NAHUM 2 - Hakcipta - Biatah Bidayuh

Pinyirabu Nineveh

¹ Nineveh, kuu aŭn dog nyerang! Kuasa adi re pirandŭk kuu mbŭh mandŭg. Sidia kuta kuta mu! Jaga aran! Sidia yŭn re biperang!

² (TUHAN re pari bragah Israel, bada mun adi dawŭ-i sibayuh pinganyu pirinda-i.)

³ Bara soldadu pinganyu taban pinangin bireh ka nēn piraka bireh. Ngara mbŭh sidia re nyerang! Krita krita kuda ngara mikirab mun apui! Kuda kuda ngara mirupat rupat!

⁴ Krita krita kuda bidabus di aran, raju matak mari di pakan kupo. Ngara mikirab mun prita-siru' ka bidabus mun kijat.

⁵ Pingubak soldadu dog bagan; ngara sikak darŭm ngara nyurong. Pinyerang nyurong ka sindung ka sidia pingakas ngga mape sindung.

⁶ Tiban tiban di bŭngŭn sungi tikuka; ka sopŭrŭg daya darŭm istana mbŭh taru.

⁷ Rani dog nakap; daya daya gaji-i sien mun manuk asang ka nupap sudo ngara darŭm susah.

⁸ Keya ka piin ruah so suang piin adi pape daya ruah so Nineveh! “Rŭŭ rŭŭ!” daya nyirais nang, pak mating daya raan pari.

⁹ Sirapas pirak! Sirapas mas! Kupo anŭ puno ngga rata!

¹⁰ Nineveh dog pirabur, dog pirinda, ka dog tandah! Amai taru, pinyipagan daya miyap; karŭb kimŭtŭr, mating meh tia pinyibake; sopŭrŭg raŭn daya marui pusat.

¹¹ Diki meh kupo anŭ madin, adi muko mun sarin singah; tarun yŭn anak anak singah dog paan, tarun adi dari singah ngga dayung singah tudu, ka tarun adi siramat yŭn anak anak singah?

¹² Singah siŭ dangah-i, nyiratak nyirigat-i yŭn dayung-i ngga anak anak-i; ayŭh ngisi sarin-i ngga supek supek dagin.

¹³ “Aku ati pinganyu mu!” nang TUHAN Bisa-pŭrŭg. “Aku re badang krita krita kuda mu. Bara soldadu mu re dog siŭ darŭm perang, ka Aku re taban ngga bu sopŭrŭg kayuh adi kuu ko sirapas so daya. Sirŭŭn bara pinyisung mu re dŭh tia dog dingah.”