NEHEMIAH 3 - Hakcipta - Biatah Bidayuh

Pari Pijog Sindung Jerusalem

¹ Simuti inŭh sindung kupo pari dog pijog. Imam Bās Eliashib ngga bara dingan-i adi samah imam pari pijog Tiban Biri, nyikudus-i, ka na sindung sindung tiban dieh. Ngara nyikudus sindung Jerusalem jeh ndŭg Tawā Siratus ngga Tawā Hananel.

² Bara daya Jericho pijog tung ngara tŭtŭb tubu sindung anŭ. Zaccur anak Imri pijog jangi tŭtŭb tubu anŭ.

³ Manak Hassenaah pijog Tiban Iken. Ngara na parang tiban ka sindung sindung tiban dieh, ka na abŭt parang sikutang ngga ngabŭt tiban anŭ.

⁴ Meremoth, adi anak Uriah, ka sukuh Hakkoz, pijog jangi tŭtŭb tubu sindung anŭ. Meshullam, adi anak Berechiah ka sukuh Meshezabel, pijog jangi tŭtŭb tubu anŭ. Zadok anak Baana pijog jangi tŭtŭb tubu anŭ.

⁵ Bara daya Tekoa pijog tung ngara tŭtŭb tubu sindung anŭ, pak bara pinguru kupo anŭ abah ndai kraja-bakar adi dog nggen di ngara so bada bara adi ngatur kraja.

⁶ Joiada anak Paseah ngga Meshullam anak Besodeiah pari pijog Tiban Jeshanah. Ngara na parang ka sindung sindung tiban dieh, ka na abŭt parang sikutang ngga ngabŭt tiban anŭ.

⁷ Melatiah so Gibeon, Jadon so Meronoth, ka bara daya so Gibeon ngga Mizpah pijog tung ngara tŭtŭb tubu sindung anŭ, jeh ndŭg ramin gabenor Euphrates Barat.

⁸ Uzziel anak Harhaiah, adi tukang mas, pijog jangi tŭtŭb tubu sindung anŭ. Hananiah, adi tukang ndai wangi, pijog jangi tŭtŭb tubu anŭ, jeh ndŭg Sindung Bayah.

⁹ Rephaiah anak Hur, adi pimritah sitangah pire tarun tana Jerusalem pijog jangi tŭtŭb tubu anŭ.

¹⁰ Jedaiah anak Harumaph pijog jangi tŭtŭb tubu anŭ, adi sindŭk ramin adŭp-i. Hattush anak Hashabneiah pijog jangi tŭtŭb tubu anŭ.

¹¹ Malchijah anak Harim ngga Hasshub anak Pahath Moab pijog tung ngara tŭtŭb tubu sindung anŭ samŭn Tawā Apui.

¹² Shallum anak Hallohesh, adi pimritah sitangah pire tarun tana Jerusalem, pijog jangi tŭtŭb tubu anŭ (Bara anak dayung-i turung di kraja anŭ.)

¹³ Hanun ngga bara daya adi rŭŭ di kupo Zanoah pari pijog Tiban Rubān. Ngara na sindung sindung tiban dieh, ka na abŭt parang sikutang ngga ngabŭt tiban anŭ, ka nyurat 440 mita sindung anŭ, jeh ndŭg Tiban Sapok.

¹⁴ Malchijah anak Rechab, pimritah di tarun tana Beth Haccherem, pari pijog Tiban Sapok. Ayŭh na sindung sindung tiban dieh, ka na abŭt parang sikutang ngga ngabŭt tiban anŭ.

¹⁵ Shallum anak Colhozeh, pimritah di tarun tana Mizpah, pari pijog Tiban Sumbur. Ayŭh pibari tiban-bās anŭ, na sindung sindung tiban dieh, ka na abŭt parang sikutang ngga ngabŭt tiban anŭ. Di pagong Shelah ayŭh pijog sindung sindŭk teya raja, jeh ndŭg tungoh adi mūn so Kupo David.

¹⁶ Nehemiah anak Azbuk, pimritah sitangah pire tarun tana Bethzur, pijog jangi tŭtŭb tubu sindung anŭ, jeh ndŭg kubur David, pagong, ka ramin ramin soldadu.

