PINANDŬNG 9 - Hakcipta - Biatah Bidayuh

¹ Kan malaikat adi numbor rimŭh mambak jangi trompet, aku kiris ndi bitang adi ko rabu so rangit ka ong. Bitang anŭ dog nggen kusi yŭn rasan ong.

² Bitang anŭ kuka rasan ong, ka asuh ruah so dieh mun asuh so tibande buwang apui. Ka batŭh andu samŭn au-tarun karŭm da-i.

³ Dudu kadis mūn so asuh anŭ ka mbap di ong, ka kuasa adi dog nggen di ngara agi brimun ngga tung rikara.

⁴ Kadis kadis anŭ dog kidaan da dŭh pirusak uduh puan kah tŭngŭn tŭngŭn kayuh, puan kah tadŭ tadŭ kayuh adi agi timbu. Kadis kadis anŭ bisa pijera daya adi dŭh biyŭn tandā so Tapa di arŭ ngara.

⁵ Kadis kadis anŭ dŭh dog nyibandar siŭ ngara, adŭ-i pijera ngara sitian rimŭh buran. Andam-i re brinyam ngga singŭt rikara.

⁶ Sitian rimŭh buran anŭ ngara re mite adŭp-i kabŭs pak dŭh tungang; ngara raan kabŭs pak pinyikabŭs re mangān ngara.

⁷ Kadis anŭ mun dudu kuda sidia re biperang; di ubak ngara agi kayuh mun makota mas, ka jawin ngara mun raŭn manusia.

⁸ Ubok ngara mun ubok dayung, jipŭh ngara mun jipŭh singah.

⁹ Sudo ngara dog nutu ngga kayuh adi mun basi pinapas sudo, ka jawŭn urad ngara sak jawŭn dudu krita kuda nyupat re biperang.

¹⁰ Ngara biyŭn koi ngga singŭt mun tung rikara, ka ngga koi-i ngara biyŭn kuasa ngga pijera daya sitian rimŭh buran.

¹¹ Ngara biyŭn raja adi mritah ngara, adi adŭp-i malaikat adi jaga rasan ong. Dŭn-i darŭm piminyu Hebrew inŭh Abaddon; darŭm piminyu Greek inŭh Apollyon (rati-i “Tukang Pirusak”).

¹² Sibungas kayuh adi sipŭ anŭ mbŭh ripas; ko anŭ, dŭm duwŭh dinge re mandŭg.

¹³ Komŭnŭ malaikat adi numbor nŭm mambak jangi trompet. Aku dingah sirŭŭn mandŭg so pat sikuh mija-sambah mas adi nura Tapa.

¹⁴ Sirŭŭn anŭ nang di malaikat adi numbor nŭm anŭ, “Pirupas pat naan malaikat anŭ adi dog muak di Sungi bās Euphrates!”

¹⁵ Pat naan malaikat anŭ dog pirupas; di jam anŭ di andu anŭ darŭm buran ka sawa anŭ ngara mbŭh dog sidia da siŭ ndi utung darŭm taruh so sopŭrŭg rayat manusia.

¹⁶ Aku dog kidaan, kiang soldadu adi pakai kuda agi duwŭh ratus juta.

¹⁷ Ka keya ka darŭm pŭmŭh aku agi kiris dudu kuda ngga bara pinunggang-i: ngara pakai basi pinapas sudo adi bireh mun apui, adi biru mun batuh nilam, ka adi sia mun mirirang. Ubak bara kuda anŭ mun ubak singah, ka so baba kuda kuda anŭ agi ruah apui, asuh, ngga mirirang.

¹⁸ Ndi utung darŭm taruh so rayat manusia dog siŭ taruh masam susah-bās anŭ: apui, asuh, ka mirirang adi ruah so baba bara kuda anŭ.

¹⁹ Amai kuasa bara kuda anŭ inŭh di baba ngga di koi-i. Koi-i mun dudu jippŭh ka piubak, adi-i pakai ngga pijera daya.

²⁰ Bara rayat manusia adi bŭkŭn, sopŭrŭg adi dŭh kabŭs da susah-bās anŭ, dŭh an taran kayuh adi ngara ko ndai. Ngara abah ko nyambah umot, bait kah tibudo adi dog ndai so mas, pirak, timaga, batuh, puan kah so apŭg kayuh, adi dŭh kiris tarun, adi dŭh dingah kayuh, ka adi dŭh panu.

²¹ Dŭh gŭh ngara an ko siŭ daya, ndai biruri karŭm, nanyung, ndai urah adi dŭh tatu darŭm pingandai kais, ka naku.