MICAH 4 - Hakcipta - Biatah Bidayuh

TUHAN Mritah Ong ngga Damai

¹ Darŭm tipuh adi re mandŭg sandah adi yŭn Ramin TUHAN mijog re jadi adi siabo bigatung, bigatung so sopŭrŭg sandah. Bagŭ bangsa re birumbek kamanŭ,

² ka bara daya-i re nang, “Ja maad sandah TUHAN, di ka Ramin TUHAN adi Tapa Israel. Ayŭh re ngajar ata kayuh adi Ayŭh raan ata ndai; ata re panu kadŭg aran adi Ayŭh mbŭh mien. Amai ajar TUHAN mandŭg so Jerusalem; so Zion Ayŭh minyu ngga daya-I.”

³ Ayŭh re ngatur kaii di dupan bangsa bangsa, di dupan kuasa kuasa bās adi sindŭk ngga adi jo. Ngara re maba pedang ngara bada jadi sinda bajak ka jarok bada jadi sinda adi ngga mŭpŭd tugu pimuruh. Bangsa bangsa re dŭh tia matak biperang, dŭh tia sidia yŭn bisaad.

⁴ Sopŭrŭg daya re udip darŭm damai di teya anggor ngga di risŭn ara ngara, ka mating daya re pitaru ngara. Anŭ inŭh kayuh adi TUHAN mbŭh janji.

⁵ Barang bangsa nyambah ka nundok di tapa adŭp-i, pak ata re nyambah ka nundok di TUHAN adi Tapa ta ndŭg situi tui.

Israel re Pari so yŭn Ngara Dog Taran

⁶ “Tika-i re mandŭg,” nang TUHAN, “kan Aku re nguruk bara daya adi Aku ngukum, ngara adi mbŭh sangsara darŭm dog taran ka rais tami.

⁷ Ngara mbŭh bajang buang jo so ramin arŭn, pak Aku re nggen pluang bauh di ngara adi babŭ udip, ka ngara re jadi bangsa adi bās. Aku re mritah ngara di Sandah Zion so tika anŭ ndŭg situi tui.”

⁸ Ka kuu, Jerusalem, di yŭn Tapa, keya ka pingingat-biri, kingat daya-I, re pari jadi sindŭ kupo pritah nimun dawŭ-i.

⁹ Mani kuu sien raru bana? Mani kuu sangsara mun dayung naman adŭp-i re biranak? Kuu mun anŭ sabab kuu dŭh biyŭn raja, ka bara mu adi tukang pitayan mbŭh kabŭs kah?

¹⁰ Nyiriat ka nyidaing, meh angān daya Jerusalem, mun dayung biranak, amai madin angān dŭh siŭn dŭh bu tingge kupo ka rŭŭ di sapa tarun tana rais. Angān dŭh siŭn dŭh di ka Babylon, pak diginŭ TUHAN re nyiramat angān so pinganyu ngan.

¹¹ Bagŭ bangsa mbŭh tikuruk re nyerang kuu. Ngara nang, “Jerusalem dŭh siŭn dŭh dog pirabur! Ata dŭh siŭn dŭh kiris kupo anŭ rubuh!”

¹² Pak bangsa bangsa anŭ dŭh puan ani darŭm pikir TUHAN. Ngara dŭh rada adŭp ngara mbŭh dog nguruk keya ka gandom dog taban ka yŭn-i dog ngiik.

¹³ TUHAN nang, “Daya Jerusalem, panu di ngukum pinganyu ngan! Aku re bada angān bake mun dari sapi ngga tanduk basi ka tinjug timaga. Angān re pirandŭk bagŭ bangsa, ka pinyikaya adi ngara dapŭd ngga pinyiganas, angān re jugan ka Aku, adi TUHAN ndi ong ong.”