PINANDŬNG 13 - Hakcipta - Biatah Bidayuh

Duwŭh Dāng

¹ Komŭnŭ aku kiris ndi dāng ruah so rawŭt. Dāng anŭ biyŭn simŭng tanduk-i ka ju ubak; di tiap tanduk-i agi makota, ka di tiap ubak-i agi dŭn adi nggen mangŭh di Tapa.

² Dāng anŭ mun rimaung, papah kaja-i mun papah kaja buāng, ka baba-i mun baba singah. Naga anŭ nggen di dāng anŭ pinyibake-i, takta-i, ka kuasa bās-i.

³ Ndi so dudu ubak dāng anŭ biyŭn arit, mun adi ko bana binasa; pak tawan-i anŭ mbŭh marit. Sopŭrŭg daya di ong nyaruh di dāng anŭ ka mbŭh tunda-i.

⁴ Sopŭrŭg daya nyambah naga anŭ sabab-i mbŭh nggen kuasa-i di dāng anŭ. Ngara nyambah gŭh dāng anŭ, nang, “Asi meh re mun dāng ati? Asi re tungang birawan ngga dāng adi mun ati?”

⁵ Dāng anŭ dog nyibandar minyu sambuh, pinganang adi nggen mangŭh di Tapa, ka-i mbŭh dog nyibandar biyŭn kuasa sitian pat puru-duwŭh buran.

⁶ Dāng anŭ piguru mangu Tapa, dŭn-I, tarun yŭn-I rŭŭ, samŭn sopŭrŭg adi rŭŭ di shorga.

⁷ Dāng anŭ dog nyibandar da birawan ngga bara daya adi Tapa mbŭh mien ka ngarah ngara, ka mbŭh dog nggen kuasa di tunduh sopŭrŭg tibaran-asar, rais, piminyu, ka bangsa.

⁸ Sopŭrŭg daya adi udip di ong re nyambah dāng anŭ, adŭ-i ngara adi mbŭh dog nuris dŭn-i diŭ so ong dog napa darŭm surat di yŭn dŭn bara daya adi Tapa mbŭh mien dog nuris; ngara inŭh adi dog dapu Anak Biri adi ko dog siŭ.

⁹ “Ayŭh adi biyŭn kajit, isa-i dingah meh!

¹⁰ Daya adi re dog nakap manŭn re dog nakap; daya adi re dog siŭ ngga pedang manŭn re dog siŭ ngga pedang. Sirati-i bara daya adi Tapa mbŭh mien dŭh siŭn dŭh an biyŭn pinyitŭtŭd atin ngga pinyabah.”

¹¹ Komŭnŭ aku kiris agi dinge dāng adi bŭkŭn, adi ruah so tana. Dāng anŭ biyŭn duwŭh tanduk adi mun tanduk anak biri, ka-i minyu sak naga.

¹² Dāng ati pakai kuasa bās so dāng adi diŭ anŭ, adi mbŭh marit tawan-i. Nanyam pinyiraan dāng adi diŭ anŭ, dāng ati takan ong ngga sopŭrŭg daya adi udip dieh nyambah dāng adi diŭ.

¹³ Dāng adi numbor duwŭh ati ndai pingandai-nginga adi bās; ayŭh bada apui mūn ka ong so rangit di sirung jawin barang naan daya.

¹⁴ Ka ngga pingandai-nginga adi dog nyibandar ayŭh ndai yŭn dāng adi diŭ anŭ, ayŭh nyibudo sopŭrŭg daya adi udip di ong. Dāng ati bada ngara ndai tibudo darŭm gayŭn dāng anŭ adi ko tawan da pedang pak babŭ udip.

¹⁵ Dāng ati dog nyibandar nggen asŭng di tibudo adi dog ndai darŭm gayŭn dāng adi diŭ, isa tibudo anŭ bisa minyu ka siŭ sopŭrŭg adi dŭh nyambah adŭp-i.

¹⁶ Dāng ati takan sopŭrŭg daya, sŭ bait bās, kaya bait sirata, daya urun bait daya bebas, da biyŭn tandā di tangan tauh puan kah di arŭ ngara.

¹⁷ Mating daya siŭn miris kayuh puan kah bijua dŭh ngga tandā anŭ, anŭ inŭh, dŭn dāng anŭ puan kah numbor yŭn dŭn-i anŭ.

¹⁸ Rati-i angān an biyŭn pinyibijak. Daya adi pitar dapŭd mirati numbor dāng anŭ, sabab numbor anŭ inŭh dŭn daya. Numbor anŭ inŭh 666.