MICAH 7 - Hakcipta - Biatah Bidayuh

Pimudip Israel Arap

¹ Mating tia pingarap! Aku keya ka daya adi sibŭrŭk adi dŭh dapŭd buwa di tŭngŭn kayuh bait buwa anggor di tŭngŭn anggor. Sopŭrŭg buwa anggor ka sopŭrŭg buwa ara adi sidi mbŭh abo dog sun.

² Mating tia daya adi tŭnggŭn darŭm rais, mating daya adi tŭtŭd di Tapa. Barang naan daya taŭn kajŭn pluang an siŭ daya. Barang naan daya mbŭh ngasū dingan-i adi samah bangsa.

³ Sopŭrŭg ngara sukup pandai ndai arap. Bara pinurung pritah ngga akim akim mite suap. Daya adi bās kidaan kayuh adi-i raan, ngapŭi meh ngara taŭn bipekat ndai kayuh.

⁴ Ngara adi siabo kana ngga adi siabo tŭnggŭn babŭ gŭh dŭh biguna mun uduh. Andu mbŭh mandŭg adi ngga Tapa re ngukum daya, sak adi muko-I bakan so baba bara nabi-I adi keya ka tukang nyibatŭh. Ngara madin mbŭh kandang-kandŭ riruk.

⁵ Dŭhnyah sabah rasū ngan bait bisangan di jerā ngan. Nakit kan angān minyu, bait-i di sawŭn ngan.

⁶ Di jaman ati bara anak dari mbŭh ndai ka bada sama ngara mun daya budo, anak anak dayung nyakar sindŭ ngara, ka dayung dayung adi mara bikaii ngga dinŭh ngara; pinganyu daya taŭn mbŭh ndi naan so rawang adŭp-i.

⁷ Pak aku re kajŭn TUHAN ngga sukup sabah Ayŭh re nyiramat aku. Tapa ku re dingah aku.

TUHAN Nyiramat Daya-I

⁸ Pinganyu ta dŭh biyŭn pada re ngangŭn pinyirabu ta. Ata mbŭh rabu, pak ata re makat dinge. Ata darŭm karŭm madin, pak TUHAN re nggen jawa di ata.

⁹ Ata mbŭh bidosa rawan TUHAN, jadi madin ata dŭh siŭn dŭh nyijŭn baji-I dawŭ-i. Pak sikasŭn-i Ayŭh re nyibandar ata ka re pimanu pinyitŭnggŭn rawan sarah adi dog ndai di ata. Ayŭh re taban ata ka jawa, ka ata re kinyam pinyiramat TUHAN.

¹⁰ Komŭnŭ pinganyu ta re kiris kayuh anŭ ka re mangŭh. Ngara inŭh pinganyu adi kinuas ata, adi nang, “Diki TUHAN adi Tapa ngan?” Ata re kiris ngara dog ngarah, dog digang mun tawang di aran.

¹¹ Daya Jerusalem, tika-i re mandŭg adi ngga sindung kupo pari dog pijog. Di tika anŭ tarun tana ngan re dog pibayah.

¹² Daya ngan re pari so barang yŭn — so Assyria di timor, so Egypt di siratan, so tarun tana Euphrates, so tarun yŭn adi mutas rawŭt ka so tarun tana darŭd adi jo.

¹³ Pak ong re jadi tarun tana-pajam sabab udip ginaka daya adi rŭŭ dieh.

TUHAN Masi di Israel

¹⁴ Jadi pingingat yŭn daya Mai, TUHAN, daya adi Kaam mbŭh mien. Sunggu ngara rŭŭ jeh di tarun tana-pajam, tana damŭn agi maning ngara. Tandah ngara man di tarun tana kupai Bashan ka Gilead, nimun ngara ko jah-i.

¹⁵ Ndai pingandai-nginga yŭn ami, TUHAN, nimun adi muko Mai ndai di tika Kaam taban kieh ngga ruah so Egypt.

¹⁶ Bangsa bangsa re kiris kayuh anŭ ka re mangŭh amai rada pinyibake ngara dŭh biyŭn rati. Ngara re mapot baba ka kajit ngara amai dŭh dapŭd ndai ani ani.

¹⁷ Ngara re bigawang di dabu tana mun jippŭh; ngara re mandŭg so kuta kuta ngara, kimŭtŭr buang taru. Ngara re mandŭg ka TUHAN adi Tapa ngara amai taru.

¹⁸ Mating tapa bŭkŭn mun Kaam, O TUHAN. Kaam apun dosa daya Mai adi babŭ udip. Kaam dŭh adu adu baji, pak Kaam raan dŭ kiren pinyirindu Mai adi dŭh bisa birubah.

¹⁹ Kaam re pari masi di kieh. Kaam re bidigang di tunduh dosa ami ka taran-i ka rasan rawŭt!

²⁰ Kaam re kiren pinyitŭtŭd ngga pinyirindu Mai adi dŭh bisa birubah di daya Mai, bara sesang Abraham ngga Jacob, nimun adi muko Mai janji di tayung-babuk ami jah.