PINANDŬNG 12 - Hakcipta - Biatah Bidayuh

Dayung ngga Naga

¹ Komŭnŭ agi kayuh bās adi raru saruh tatŭng di rangit. Dayung nēn batŭh andu ndu piraka-i, ka buran di ribo kaja-i ka makota ngga simŭng-duwŭh bitang di ubak-i.

² Ayŭh mbŭh re rikas biranak, ka sarang andam re biranak mbŭh bada ayŭh nyirais naman adŭp-i.

³ Agi dinge kayuh saruh tatŭng di rangit. Tibande naga bireh adi piubak ju ngga simŭng tanduk-i; di tiap ubak-i agi makota.

⁴ Ngga koi-i ayŭh pisen ndi utung darŭm taruh so dudu bitang di rangit ka buan-i ka ong. Ayŭh mijog nura dayung anŭ, siŭn bisa rasu man anak-i kan-i dog ruwan.

⁵ Komŭnŭ dayung anŭ biranak ndi anak dari, adi re mritah sopŭrŭg rais ngga sikud basi-i. Pak anak anŭ rasu dog tambit ka dog taban ka yŭn Tapa ka dog na di tunduh takta-I.

⁶ Dayung anŭ bu ka tarun tana-pajam, ka tarun yŭn adi Tapa mbŭh sidia yŭn-i, di yŭn-i re dog sita sitian siribu duwŭh ratus nŭm puru andu.

⁷ Komŭnŭ agi perang di shorga. Michael ngga bara malaikat-i birawan ngga naga anŭ adi dog batu bara malaikat adŭp-i.

⁸ Naga anŭ arah, ka ayŭh ngga bara malaikat-i dŭh dog nyibandar rŭŭ di shorga tia.

⁹ Tibande naga anŭ dog taran, anŭ inŭh jippŭh jah, adi dŭn Siarap, puan kah Shetan, adi nyibudo sopŭrŭg daya di ong. Ayŭh dog taran ka ong samŭn bara malaikat-i.

¹⁰ Komŭnŭ aku dingah sirŭŭn bana di shorga nang, “Madin pinyiramat so Tapa mbŭh mandŭg! Madin Tapa mbŭh kiren kuasa-I nimun Raja! Madin Kristus-I mbŭh kiren kuasa-I! Amai sianŭ adi mijog sandu singarŭm di sirung jawin Tapa ka nyarah bara adi sabah, mbŭh dog taran so shorga.

¹¹ Bara dingan ta manang rawan ayŭh da deya Anak Biri ka da agah so Tapa adi ngara piagah. Ngara sanggup ruban asŭng-i.

¹² Jadi gaŭn meh, angān shorga, samŭn sopŭrŭg adi rŭŭ dieh! Pak munki masam payah-i ong ngga rawŭt! Amai Siarap mbŭh mandŭg ka kuu ngga baji-i, sabab ayŭh puan tipuh-i mbŭh purok.”

¹³ Kan naga anŭ rada adŭp-i mbŭh dog taran ka ong, ayŭh piguru tadak dayung adi ko ruwan anak dari anŭ.

¹⁴ Dayung anŭ mbŭh dog nggen duwŭh tibande urad beuh ngga-i mikabur ka tarun yŭn-i rŭŭ di tarun tana-pajam, di yŭn-i dog sita sitian taruh sawa sitangah, jo so serang naga anŭ.

¹⁵ Ka so baba-i, naga anŭ ren piin uba ka yŭn dayung anŭ, isa-i taban ayŭh paman.

¹⁶ Pak tana turung dayung anŭ; ayŭh kuka baba-i ka tŭrŭn piin anŭ adi mandŭg so baba naga.

¹⁷ Naga anŭ mbŭh raru baji di dayung anŭ, ndŭg ka ayŭh di nyerang bara sesang-i, sopŭrŭg adi tunda Pinyipesan Tapa ka adi tŭtŭd di ajar adi dog pinandŭng Jesus.

¹⁸ Jadi naga anŭ mijog di tabing rawŭt.