PINANDŬNG 16 - Hakcipta - Biatah Bidayuh

Makuk Baji Tapa

¹ Komŭnŭ aku dingah sirŭŭn bana so Ramin Tapa minyu di ju naan malaikat anŭ: “Panu angān di ren ju makuk baji Tapa anŭ di ong!”

² Malaikat adi diŭ di ren jangi makuk di ong. Rasu gadag adi bisā timbur di ngara adi biyŭn tandā dāng anŭ ka di ngara adi ko nyambah tibudo-i.

³ Malaikat adi numbor duwŭh ren jangi makuk di rawŭt. Rawŭt marui jadi mun deya daya adi mbŭh kabŭs, ka tiap dāng adi udip di rawŭt kabŭs.

⁴ Komŭnŭ malaikat adi numbor taruh ren jangi makuk di sungi sungi ka di atak atak piin, ka sopŭrŭg-i marui jadi deya.

⁵ Aku dingah malaikat adi jaga piin nang, “Ukum adi Kaam nggen inŭh patut, Kaam adi kudus, Kaam adi madin ka adi mbŭh!

⁶ Ngara ko siŭ bara daya adi Kaam ko mien samŭn bara nabi, ka Kaam meh mbŭh nggen deya da ngara nok. Ngara trima kayuh adi ngara patut trima!”

⁷ Komŭnŭ aku dingah sirŭŭn so mija-sambah nang, “Tuhan Tapa Bisa-pŭrŭg! Batur buang tŭnggŭn inŭh ukum Mai!”

⁸ Komŭnŭ malaikat adi numbor pat ren jangi makuk di batŭh andu, ka-i dog nyibandar badang daya ngga sura-i adi bisā.

⁹ Ngara dog badang ngga sura bisā, ka ngara mangu adŭn Tapa, adi biyŭn kuasa di tunduh susah-bās anŭ. Pak ngara dŭh an marik pimudip ngara pari ka Tapa, ka muji Ayŭh.

¹⁰ Komŭnŭ malaikat adi numbor rimŭh ren jangi makuk di takta dāng anŭ. Pritah dāng anŭ jadi karŭm, ka daya kuut jura naman adŭp ngara,

¹¹ buang mangu Tapa shorga amai sangsara ka amai gadag ngara. Pak ngara dŭh an taran pingandai arap ngara.

¹² Komŭnŭ malaikat adi numbor nŭm ren jangi makuk di Sungi bās Euphrates. Sungi anŭ badŭh isa raja raja adi mandŭg so timor tungang mutas.

¹³ Komŭnŭ aku kiris taruh roh kais adi mun tigarag. Ngara ruah so baba naga anŭ, so baba dāng anŭ, ka so baba nabi kadong anŭ.

¹⁴ Ngara inŭh roh bara umot adi ndai pingandai-nginga. Taruh naan roh anŭ di ka raja raja di ong, an taban ngara ngga biperang di andu bās Tapa Bisa-pŭrŭg.

¹⁵ “Dingah! Aku ati mandŭg mun pinaku! Sanang inŭh daya adi burah ka jaga piraka-i, isa ayŭh dŭh panu sitagor ka mangŭh di sirung jawin daya bagŭ!”

¹⁶ Komŭnŭ roh roh anŭ taban raja raja anŭ mandŭg ka tarun adi dog kadŭn darŭm piminyu Hebrew Armageddon.

¹⁷ Komŭnŭ malaikat adi numbor ju ren jangi makuk di au-tarun. Ka sirŭŭn bana so takta darŭm Ramin Tapa, nang, “Mbŭh kamas!”

¹⁸ Rasu agi kijat, dudū ngga tana-bigugoh. Gi-bŭn tana bigugoh mun anŭ ngitong so andu manusia dog napa; ati inŭh tana-bigugoh adi siabo arap-i!

¹⁹ Kupo bās mbŭh tipire nyitaruh, ka kupo kupo di barang rais mbŭh rubuh. Tapa ingat Babylon adi bās ka mbŭh bada-i nok wain so makuk-I, wain baji-I.

²⁰ Sopŭrŭg purau miyap, ka sopŭrŭg darŭd manyap.

²¹ Ujen batuh adi bangat rabu so rangit nyatŭk daya. Barang batuh anŭ agi rimŭh puru kilogram bat-i. Daya mangu Tapa amai dog susah ujen batuh anŭ, adi mbŭh raru bisā-i.