PINANDŬNG 8 - Hakcipta - Biatah Bidayuh

Patis adi Numbor Ju

¹ Kan Anak Biri kuka patis adi numbor ju, shorga pajam kurang rabis sitangah jam.

² Ka aku kiris malaikat adi ju naan anŭ mijog di sirung jawin Tapa, ka ngara dog nggen ju trompet.

³ Ka malaikat adi bŭkŭn, adi biyŭn bŭrŭh kimanyan mas, mandŭg ka mijog sindŭk mija-sambah. Ayŭh dog nggen bagŭ kimanyan ngga nambah dua dua bara daya adi Tapa mbŭh mien ka jugan-i di tunduh mija-sambah mas adi nura takta.

⁴ Asuh kimanyan adi dog mupun anŭ maad ngga dua dua bara daya adi Tapa mbŭh mien so tangan malaikat anŭ adi mijog di sirung jawin Tapa.

⁵ Komŭnŭ malaikat anŭ tambit makuk kimanyan anŭ, ngisi-i ngga apui so mija-sambah, ka buan-i di tunduh ong. Ka nganŭ gŭh agi jawŭn dudū, kijat, ngga tana-bigugoh.

Dudu Trompet

⁶ Komŭnŭ malaikat adi ju naan masin masin sidia re mambak trompet-i.

⁷ Malaikat adi numbor ndi mambak jangi trompet. Ujen batuh ngga apui, bigaur ngga deya, rabu ka ong. Ndi utung darŭm taruh so ong sau, ka ndi utung darŭm taruh so tŭngŭn tŭngŭn kayuh sau, samŭn sopŭrŭg dawŭn kupai barŭm.

⁸ Komŭnŭ malaikat adi numbor duwŭh mambak jangi trompet. Ka kayuh adi mun tibande darŭd adi sau dog buan ka rawŭt. Ndi utung darŭm taruh so rawŭt mbŭh marui jadi deya,

⁹ ndi utung darŭm taruh so dāng dāng adi udip di rawŭt kabŭs, ndi utung darŭm taruh so dudu kapar rusak.

¹⁰ Komŭnŭ malaikat adi numbor taruh mambak trompet-i. Tibande bitang adi bijagu mun jireb apui rabu so rangit ka nyatŭk ndi utung darŭm taruh so sungi sungi ka di atak atak piin.

¹¹ (Dŭn bitang anŭ inŭh “Pinyipa'it.”) Ndi utung darŭm taruh so piin marui jadi pa'it, ka bagŭ daya kabŭs nok-i, sabab-i mbŭh marui pa'it.

¹² Komŭnŭ malaikat adi numbor pat mambak trompet-i. Ndi utung darŭm taruh so batŭh andu, buran, bitang bitang dog maka, ka rasu manyap ndi utung darŭm taruh so jawa-i; ndi utung darŭm taruh so sandu ngga singarŭm manyap gŭh jawa-i.

¹³ Ka aku nyigura, ka dingah beuh anŭ adi mikabur di rangit nang ngga sirŭŭn bana, “Sipŭ-i! Munki masam sipŭ-i re di sopŭrŭg daya adi udip di ong kan trompet jawŭn dog mambak malaikat anŭ adi taruh naan adi bŭkŭn.”