PINANDŬNG 19 - Hakcipta - Biatah Bidayuh

¹ Ko anŭ aku dingah sak jawŭn bara daya di shorga, nang, “Puji ka Tapa! Pinyiramat, bragah, ka kuasa tung Tapa ta!

² Batur buang tŭnggŭn inŭh ukum-I! Ayŭh mbŭh nunggu dayung sundar anŭ adi kinanyap ong ngga pingandai kais-i. Tapa mbŭh ngukum ayŭh sabab ayŭh ko siŭ bara urun-I.”

³ Ngara nyirais dinge, “Puji ka Tapa! Asuh so jireb apui adi man kupo bās anŭ adu adu maad ka sambu!”

⁴ Duwŭh puru-pat naan nyamba ka pat dāng udip anŭ sidikang buang mutu nyambah Tapa adi guru di Takta. Ngara nang, “Amen! Puji Tapa!”

Gawai Sawan Anak Biri

⁵ Komŭnŭ agi sirŭŭn so takta nang, “Puji Tapa ta, sopŭrŭg urun-I ngga sopŭrŭg daya, bās ngga sŭ, adi taru ka stabi di Ayŭh!”

⁶ Komŭnŭ aku dingah jawŭn kayuh sak bara daya bagŭ, sak jawŭn piin ribuan, sak dudū. Aku dingah ngara nang, “Puji Tapa! Amai Tuhan adi Tapa Bisa-pŭrŭg, inŭh Raja!

⁷ Ja ata pawŭn ka gaŭn; ja ata muji Ayŭh, amai tika-i mbŭh mandŭg yŭn gawai sawan Anak Biri, ka pingaten dayung gŭh mbŭh sidia adŭp-i.

⁸ Pingaten dayung mbŭh dog nggen banang linen adi bisig ka adi bringam.” (Banang linen inŭh pingandai kana bara daya adi Tapa mbŭh mien.)

⁹ Komŭnŭ malaikat anŭ nang di aku, “Nuris ati: Sanang inŭh daya adi mbŭh dog bagan ka gawai sawan Anak Biri.” Ka malaikat anŭ nang, “Ati inŭh sawŭ pinganang Tapa.”

¹⁰ Aku sidikang di kaja-i re nyambah ayŭh, pak ayŭh nang di aku, “Dŭhnyah simŭnŭ! Aku ati urun mun kuu gŭh, mun bara adi bŭkŭn adi sabah, sopŭrŭg adi bidigŭng tagap di ajar adi sawŭ adi dog pinandŭng Jesus. Nyambah Tapa nŭh!” Ajar adi sawŭ adi Jesus pinandŭng inŭh adi nyibake bara nabi.

Pinunggang Kuda Buda

¹¹ Komŭnŭ aku kiris shorga tikuka, ka diginŭ agi kuda buda. Pinunggang-i dŭn Adi Tŭtŭd ngga Adi Sawŭ. Ngga pinyitŭnggŭn Ayŭh nggen bisara ka biperang.

¹² Batŭh-I mun jireb apui, di ubak-I bagŭ makota. Ayŭh biyŭn adŭn dog nuris di adŭp-I, pak rati-i mating daya puan adŭ-i adŭp-I sadi.

¹³ Jipo-ambu adi-I nēn puno ngga deya. Adŭn-I inŭh “Pinganang Tapa.”

¹⁴ Bara soldadu shorga tunda Ayŭh, nunggang kuda kuda buda ka nēn banang linen adi buda bisig.

¹⁵ So baba-I agi ruah pedang adi reja, adi ngga-I ngarah barang bangsa. Ayŭh re mritah ngara ngga sikud basi. Ayŭh re mŭ anggor di yŭn anggor dog mŭ, anŭ inŭh baji Tapa Bisa-pŭrŭg.

¹⁶ Di jipo ambu-I ka di pŭŭh-I agi dog nuris dŭn: “Raja di tunduh sopŭrŭg raja ka Tuhan di tunduh sopŭrŭg tuhan.”

¹⁷ Komŭnŭ aku kiris ndi naan malaikat mijog di tunduh batŭh andu. Ayŭh nyirais ngga sirŭŭn bana di sopŭrŭg manuk adi mikabur di rangit: “Ja di samah tikuruk di gawai bās Tapa!

¹⁸ Ja di man dagin bara raja, dagin bara pingubak soldadu samŭn dagin bara soldadu, dagin kuda samŭn dagin bara pinunggang-i, dagin sopŭrŭg daya, daya urun bait daya bebas, adi bās bait adi sŭ!”

¹⁹ Komŭnŭ aku kiris dāng anŭ ngga bara raja di ong tikuruk ngga bara soldadu-i re birawan ngga sianŭ adi nunggang kuda ngga bara soldadu-I.

²⁰ Pak dāng anŭ dog nakap, samah ngga nabi kadong adi ko ndai pingandai-nginga di sirung jawin-i. (Ngga pingandai-nginga anŭ ayŭh ko nyibudo ngara adi biyŭn tandā dāng anŭ samŭn ngara adi ko nyambah tibudo dāng anŭ.) Dāng ngga nabi kadong anŭ dog taran udip udip-i ka darŭm danu apui adi bijagu ngga mirirang.

²¹ Bara soldadu-i dog siŭ ngga pedang adi ruah so baba sianŭ adi nunggang kuda; ka sopŭrŭg manuk anŭ situngang tungang-i kubo man dagin ngara.