PINANDŬNG 5 - Hakcipta - Biatah Bidayuh

Surat-Barun ngga Anak Biri

¹ Aku kiris surat-barun di tangan tauh sianŭ adi guru di takta anŭ; surat-barun anŭ puno ngga turis di tunduh ngga di darŭm ka dog ngabŭt ngga ju patis.

² Aku kiris gŭh malaikat adi bikuasa, adi piranggah ngga sirŭŭn bana, “Asi adi sadang kana kuka ju patis ati ka murai surat-barun ati?”

³ Pak ndi naan mating gŭh bait di shorga bait di ong bait di ong adi di sagān re tungang murai surat-barun anŭ ka tingga darŭm-i.

⁴ Aku nyisakuk sien sabab mating daya tungang dog dapŭd adi sadang kana da murai surat-barun anŭ puan kah da tingga darŭm-i.

⁵ Komŭnŭ ndi naan so bara nyamba anŭ nang di aku, “Dŭhnyah sien. Tingga! Singah so tibaran-asar Judah, sesang bās David, mbŭh manang. Ayŭh dapŭd kuka ju patis anŭ ka murai surat-barun anŭ.”

⁶ Komŭnŭ aku kiris ndi Anak Biri mijog di yun takta, dog maning pat dāng udip anŭ samŭn bara nyamba. Anak Biri anŭ mun adi ko dog siŭ, ka biyŭn ju tanduk ka ju batŭh, anŭ inŭh ju roh Tapa adi ko dog pait di ndi ong ong.

⁷ Anak Biri anŭ di tambit surat-barun anŭ so tangan tauh sianŭ adi guru di takta.

⁸ Darŭm-I ndai simŭnŭ, pat dāng udip anŭ samŭn bara nyamba adi duwŭh puru-pat naan sidikang nyambah Anak Biri. Barang naan biyŭn kachapi ngga makuk mas puno ngga kimanyan, adi dua bara daya adi Tapa mbŭh mien.

⁹ Ngara nang ragu adi bauh: “Kaam inŭh adi sadang kana tambit surat-barun anŭ ka kuka patis patis-i. Amai Kaam ko dog siŭ, ka ngga pinyikabŭs Mai adi sadis Kaam mbŭh miris yŭn Tapa daya so barang tibaran-asar, piminyu, rais, ngga bangsa.

¹⁰ Kaam mbŭh bada ngara jadi raja adi bituan di Tapa nimun bara imam, ka ngara re mritah di ong.”

¹¹ Aku tingga dinge, ka aku dingah malaikat, agi biribu ribu bara-i! Ngara mijog maning takta, pat dāng udip, ka bara nyamba,

¹² ka biragu ngga sirŭŭn bana, nang: “Anak Biri adi ko dog siŭ inŭh patut kambat kuasa, pinyikaya, pinyibijak, ka pinyibake, stabi, bragah, ngga puji!”

¹³ Ka aku dingah sopŭrŭg dāng adi ko dog napa di shorga, di ong, di ong di sagān, ka di rawŭt; sopŭrŭg-i, di rangit bait di ong samah samah biragu nang: “Di Ayŭh adi guru di takta ngga di Anak Biri, puji ngga stabi, bragah ngga bisa-pŭrŭg, ndŭg situi tui!”

¹⁴ Pat dāng udip anŭ nam, “Amen!” Ka bara nyamba sidikang ka nyambah.