NEHEMIAH 1 - Hakcipta - Biatah Bidayuh

¹ Ati inŭh dundan pasar kayuh adi Nehemiah anak Hacaliah mbŭh ndai. Darŭm buran Kislev di sawa adi duwŭh puru di jaman Artaxerxes jadi raja-empaya Persia, aku, Nehemiah, mbŭh di Susa, sindŭ kupo empaya.

Nehemiah Mbit Bat pasar Jerusalem

² Hanani, ndi naan so jurud dari ku, mandŭg so Judah ngga tibaran adi bŭkŭn, ka aku siken ngara pasar Jerusalem ka pasar bara dingan ami adi samah daya Jahudi adi mbŭh mari ripas ko dog taran ka Babylonia.

³ Ngara kidaan di aku nang ngara adi gibabŭ udip ka adi mbŭh mari ka rais adŭp mbŭh udip jera ka daya bangsa bŭkŭn adi rŭŭ dŭh jo so ngara arap ngga ngara. Ngara gŭh kidaan di aku nang sindung sindung Jerusalem babŭ rusak ka tiban tiban-bās gibayuh pari dog ndai so andu-i dog sigot.

⁴ Kan aku dingah sopŭrŭg anŭ, aku guru ka sien. Barang andu aku sien ka dŭh raan man. Aku bidua ka Tapa,

⁵ “TUHAN Tapa adi pinguasa di Shorga! Kaam inŭh bās, ka kieh taru di Kaam. Ngga tŭtŭd Kaam ingat simanya Mai ngga ngara adi rindu di Kaam ka adi ndai kayuh adi Kaam pesan.

⁶ Tingga aku, TUHAN, ka dingah dua ku, darŭm aku bidua sandu ngga singarŭm yŭn bara urun Mai, daya Israel. Aku ngaku kieh, adi daya Israel, mbŭh bidosa. Tayung-babuk ku ngga adŭp ku mbŭh bidosa.

⁷ Kieh mbŭh raru ginaka ngga Kaam ka dŭh ndai kayuh adi Kaam pesan. Kieh mbŭh dŭh sita ukum ukum-adat adi Kaam mbŭh nggen di kieh so Moses, adi urun Mai.

⁸ Ingat meh madin kayuh adi Kaam mbŭh kidaan di Moses: ‘Kambŭi angān adi daya Israel dŭh tŭtŭd di Aku, Aku re bada angān papar sasah di dupan daya bangsa bŭkŭn.

⁹ Pak kambŭi angān marik pimudip ngan pari ka Aku ka ndai kayuh adi Aku mbŭh pesan di angān, Aku re taban angān pari ka tarun yŭn adi Aku mbŭh mien yŭn Aku dog nyambah, sunggu-i angān mbŭh dog bada papar sasah ndŭg bŭngŭn ong.’

¹⁰ “TUHAN, ngara ati inŭh urun Mai, daya adŭp Mai. Kaam mbŭh nyiramat ngara ngga kuasa bās Mai ka ngga pinyibake.

¹¹ Dingah meh dua ku, ka dua urun urun Mai adi bŭkŭn adi raan stabi di Kaam. Bada aku mujur andu ati ka bada raja-empaya masi di aku.” Dawŭ-i aku muko jadi tukang pingidang wain raja-empaya.