NEHEMIAH 11 - Hakcipta - Biatah Bidayuh

Bara Daya adi Rŭŭ di Jerusalem

¹ Bara pinguru rŭŭ di Jerusalem, ka bara daya taran dadu ngga mien ndi rawang so barang simŭng rawang bada rŭŭ di kupo kudus Jerusalem, darŭm adi bŭkŭn rŭŭ di kupo kupo ngga anak anak kupo adi bŭkŭn.

² Bara daya muji ngara adi nyerah adŭp ngara raan rŭŭ di Jerusalem.

³ Di anak anak kupo ngga di kupo kupo adi bŭkŭn bara daya Israel, bara imam, bara daya Levi, bara daya-gaji Ramin TUHAN, ka bara sesang daya-gaji Solomon rŭŭ di tana adŭp ngara di kupo kupo ngara. Ati inŭh susud dŭn daya adi bās so utung rais Judah adi rŭŭ di Jerusalem:

⁴ Daya so tibaran-asar Judah: Athaiah, anak Uzziah ka sukuh Zechariah. Tayung babuk-i adi bŭkŭn inŭh samŭn Amariah, Shephatiah, ngga Mahalalel, adi bara sesang Perez anak Judah.

⁵ Maaseiah, anak Baruch ka sukuh Colhozeh. Tayung babuk-i adi bŭkŭn inŭh samŭn Hazaiah, Adaiah, Joiarib, ngga Zechariah, bara sesang Shelah adi anak Judah.

⁶ So bara sesang Perez, 468 naan daya adi traŭn rŭŭ di Jerusalem.

⁷ Daya so tibaran-asar Benjamin: Sallu, adi anak Meshullam ka sukuh Joed. Tayung babuk-i adi bŭkŭn inŭh samŭn Pedaiah, Kolaiah, Maaseiah, Ithiel, ngga Jeshaiah.

⁸ Gabbai ngga Sallai, madis Sallu adi sindŭk. Prungun-i, 928 naan daya Benjamin rŭŭ di Jerusalem.

⁹ Joel anak Zichri inŭh pinguru ngara, ka Judah anak Hassenuah inŭh pingubak pinurung adi numbor duwŭh darŭm kupo.

¹⁰ Bara imam: Jedaiah anak Joiarib, ka Jachin.

¹¹ Seraiah, anak Hilkiah ka sukuh Meshullam. Tayung babuk-i inŭh samŭn Zadok, Meraioth, ka Ahitub, adi imam bās.

¹² Prungun-i, 822 naan daya so manak ati nyiraja di Ramin TUHAN. Adaiah, adi anak Jeroham ka sukuh Pelaliah. Tayung babuk-i inŭh samŭn Amzi, Zechariah, Pashhur, ngga Malchijah.

¹³ Prungun-i, 242 naan daya so manak ati inŭh pingubak rawang. Amashsai, anak Azarel ka sukuh Ahzai. Tayung babuk-i inŭh samŭn Meshillemoth ngga Immer.

¹⁴ Agi 128 daya so manak ati adi mbŭh soldadu adi traŭn. Pinguru ngara Zabdiel, ndi naan so rawang daya adi bās.

¹⁵ Bara daya Levi: Shemaiah, anak Hasshub ka sukuh Azrikam. Tayung babuk-i inŭh samŭn Hashabiah ngga Bunni.

¹⁶ Shabbethai ngga Jozabad, daya daya Levi adi traŭn adi nguasa kraja di sapa Ramin TUHAN.

¹⁷ Mattaniah, anak Mica ka sukuh Zabdi, sesang Asaph. Ayŭh tukang nguru bara pinyanyi di Ramin TUHAN nang ragu dua trima kaseh. Bakbukiah, adi gapit Mattaniah. Abda, anak Shammua ka sukuh Galal, sesang Jeduthun.

¹⁸ Prungun-i, 284 naan daya Levi rŭŭ di kupo kudus Jerusalem.

¹⁹ Bara tukang jaga Ramin TUHAN: Akkub, Talmon, ngga bara madis ngara, 172 naan sopŭrŭg ngara.

²⁰ Bara daya Israel adi bŭkŭn ngga bara imam ka bara daya Levi rŭŭ di tana adŭp ngara di kupo kupo ngga anak anak kupo bŭkŭn di Judah.

²¹ Bara daya-gaji Ramin TUHAN rŭŭ di ndi parad Jerusalem dŭn Ophel ka nyiraja di ribo kuasa Ziha ngga Gishpa.

²² Adi tukang ngatur bara daya Levi adi rŭŭ di Jerusalem inŭh Uzzi, adi anak Bani ka sukuh Hashabiah. Tayung babuk-i inŭh samŭn Mattaniah ngga Mica, ka adŭp-i so manak Asaph, manak adi dapu tanggong ragu yŭn tika bisambah di Ramin TUHAN.

²³ Agi atur-adat raja adi kidaan munki manak manak anŭ bikires tukang nguru nang ragu di Ramin TUHAN barang andu.

²⁴ Pethahiah anak Meshezabel, so manak Zerah ka so tibaran-asar Judah, jadi tukang ngarun daya Israel di istana raja-empaya Persia.

Bara Daya di Kupo ngga Kupo bayah adi Bŭkŭn

²⁵ Bagŭ daya rŭŭ di kupo kupo adi sindŭk teya adŭp-i. Ngara adi so tibaran-asar Judah rŭŭ di Kiriath Arba, Dibon, ka Jekabzeel, ka di anak anak kupo sindŭk kupo bayah anŭ.

²⁶ Ngara gŭh rŭŭ di kupo Jeshua, Moladah, Bethpelet,

²⁷ ka Hazarshual, ka di Beersheba ngga anak anak kupo maning anŭ.

²⁸ Ngara rŭŭ di kupo Ziklag, di Meconah ngga anak anak kupo-i,

²⁹ di Enrimmon, di Zorah, di Jarmuth,

³⁰ di Zanoah, di Adullam, ka di anak anak kupo sindŭk kupo anŭ. Ngara rŭŭ di Lachish ka di teya sindŭk anŭ, ka di Azekah ngga di anak anak kupo-i. Anŭ inŭh, daya Judah rŭŭ di tarun tana di asah Beersheba di siratan ngga Rubān Hinnom di utara.

³¹ Daya so tibaran-asar Benjamin rŭŭ di Geba, Michmash, Ai, Bethel ka anak anak kupo sindŭk anŭ,

³² Anathoth, Nob, Ananiah,

³³ Hazor, Ramah, Gittaim,

³⁴ Hadid, Zeboim, Neballat,

³⁵ Lod, ka Ono, ka di Rubān Tukang.

³⁶ Kada tibaran daya Levi adi mbŭh rŭŭ di tarun tana Judah dog ngatur bada rŭŭ ngga daya Benjamin.