PINANDŬNG 15 - Hakcipta - Biatah Bidayuh

Malaikat ngga Sikasŭn Susah-Bās

¹ Komŭnŭ aku kiris dinge adi bŭkŭn kayuh adi raru saruh di rangit, bās buang nginga nŭŭh kiris. Agi ju malaikat taban ju masam susah-bās; anŭ inŭh adi sikasŭn-i, sabab-i mbŭh sikasŭn gaya Tapa kiren baji-I

² Komŭnŭ aku kiris kayuh mun rawŭt siramin bigaur ngga apui. Aku kiris gŭh ngara adi ko manang birawan ngga dāng anŭ ka ngga tibudo-i samŭn sianŭ adi dog nandā ngga numbor dŭn-i. Ngara mijog di bŭngŭn rawŭt siramin, digŭng kachapi adi Tapa ko nggen di ngara

³ ka biragu ragu Moses, adi urun Tapa, ngga ragu Anak Biri: “Tuhan Tapa Bisa-pŭrŭg, munki masam bās ka grua inŭh pingandai Mai! Raja barang bangsa, munki masam batur ka sawŭ inŭh pingatur Mai!

⁴ Asi daya re dŭh taru Kaam, Tuhan? Asi daya re abah kibās adŭn Mai? Kaam sadi adŭ kudus. Sopŭrŭg bangsa re mandŭg nyambah Kaam, sabab pingandai tŭnggŭn Mai dog kiris sopŭrŭg daya.”

⁵ Ko anŭ aku kiris Ramin Tuhan di shorga tikuka; di darŭm-i agi Bari Tuhan.

⁶ Ju naan malaikat adi taban ju masam susah-bās ruah so Ramin Tuhan anŭ, nēn banang linen ngga taris mas dog marut di sudo-i.

⁷ Komŭnŭ ndi so pat dāng udip anŭ nggen di ju naan malaikat anŭ ju makuk mas puno ngga baji Tapa, adi udip adu adu.

⁸ Ramin Tapa mbŭh puno ngga asuh so bragah ngga kuasa Tapa; mating daya bisa mŭrŭt ka darŭm Ramin Tapa ndŭg ka ju masam susah-bās anŭ mbŭh mating tia.