcipta - Biatah Bidayuh

Bara Pinyiong

¹ TUHAN nang di Moses,

² “Mien ndi naan so bara pinguru so barang simŭng duwŭh tibaran-asar ka pait ngara jadi pinyiong bada pirasa tarun tana Canaan adi re Aku nggen di bara daya Israel.”

^3-15 Moses ndai nimun pesan TUHAN ka so tarun tana-pajam Paran, ayŭh pait bara pinguru nanyam adi dog nuris digiti: Tibaran-asar Pinguru Reuben Shammua anak Zaccur Simeon Shaphat anak Hori Judah Caleb anak Jephunneh Issachar Igal anak Joseph Ephraim Hoshea anak Nun Benjamin Palti anak Raphu Zebulun Gaddiel anak Sodi Manasseh Gaddi anak Susi Dan Ammiel anak Gemalli Asher Sethur anak Michael Naphtali Nahbi anak Vophsi Gad Geuel anak Machi

Tibaran-asar Pinguru

¹⁶ Ngara anŭ inŭh bara pinyiong adi Moses pait bada pirasa tarun tana anŭ. Ayŭh nukar dŭn Hoshea anak Nun bada dŭn Joshua.

¹⁷ Di andu Moses pait ngara, ayŭh nang di ngara, “Panu angān ka utara di ka siratan tarun tana Canaan, nuju rais tarun tana sandah.

¹⁸ Di nyibatŭh munki rais anŭ, ka tingga bagŭ ngga dŭh daya adi rŭŭ diginŭ, ka munki pinyibake ngara.

¹⁹ Ngatin, kana ngga dŭh tana anŭ, ka tingga, rŭŭ di anak anak kupo di sapa tarun puan kah di kupo kupo adi bikuta ngara anŭ.

²⁰ Ngatin gŭh tana ngara, damŭn kah dŭh, bagŭ kah dŭh tŭngŭn kayuh diginŭ. Ka ingat, dŭh kambŭt taban buwa buwa kayuh so nŭ.” (Anŭ mbŭh tipuh kan buwa buwa anggor mbŭh piguru re masak.)

²¹ Jadi ngara anŭ rasu matak nuju utara ka di pirasa tarun tana anŭ, so tarun tana-pajam Sin di tura ka siratan ndŭg Rehob, sindŭk Ateng Hamath di utara.

²² Ngara diŭ di ka siratan tarun tana anŭ ka mandŭg ka Hebron, di yŭn tibaran manak Ahiman, Sheshai, ngga Talmai adi bara sesang bangsa daya grigasi adi dog kadŭn Anakim rŭŭ. (Hebron inŭh kupo adi dog pijog ju sawa diŭ so Zoan di Egypt.)

²³ Ngara mandŭg ka Rubān Eshcol, ka diginŭ ngara kapŭg ndi daan adi biyŭn ndi tibande tundun buwa anggor adi raru bat ndŭg ka duwŭh naan daya tawid-i ngga kayuh. Ngara taban gŭh ngga mari kada buwa delima ngga buwa ara.

²⁴ (Tarun anŭ dog kadŭn Rubān Eshcol sabab ndi tibande tundun buwa anggor adi daya Israel ko kapŭg diginŭ.)

²⁵ Ripas ko nyibatŭh tarun tana anŭ pat puru andu, bara pinyiong anŭ pari

²⁶ ka Moses ngga Aaron, samŭn sopŭrŭg daya Israel di Kadesh di tarun tana-pajam Paran. Ngara kidaan sopŭrŭg kayuh adi ngara muko kiris, ka kiren buwa buwa kayuh adi ngara taban ngga mari.

²⁷ Ngara kidaan di Moses, “Kieh ko pirasa tarun tana anŭ ka mbŭh dapŭd-i kaya buang damŭn. Ta ati kada buwa so nŭ.

²⁸ Pak daya adi rŭŭ diginŭ agi raru bake, ka kupo kupo ngara agi bayah buang bikuta; nambah anŭ dinge kieh kiris sesang grigasi diginŭ.

²⁹ Bara daya Amalek rŭŭ di tura ka siratan tarun tana anŭ; daya Hitti, daya Jebus, ngga daya Amor rŭŭ di rais tarun tana sandah; ka bara daya Canaan rŭŭ di pang rawŭt Mediterranean, ka mapang Yang Jordan.”

³⁰ Caleb bada bara daya adi mingungut rawan Moses pajam, ka nang, “Ata patut nyerang madin ka tambit tarun tana anŭ. Ata sukup bake di nyerang ka sirabut tarun tana anŭ.”

³¹ Pak bara dari adi agi sua di kamanŭ ngga Caleb nang, “Dŭh, ata dŭh sukup bake re di nyerang ngara; daya diginŭ rabis bake so ata.”

³² Jadi ngara pigarau agah adi dŭh batur di dupan daya Israel pasar tarun tana adi ngara ko pirasa. Ngara nang, “Tarun tana anŭ dŭh gŭh tungang piruah sukup pinguman yŭn bara daya adi rŭŭ diginŭ. Barang naan daya adi kieh kiris mbŭh raru bigatung.

³³ Kieh agi gŭh kiris bara grigasi diginŭ, adi bara sesang Anak. Kieh nyam adi raru sŭ mun kadis, ka tatu simŭnŭ inŭh kieh dog kiris ngara.”