NEHEMIAH 13 - Hakcipta - Biatah Bidayuh

Daya Israel Pijo adŭp Ngara so Daya Tami

¹ Kan Ukum-adat Moses dog basa bana yŭn daya bagŭ, ngara dingah pinganang adi nang daya Ammon ngga daya Moab dŭh siŭn bisindi ngga daya Tapa.

² Kayuh anŭ simŭnŭ sabab daya Ammon ngga daya Moab dŭh nggen pinguman bait piin di daya Israel di tika ngara ruah so Egypt. Tibarik-i ngara ngupah Balaam bada mangu Israel, pak Tapa ta marik pangu anŭ bada jadi berkat.

³ Kan daya Israel dingah ukum-adat anŭ dog basa, ngara pibu so Israel sopŭrŭg daya tami.

Nehemiah Ndai Atur Bauh Pritah

⁴ Imam Eliashib, adi nguasa birit birit-pinyirikŭn Ramin TUHAN, mbŭh tian-ti bidingan rapat ngga Tobiah.

⁵ Ayŭh nyibandar Tobiah pakai birit adi bayah adi kaŭs-i yŭn nyikŭn sadis gandom ngga kimanyan, pingakas adi dog pakai di Ramin TUHAN, pinganggen yŭn bara imam, ka pinganggen ndi utung-so-simŭng so ruwang ruwang kayuh, wain, ka inyo kanā adi dog nggen di bara daya Levi, di bara pimain musik Ramin TUHAN, ka di bara adi tukang jaga Ramin TUHAN.

⁶ Sitadŭn-i mun anŭ, aku mating di Jerusalem, sabab di sawa adi 32 Artaxerxes jadi raja Babylon aku nggen pinyiripot ku di ayŭh. Ripas mua tian-i aku trima pinyibandar so ayŭh

⁷ ka aku pari ka Jerusalem. Diginŭ aku gŭgŭh kan aku kiris Eliashib mbŭh nyibandar Tobiah pakai birit di darŭm Ramin TUHAN.

⁸ Aku mbŭh baji ka taran ka sapa sopŭrŭg kayuh adi Tobiah dapu.

⁹ Aku nggen ukum bada birit anŭ dog pibisig nanyam ka adat ka simŭnŭ gŭh ngga pingakas Ramin TUHAN, pinganggen ruwang ruwang kayuh, ka kimanyan adi an dog na pari.

¹⁰ Aku dog kidaan gŭh nang bara pimain musik Ramin TUHAN mbŭh bu so Jerusalem di pari ka teya ngara, sabab daya mbŭh dŭh tia nggen sukup di ngara kayuh adi ngara biguna ngga nyiran adŭp ngara.

¹¹ Aku nang bara pinurung amai ngara dŭh tia sita Ramin TUHAN. Ka aku taban bara daya Levi ngga bara pimain musik pari ka Ramin TUHAN ka bada ngara pari nyiraja.

¹² Komŭnŭ sopŭrŭg daya Israel piguru pari taban ka birit-pinyirikŭn Ramin TUHAN pinganggen ngara ndi utung-so-simŭng so ruwang ruwang kayuh, wain, ka inyo kanā.

¹³ Aku tijuan ngara ati bada nguasa birit birit-pinyirikŭn: Shelemiah, adi imam; Zadok, adi sukup pandai di Ukum-adat; ka Pedaiah, adi daya Levi. Hanan, adi anak Zaccur ka sukuh Mattaniah, jadi gapit ngara. Aku puan ka sabah ngara daya adi jujur darŭm kutung biranja man di dingan ngara adi samah daya adi nyiraja.

¹⁴ Ingat, O Tapa ku, sopŭrŭg kayuh anŭ adi aku mbŭh ndai yŭn Ramin TUHAN ka yŭn bisambah diginŭ.

¹⁵ Di tika anŭ aku kiris daya di Judah mŭ anggor di andu Sabbath. Ngara adi bŭkŭn na ruwang ruwang kayuh, wain, buwa anggor, buwa ara, ka kayuh kayuh bŭkŭn di tunduh kaldi ngara ka taban-i ka Jerusalem; aku bakan ngara bada dŭh jua kayuh adi andu Sabbath.

