PINANDŬNG 11 - Hakcipta - Biatah Bidayuh

Duwŭh naan Saksi

¹ Komŭnŭ aku dog nggen ndi sikud adi mun pingŭkŭd kayuh, ka dog kidaan, “Panu di ngŭkŭd Ramin Tapa samŭn mija-sambah, ka ngitong kudu naan ngara adi simayang di Ramin Tapa.

² Pak dŭhnyah ngŭkŭd awah, sabab-i mbŭh yŭn daya adi dŭh puan Tapa, adi re bidigang di Kupo Kudus anŭ sitian pat puru-duwŭh buran.

³ Aku re pait duwŭh naan saksi ku adi nēn piraka guni; ngara re piagah agah so Tapa sitŭkŭd 1,260 andu anŭ.”

⁴ Duwŭh naan saksi anŭ inŭh duwŭh tŭngŭn kanā ngga duwŭh prita adi mijog di sirung jawin Tuhan adi nguasa ong.

⁵ Kambŭi agi daya suba an kandam ngara, apui bisa ruah so baba ngara ka bada daya anŭ binasa; ka simŭnŭ inŭh asi asi adi suba an bada ngara kinaman re dog siŭ.

⁶ Ngara biyŭn kuasa ngga tŭŭp rangit isa di tika ngara piagah agah so Tapa andu dŭh ujen. Ngara biyŭn gŭh kuasa di tunduh atak atak piin, da-i marui jadi deya. Ngara biyŭn gŭh kuasa ngga ari taban nanyam pinyiraan adŭp ngara barang masam susah-bās ka ong.

⁷ Kan ngara ko piagah agah ngara, dāng adi ruah so rasan ong re rawan ngara. Ayŭh re ngarah ngara ka siŭ ngara,

⁸ ka tadang ngara re dog piguring di aran kupo bās, di yŭn Tuhan ngara ko dog masak di rigang. Dŭn tandā pinatŭng kupo anŭ inŭh Sodom, puan kah Egypt.

⁹ Daya so barang rais, tibaran-asar, piminyu, ngga bangsa re tingga tadang ngara sitian taruh andu sitangah ka dŭh re nyibandar-i dog kubur.

¹⁰ Bara daya di ong re gaŭn sabab pinyikabŭs ngara duwŭh ati. Ngara re bigawai ka pait buwa-tangan ka dingan ngara, sabab kayuh adi mbŭh jadi di tunduh duwŭh naan nabi anŭ adi ko mito rayat manusia.

¹¹ Ripas taruh andu sitangah, asŭng adi nggen udip mandŭg so Tapa ka mŭrŭt ngara; ngara rasu mijog ka daya adi kiris mbŭh taru.

¹² Komŭnŭ ngara duwŭh anŭ dingah sirŭŭn bana nang so shorga, “Maad kamati!” Di sirung jawin pinganyu ngara, ngara maad ka shorga ngga abun.

¹³ Di tika anŭ tana agi bana bigugoh; ndi utung darŭm simŭng so kupo anŭ mbŭh rusak, ka ju ribu naan daya kabŭs. Adi bŭkŭn mbŭh taru ka muji Tapa adi nguasa shorga.

¹⁴ Sipŭ adi numbor duwŭh mbŭh ripas, pak adi numbor taruh re rikas mandŭg!

Trompet adi numbor Ju

¹⁵ Komŭnŭ malaikat adi numbor ju mambak trompet-i, ka agi sirŭŭn sirŭŭn bana di shorga, nang, “Kuasa ngga mritah ong, madin, mbŭh tung Tuhan ngga Kristus-I; Ayŭh re mritah ndŭg situi tui!”

¹⁶ Komŭnŭ bara nyamba adi duwŭh puru-pat naan anŭ adi guru di takta ngara di sirung jawin Tapa sidikang buang mutu nyambah Tapa,

¹⁷ nang: “Tuhan Tapa Bisa-pŭrŭg, Kaam adi madin ngga adi mbŭh! Kieh nggen trima kaseh di Kaam amai Kaam mbŭh pakai kuasa bās Mai ka mbŭh piguru mritah!

¹⁸ Daya adi dŭh puan Kaam mbŭh baji, sabab tika adi ngga Kaam kiren baji Mai mbŭh mandŭg, tika adi ngga daya adi mbŭh kabŭs dog bisara. Tika-i mbŭh mandŭg adi ngga urun Mai adi bara nabi dog ngupah, samŭn sopŭrŭg daya Mai, sopŭrŭg ngara adi stabi ka taru di Kaam, adi bās ngga adi sŭ. Tika-i mbŭh mandŭg ngga bada ngara adi pirusak ong binasa!”

¹⁹ Ramin Tapa di shorga mbŭh tikuka, ka Pati Simanya agi dog kiris diginŭ. Ka rasu agi kijat, jawŭn dudū, tana-bigugoh, ka ujen batuh.