MAZMUR 99 - Hakcipta - Biatah BidayuhTapa, Raja adi Siabo Bigatung 1 TUHAN inŭh raja; ka daya kimŭtŭr. Ayŭh bitakta di tunduh cherubim ka ong bigugoh. 2 TUHAN inŭh bikuasa di Zion; Ayŭh inŭh adi siabo bigatung di tunduh sopŭrŭg bangsa. 3 Barang naan re muji bās-I ka adŭn-I adi dog taru. Kudus inŭh Ayŭh! 4 Raja adi bikuasa, Kaam rindu kayuh adi batur; Kaam mbŭh piguru pinyitŭnggŭn di Israel; Kaam mbŭh taban pinŭnggŭn ngga atin jujur. 5 Muji meh TUHAN adi Tapa ta; sidikang di jawin takta-I! Kudus inŭh Ayŭh! 6 Moses ngga Aaron imam-I, ka Samuel inŭh ndi naan adi bidua ka Ayŭh; ngara bagan TUHAN, ka Ayŭh nam ngara. 7 Ayŭh minyu di ngara so tŭngŭn abun; ngara tunda ukum-adat ngga pesan adi-I nggen di ngara. 8 O TUHAN, adi Tapa ami, Kaam nam daya Mai; Kaam kiren adŭp Mai Tapa adi an apun daya, sunggu Kaam ngukum ngara amai dosa ngara. 9 Muji meh TUHAN, adi Tapa ta, ka nyambah Ayŭh di sandah kudus-I! TUHAN Tapa ta inŭh kudus. |
Hakcipta - Today's Biatah Version New Testament © The Bible Society of Malaysia, 2003.
Bible Society of Malaysia