¹⁶ Kada daya so kupo Tyre rŭŭ di Jerusalem, ka ngara taban iken ngga sopŭrŭg kayuh ka darŭm kupo an ngara jua di daya di andu Sabbath.

¹⁷ Aku nang bara pinguru daya Jahudi ka nang, “Tingga kraja arap ngan! Angān bada andu Sabbath dŭh kudus.

¹⁸ Anŭ inŭh kayuh adi bada Tapa ngukum tayung-babuk ngan kan Ayŭh pirabur kupo ati. Ka angān gibabŭ gŭh an nambah baji Tapa di tunduh Israel ngga pingandai adi nyembar andu Sabbath.”

¹⁹ Jadi aku nggen ukum bada tiban-bās kupo dog tŭŭp piguru di andu Sabbath, kan-i mbŭh singumi andu, ka dŭh siŭn dog kuka dinge ndŭg ka-i mbŭh ripas andu Sabbath. Aku tijuan kada daya bada jaga di tiban-bās isa daya dŭh taban kayuh ka darŭm kupo di andu Sabbath.

²⁰ Ndi sidah puan kah piduwŭh kari daya dagang adi jua barang masam kayuh nyirŭmŭn di sapa sindung kupo ngarŭm andu Rimŭh.

²¹ Aku bakan ngara, “Mating guna-i angān kajŭn andu jawa diginŭ. Kambŭi angān babŭ ndai simŭnŭ, aku re bada angān dog nakap.” So andu anŭ ngara mating tia mandŭg di andu Sabbath.

²² Aku nggen ukum bada bara daya Levi pibisig adŭp ngara ka jaga tiban-bās isa andu Sabbath kudus. Ingat aku, O Tapa, yŭn ati ani, ka masi di aku amai pinyirindu bās Mai.

²³ Di tika anŭ gŭh aku kiris bagŭ dari daya Jahudi sawŭn dayung daya Ashdod, Ammon, ka Moab.

²⁴ Sitangah so bara anak ngara mbŭh minyu piminyu daya Ashdod ka piminyu piminyu adi bŭkŭn ka dŭh pandai minyu piminyu adŭp ami.

²⁵ Aku nang ngara adi bara dari, mangu ngara, mukong ngara, ka nyirugut ubok ngara. Komŭnŭ aku bada ngara bipayu ngga adŭn Tapa ngara bait anak anak ngara dŭh re tia banan sawan ngga daya tami.

²⁶ Aku nang, “Dayung tami inŭh adi bada Raja Solomon bidosa. Ayŭh daya adi bās so tadŭ tadŭ raja bangsa bŭkŭn. Tapa rindu ayŭh ka bada ayŭh jadi raja yŭn sopŭrŭg Israel, pak ayŭh rabu darŭm dosa adi mun anŭ.

²⁷ Patut kah kieh tunda angān ka ndai sopŭrŭg pingandai adi sipŭ anŭ ka dŭh tŭtŭd di Tapa ta, banan sawan ngga dayung daya tami?”

²⁸ Joiada inŭh anak Eliashib adi Imam Bās, pak ndi naan so anak anak Joiada sawŭn anak dayung Sanballat, so kupo Beth Horon, jadi aku bada Joiada bu so Jerusalem.

²⁹ Ingat, O Tapa, munki masam ngara anŭ nyembar kraja imam ka simanya adi Kaam mbŭh ndai ngga bara imam ka bara daya Levi.

³⁰ Aku pibisig daya Israel so sopŭrŭg kayuh adi mandŭg so bangsa bŭkŭn; aku ndai atur-adat yŭn bara imam ka yŭn bara daya Levi isa barang naan ngara puan kraja adŭp-i;

³¹ Aku ngatur bada uwang adi dog pakai ngga badang sadis dog taban di tika adi patut, ka tika adi ngga daya taban pinganggen ngara adi buwa bungas ngga buwa pimuruh adi mbŭh masak. Ingat sopŭrŭg ati, O Tapa, ka nyiberkat aku amai pingandai kana adi mbŭh ku ndai yŭn bangsa ati.