PINANDŬNG 17 - Hakcipta - Biatah Bidayuh

Sundar adi Timagah

¹ Komŭnŭ ndi so ju naan malaikat anŭ adi ko kangan makuk-i mandŭg tudu aku ka nang, “Ja, aku re kiren di kuu munki dayung sundar anŭ adi timagah dog ukum, ayŭh adi kupo bās anŭ adi dog pijog sindŭk bagŭ sungi.

² Raja raja di ong ndai pingandai kais ngga ayŭh, ka daya di ong jadi mabuk da wain pingandai kais-i adi ngara nok.”

³ Roh Kudus nguasa aku, ka malaikat anŭ taban aku ka tarun tana-pajam. Diginŭ aku kiris dayung guru di tunduh dāng adi bireh adi biyŭn dŭn dŭn adi pimangŭh Tapa dog nuris di ndi pŭrŭng ganan-i; dāng anŭ biyŭn ju ubak ka simŭng tanduk.

⁴ Dayung anŭ nēn piraka adi bēng ngga adi takod bireh-i, ka dog ngabuh ngga mas, batuh adi brega, ka mutiara. Di tangan-i agi makuk mas puno ngga kayuh kais ka kayuh sembar, adi jadi so pingandai kais-i.

⁵ Di arŭ-i agi dog nuris dŭn adi biyŭn rati adi bisukan: “Babylon adi bās, sindŭ sopŭrŭg dayung sundar ka bara adi ndai pingandai adi dŭh tatu di ong ati.”

⁶ Ka aku kiris dayung anŭ mabuk ngga deya bara daya adi Tapa mbŭh mien ka ngga deya ngara adi dog siŭ sabab ngara nundok ka bituan di Jesus. Kan aku kiris ayŭh aku gŭgŭh buang nginga.

⁷ “Mani kuu nginga kiris kayuh ati?” malaikat anŭ siken aku, “Aku re kidaan di kuu rati adi bisukan pasar dayung anŭ ka pasar dāng adi taban ayŭh, dāng adi biyŭn ju ubak ka simŭng tanduk-i.

⁸ Dāng anŭ ko udip dawŭ-i, pak mbŭh dŭh tia udip; ayŭh mbŭh re makat so rasan ong ka re dog pirabur. Bara daya adi udip di ong adi gibayuh dog nuris dŭn-i sibayuh ong dog napa, di surat di yŭn dŭn bara daya adi Tapa mbŭh mien dog nuris, re nginga darŭm ngara kiris dāng anŭ. Dāng anŭ ko udip; dŭh-i re dŭh tia udip, pak-i re pari tatŭng.

⁹ “Daya adi biyŭn pinyibijak dapŭd mirati kayuh ati. Ju ubak inŭh ju tirunduk, di yŭn dayung anŭ guru. Ubak ubak anŭ gŭh ju naan raja:

¹⁰ rimŭh so ngara mbŭh kabŭs, ndi naan babŭ mritah, ka sianŭ ndi gibabŭ re mandŭg. Kan-i mandŭg, ayŭh re mritah nyitiro adŭ.

¹¹ Ka dāng anŭ adi ko udip dawŭ-i, pak mbŭh dŭh tia, inŭh adŭp-i adi re jadi raja adi numbor mai, ndi so ngara adi ju naan ka adi re dog pirabur.

¹² “Simŭng tanduk adi angān kiris inŭh simŭng naan raja adi gibayuh mritah, pak re dog nggen kuasa ngga mritah nimun raja darŭm ndi jam ngga dāng anŭ.

¹³ Ngara adi simŭng naan anŭ biyŭn samah pinŭtŭn, ka nggen pinyibisā ngga kuasa-i di dāng anŭ.

¹⁴ Ngara re birawan ngga Anak Biri; pak Anak Biri, ngga bara adi-I ko mien, bara adi sabah, re ngarah ngara, sabab Ayŭh inŭh Tuhan di tunduh sopŭrŭg tuhan ka Raja di tunduh sopŭrŭg raja.”

¹⁵ Malaikat anŭ nang di aku, “Sungi sungi adi kuu kiris, di yŭn dayung sundar anŭ guru, inŭh rais, daya, bangsa, ka piminyu.

¹⁶ Ju tanduk adi kuu kiris samŭn dāng anŭ re tiru di dayung sundar anŭ; ngara re tambit sopŭrŭg kayuh adi-i biyŭn ka tingge ayŭh sitabet; ngara re man isin-i ka pirabur ayŭh ngga apui.

¹⁷ Amai Tapa mbŭh na darŭm atin ngara pinyiraan ngga ndai pinyiraan-I darŭm ndi atin buang nggen di dāng anŭ kuasa ngga mritah ndŭg ka pinganang Tapa jadi bitŭtŭk.

¹⁸ “Dayung adi kuu kiris inŭh kupo bās adi nguasa raja raja di ong.”