MICAH 5 - Hakcipta - Biatah Bidayuh

¹ Daya Jerusalem, nguruk bara soldadu ngan! Ata mbŭh dog nyikapung! Ngara mbŭh aŭn nyerang pinguru Israel!

Ndi Naan Pimritah so Bethlehem adi dog Janji Tapa

² TUHAN nang, “Bethlehem Ephrathah, kuu inŭh kupo adi siabo sŭ di Judah, pak so kuu Aku re pakat ndi pimritah yŭn Israel, adi taris rawang asar-i inŭh so jaman jah.”

³ Jadi TUHAN re tagan daya-I ka darŭm tangan pinganyu ngara ndŭg ka andu adi ngga dayung anŭ adi re biranak mbŭh ruwan anak-i. Komŭnŭ bara daya Israel anŭ adi dog taran ka rais tami re dog bada pari ka daya adŭp ngara.

⁴ Kan ayŭh mandŭg, ayŭh re mritah daya-i ngga pinyibake adi mandŭg so TUHAN, ka ngga bragah adŭp TUHAN Tapa. Daya-i re udip ngga siramat sabab sopŭrŭg daya di ndi ong ong re ngaku bās-i,

⁵ ka ayŭh re taban damai. Kan daya Assyria nyerang rais ta ka nyirubuh kuta ta, ata re pait pinguru ta adi siabo bake bada rawan ngara.

Pinyirupas ngga Ukum

⁶ Ngga kuasa sinyata, ngara re ngarah Assyria, tarun tana Nimrod, ka ngara re nyiramat ata so bara daya Assyria kan ngara nyerang tarun tana ta.

⁷ Daya Israel adi babŭ udip re keya ka sipot-abun adi piranyah, adi dog pait TUHAN yŭn bagŭ bangsa, mun ujen adi misa anak tŭngŭn kayuh-udip. Ngara re bisangan di Tapa, dŭh di manusia.

⁸ Ngara adi babŭ udip di dupan bangsa bangsa re keya ka singah bidandong jiroh pinguman di tuān bait di tarun tana kupai: kan-i mbŭh di ruang kaban biri, singah anŭ mirupat di tunduh biri, ka nyirigat-i; mating daya dapŭd nyiramat-i.

⁹ Israel re ngarah pinganyu-i ka pirabur sopŭrŭg ngara.

¹⁰ TUHAN nang, “Di tika anŭ Aku re tambit kuda kuda ngan ka pirabur krita krita kuda ngan.

¹¹ Aku re pirabur kupo kupo di tarun tana ngan ka nyirubuh sopŭrŭg kuta ngan.

¹² Aku re pirabur uri karŭm adi angān pakai ka pibu ngara adi tukang kidaan nasip ngan.

¹³ Aku re pirabur tibudo tibudo ngga uros uros batuh pirapu' ngan. Angān re dŭh tia nyambah kayuh adi adŭp ngan ndai.

¹⁴ Aku re pitumbang gayŭn gayŭn tapa Asherah di tarun tana adŭp ngan ka pirabur kupo kupo ngan.

¹⁵ Ka ngga bisā baji Ku Aku re maras dendam di sopŭrŭg bangsa adi ko dŭh nundok di Aku.”