Bara Daya Levi adi Nyiraja Ndai Sindung Kupo

¹⁷ Bara daya Levi ati pari pijog tung ngara tŭtŭb tŭtŭb tubu sindung: Rehum anak Bani pijog jangi tŭtŭb tubu sindung anŭ; Hashabiah, adi pimritah sitangah pire tarun tana Keilah, pijog jangi tŭtŭb tubu anŭ.

¹⁸ Bavvai anak Henadad, pimritah di sitangah pire tarun tana Keilah adi bŭkŭn, pijog jangi tŭtŭb tubu anŭ.

¹⁹ Ezer anak Jeshua, pimritah Mizpah, pijog jangi tŭtŭb tubu anŭ adi di jawin tarun yŭn nyikŭn sinyata, jeh ndŭg tarun yŭn sindung anŭ biruit.

²⁰ Baruch anak Zabbai pijog jangi tŭtŭb tubu anŭ, jeh ndŭg tiban ramin Imam Bās Eliashib;

²¹ Meremoth anak Uriah ka sukuh Hakkoz, pijog jangi tŭtŭb tubu anŭ, jeh ndŭg tŭbŭn ramin Eliashib.

Bara Imam adi Nyiraja Ndai Sindung Kupo

²² Bara imam ati pari pijog tung ngara tŭtŭb tŭtŭb tubu sindung: Imam imam so tarun tarun maning Jerusalem pijog tung ngara tŭtŭb tubu anŭ;

²³ Benjamin ngga Hasshub pijog tung ngara tŭtŭb tubu anŭ, adi di jawin ramin adŭp ngara; Azariah anak Maaseiah ka sukuh Ananiah, pijog jangi tŭtŭb tubu anŭ adi di jawin ramin adŭp-i;

²⁴ Binnui anak Henadad pijog jangi tŭtŭb tubu anŭ, so ramin Azariah ndŭg sikuh sindung;

^25-26 Palal anak Uzai pijog jangi tŭtŭb tubu sindung anŭ, piguru so sikuh sindung ngga tawā istana tura ka sambu sindŭk badag daya tukang jaga; Pedaiah anak Parosh pijog jangi tŭtŭb tubu anŭ, ndŭg tarun yŭn tura ka timor sindŭk Tiban Piin ngga tawā adi ngibān Ramin TUHAN. (Anŭ sindŭk parad kupo dŭn Ophel, adi yŭn bara daya-gaji Ramin TUHAN rŭŭ.)

Bara Tukang Piramin adi Bŭkŭn

²⁷ Bara daya so Tekoa pijog tung ngara tŭtŭb tubu sindung anŭ, tung ngara adi numbor duwŭh, so tarun yŭn adi bistatang ngga tawā baga adi ngibān Ramin TUHAN jeh ndŭg sindung adi sindŭk Ophel.

²⁸ Ndi tibaran imam pijog tung ngara tŭtŭb tubu anŭ, nuju utara so Tiban Kuda; barang naan ngara pijog jangi utung di jawin ramin adŭp-i.

²⁹ Zadok anak Immer pijog jangi tŭtŭb tubu sindung anŭ, adi di jawin ramin adŭp-i. Shemaiah anak Shecaniah, adi tukang jaga Tiban Timor, pijog jangi tŭtŭb tubu anŭ.

³⁰ Hananiah anak Shelemiah ka Hanun, adi anak Zalaph adi numbor nŭm, pijog tung ngara tŭtŭb tubu anŭ, tung ngara adi numbor duwŭh. Meshullam anak Berechiah pijog jangi tŭtŭb tubu anŭ, adi di jawin ramin adŭp-i.

³¹ Malchijah, adi tukang mas, pijog jangi tŭtŭb tubu anŭ, jeh ndŭg ramin daya-gaji Ramin TUHAN ngga bara daya dagang, adi di bŭngŭn Tiban Miphkad, sindŭk birit di tibung sikuh sindung parad ka utara-timor.

³² Bara tukang mas ngga daya dagang pijog tung ngara tubu tŭtŭb anŭ, so birit adi di sikuh sindung jeh ndŭg Tiban Biri.