NEHEMIAH 5 - Hakcipta - Biatah Bidayuh

Daya Sirata Dog Kisiis

¹ Dŭh tui ripas anŭ bagŭ daya Jahudi, dari ngga dayung, piguru mingungut pasar dingan ngara adi samah daya Jahudi.

² Kada nang, “Rawang ami baga, kieh biguna di gandom ngga kudip adŭp ami.”

³ Adi bŭkŭn nang, “Mating mun ami dŭh pirupas ŭmŭh ŭmŭh ami ngga teya anggor ngga ramin ami ramŭn an dapŭd gandom isa kieh dŭh sikirau.”

⁴ Agi gŭh adi bŭkŭn nang, “Kieh an nginjam duit ngga bayar suke ŭmŭh ngga teya anggor ami ka pritah.

⁵ Ata samah bangsa Jahudi. Dŭh kah brinyam anak ami ngga anak ngara? Pak kieh mbŭh bada anak ami jadi urun. Mbŭh agi anak anak dayung ami dog jua jadi urun. Kieh mbŭh dŭh bigaya sabab ŭmŭh ŭmŭh ami ngga teya anggor mai mbŭh dog tambit so kieh.”

⁶ Kan aku dingah har anŭ so ngara, aku mbŭh raru baji

⁷ ka ndai pikir an rikas ndai kayuh. Aku nyarah bara pinguru ngga bara pinurung rayat ka nang di ngara, “Angān kinanyuh dingan ngan adi samah daya Jahudi!” Aku bagan bara daya bagŭ bada mandŭg tikuruk yŭn ngatur har anŭ

⁸ ka nang, “Ngga situngang tungang ta, ata mbŭh miris pari bara madis ta adi samah daya Jahudi adi ko jua adŭp ngara di daya tami. Ka madin angān takan madis adŭp ngan jua adŭp ngara di angān, adi bangsa adŭp ngara!” Bara pinguru pirŭngŭt ka dŭh dapŭd nang ani ani.

⁹ Komŭnŭ aku nang, “Kayuh adi angān ndai inŭh sarah! Angān patut taru Tapa ka ndai kayuh adi batur. Simŭnŭ angān dŭh nggen di pinganyu ta, daya adi dŭh sabah di Tapa, aran ngga pimangŭh ata.

¹⁰ Aku mbŭh bada rayat nginjam duit ngga gandom so aku, ka simŭnŭ gŭh bara dingan ku ka ngara adi nyiraja yŭn ku. Madin isa-i ata samah kambŭt adŭ sopŭrŭg anŭ adi ata harap ata trima pari.

¹¹ Kambŭt adŭ sopŭrŭg utang ngara — duit, bait gandom, bait wain, bait inyo kanā. Ka rikas nggen pari teya teya ngara, teya anggor ngara, teya kanā ngara, ka ramin ramin ngara!”

¹² Bara pinguru nam, “Kieh re ndai nanyam pinganang mai. Kieh re pari buat-rata ngara ka dŭh bada ngara bayar utang ngara.” Aku bagan bara imam ka bada bara pinguru anŭ bipayu di sirung jawin ngara an ingat janji adi ngara mbŭh ndai tejah.

¹³ Komŭnŭ aku tambit bŭŭng kupong so kupong ku ka nang buang aku ngambar-i, “Simuti inŭh Tapa ngga tadŭ tadŭ so angān adi dŭh ingat janji-i. Tapa re sirapas ramin ngan ka sopŭrŭg kayuh adi angān biyŭn, ka re bada angān dŭh biyŭn ani ani.” Barang naan daya adi agi diginŭ nang, “Amen!” ka muji TUHAN. Ka bara pinguru gŭh ndai nimun adi mbŭh ngara janji.

Nehemiah Dŭh Bidagis

¹⁴ Darŭm tipuh simŭng duwŭh sawa anŭ aku jadi gabenor tana Judah, so sawa adi simŭng duwŭh Artaxerxes jadi raja-empaya ndŭg sawa adi 32 darŭm pinyipritah-i, bara madis ku ngga adŭp ku dŭh man pinguman adi dog nitah yŭn gabenor.

¹⁵ Sopŭrŭg gabenor adi diŭ so aku mbŭh jadi pinyirabis bat di rayat ka mbŭh mite 40 kiping duit pirak barang andu yŭn pinguman ngga wain. Bara pinurung ngara ani agi kinanyuh rayat. Pak aku dŭh an mun anŭ, sabab aku taru buang stabi di Tapa.

¹⁶ Aku mbŭh kubo na turang udas ku ngga pari pijog sindung kupo ka dŭh kira dapŭd buat-rata. Barang naan adi nyiraja yŭn ku sua di kraja pari pijog anŭ.

¹⁷ Aku ari bisamah man ngga 150 naan daya bangsa Jahudi ngga pinguru pinguru ngara, ka simŭnŭ gŭh sopŭrŭg daya bangsa bŭkŭn adi mandŭg ka yŭn ku so rais rais adi sindŭk.

¹⁸ Barang andu aku ngidang daya ngga ndi pŭrŭng sapi, nŭm pŭrŭng biri adi gamu, dudu siok, ka barang simŭng andu aku piruah tibŭn wain. Aku puan kayuh adi re nanuh rayat, jadi aku dŭh mite biranja man adi taŭn mbŭh dog nitah yŭn gabenor.

¹⁹ Aku bidua ka Kaam, O Tapa, nyiberkat aku amai pingandai kana adi mbŭh ku ndai yŭn bangsa ati.