PINANDŬNG 7 - Hakcipta - Biatah Bidayuh

Siratus Pat puru-Pat ribu Naan daya Israel dog Nandā

¹ Ripas anŭ aku kiris pat naan malaikat mijog di pat sikuh ong, bitan pat sabak isa-i dŭh poh di ong, di rawŭt puan kah maka tadŭ tadŭ tŭngŭn kayuh.

² Ka aku kiris agi dinge malaikat mandŭg so timor taban tandā pakai Tapa adi udip ngga nandā daya. Ayŭh bagan ngga sirŭŭn bana pat naan malaikat anŭ adi Tapa ko nggen kuasa ngga pirabur ong ka rawŭt.

³ Malaikat anŭ nang, “Dŭhnyah pirusak deyŭh, rawŭt, puan kah tŭngŭn kayuh, sibayuh kieh mbŭh nandā arŭ bara urun Tapa ta.”

⁴ Ka aku dog kidaan kiang ngara adi ko dog nandā ngga tandā Tapa di arŭ ngara agi 144,000 naan. Ngara anŭ inŭh so simŭng-duwŭh tibaran-asar Israel,

^5-8 simŭng-duwŭh ribu so tiap tibaran-asar: Judah, Reuben, Gad, Asher, Naphtali, Manasseh, Simeon, Levi, Issachar, Zebulun, Joseph, ka Benjamin.

Tibaran Bās

⁹ Ripas anŭ aku tingga, ka kiris ndi tibaran bās, adi mating daya tungang niap daya-i! Ngara anŭ so barang bangsa, tibaran-asar, rais, ngga piminyu. Ngara mijog nura takta samŭn Anak Biri, nēn piraka buda buang digŭng daan daan dawŭn kurma di tangan ngara.

¹⁰ Ngara nyirais nang: “Pinyiramat mandŭg so Tapa ta, adi guru di takta, so Anak Biri ani!”

¹¹ Sopŭrŭg malaikat anŭ mijog maning takta, samŭn bara nyamba, ka pat dāng udip anŭ. Komŭnŭ ngara sidikang buang mutu di jawin takta ka nyambah Tapa,

¹² nang, “Amen! Puji, bragah, pinyibijak, trima kaseh, stabi, kuasa, ngga bisa-pŭrŭg mbŭh tung Tapa ta ndŭg situi tui! Amen!”

¹³ Ndi so bara nyamba siken aku, “Asi ngara anŭ adi nēn piraka buda, ka so ki ngara mandŭg?”

¹⁴ “Aku dŭh puan, tuan. Kaam kidŭ-i puan,” aku nam. Ayŭh nang di aku, “Ngara inŭh adi ko kinyam sangsara pinyikisiis. Ngara muko ngu piraka ambu ngara da buda pakai deya Anak Biri.

¹⁵ Anŭ inŭh sabab ngara mijog di sirung jawin Tapa ka nyambah Ayŭh sandu singarŭm darŭm ramin-I. Ayŭh adi guru di takta re agi ngga ngara ka grindung ngara.

¹⁶ Ngara dŭh re tia sibŭrŭk puan kah badŭh asŭng; mating batŭh andu puan kah sura bisā re tia pijera ngara,

¹⁷ sabab Anak Biri, adi di yun takta, re jadi pingingat ngara, ka re nguru ngara ka atak piin adi nggen udip. Ka Tapa re ngutos randang batŭh ngara.”