NEHEMIAH 8 - Hakcipta - Biatah Bidayuh

Ezra Basa Ukum-Adat di Bara Daya

¹ Ngga buran adi ju daya Israel mbŭh tatap rŭŭ di kupo kupo adŭp ngara. Andu adi ndi darŭm buran anŭ ngara tikuruk di Jerusalem, di pakan adi sindŭk Tiban Piin. Ngara mite Ezra, adi imam ka adi sukup pandai di Ukum-adat adi TUHAN muko nggen di daya Israel so Moses, bada tambit surat Ukum-adat.

² Jadi Ezra taban-i ka tarun yŭn bara daya mbŭh tikuruk — bara dari, bara dayung ngga anak-anya adi mbŭh baga ka dapŭd mirati isi surat anŭ.

³ Diginŭ di pakan sindŭk tiban-bās ayŭh basa Ukum-adat anŭ di ngara so isan isan ndŭg kumbeng, adi ngara mbŭh nakit dingah.

⁴ Ezra mijog di ndi tarun yŭn adi dog ndai so kayuh yŭn daya mijog minyu. Bara daya ati mijog sindŭk ayŭh tura ka tauh-i: Mattithiah, Shema, Anaiah, Uriah, Hilkiah, ngga Maaseiah; ka ngara ati adi bŭkŭn mijog tura ka bait-i: Pedaiah, Mishael, Malchijah, Hashum, Hashbaddanah, Zechariah, ngga Meshullam.

⁵ Darŭm Ezra mijog diginŭ bigatung so bara daya, di yŭn sopŭrŭg daya tungang kiris ayŭh. Kan ayŭh kuka surat anŭ, sopŭrŭg ngara mijog.

⁶ Ezra nang, “Puji ka TUHAN, Tapa adi bās!” Sopŭrŭg daya pakat tangan ngara ka nam, “Amen! Amen!” Ngara sidikang ka bidua, mutu buang jawin ngara dog tana.

⁷ Komŭnŭ ngara makat ka mijog masin masin di yŭn adŭp-i, ka bara daya Levi ati kidaan rati Ukum-adat anŭ di ngara: Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, ka Pelaiah.

⁸ Ngara mindai Ukum-adat Tapa ka kidaan rati-i isa bara daya dapŭd mirati.

⁹ Kan bara daya dingah Ukum-adat dog basa, ngara piguru sien. Jadi Nehemiah, adi gabenor, Ezra, adi imam ka adi sukup pandai di Ukum-adat, ka bara daya Levi adi kidaan rati Ukum-adat nang di sopŭrŭg daya, “Andu ati inŭh kudus di TUHAN adi Tapa ngan, ka angān dŭhsah susah bait sien.

¹⁰ Maad angān ka bigawai. Samah pinguman ngga wain ngan ngga ngara adi dŭh biyŭn sukup pinguman. Andu ati inŭh kudus di TUHAN ta, ka dŭhnyah susah. Pinyigaŭn adi TUHAN nggen di angān re bada angān bake.”

¹¹ Bara daya Levi nyaduh bara daya ka kidaan di ngara bada dŭh susah di andu adi kudus anŭ.

¹² Jadi sopŭrŭg daya maad ka arŭn adŭp ngara ka man nok darŭm pawŭn ka samah pinguman ngga dingan ngara, sabab ngara mirati kayuh adi mbŭh dog basa di sirung jawin ngara.

Gawai Bari-Dawŭn

¹³ Andu anŭ ndi bara pingubak manak, samah ngga bara imam ngga bara daya Levi, di ka yŭn Ezra di birajar ajar Ukum-adat.

¹⁴ Ngara dapŭd Ukum-adat, adi TUHAN mbŭh nggen di Moses, mritah daya Israel bada rŭŭ di bari-dawŭn di tipuh Gawai Bari-Dawŭn.

¹⁵ Jadi ngara nggen atur ati ka pait-i di ndi tarun tana Jerusalem ngga kupo kupo ka anak anak kupo: “Panu ruah ka sandah ka tambit daan daan kayuh so tŭngŭn pain, tŭngŭn kanā, tŭngŭn kemunting, tŭngŭn kurma ngga tŭngŭn tŭngŭn kayuh adi bŭkŭn ngga ndai bari-dawŭn nanyam ka atur adi dog nuris darŭm Ukum-adat.”

¹⁶ Jadi bara daya tambit daan daan kayuh ka pijog bari-dawŭn di tibung ramin ngara, di badag ngara, di badag Ramin TUHAN, ka di pakan sindŭk Tiban Piin ka sindŭk Tiban Ephraim.

¹⁷ Sopŭrŭg daya adi mbŭh mari ripas ko dog taran pijog bari-dawŭn ka rŭŭ dieh. Anŭ inŭh sibungas-i dog ndai ngitong so jaman Joshua anak Nun, ka barang naan daya mbŭh graŭh buang pawŭn.

¹⁸ Barang andu, so sibungas andu gawai anŭ ndŭg sikasŭn andu-i, ngara basa Ukum-adat Tapa. Ngara bigawai ju andu, ka andu adi mai ngara tŭŭp gawai, nanyam adi mbŭh dog miratak darŭm Ukum-adat.