MAZMUR 97 - Hakcipta - Biatah Bidayuh

Tapa, Pimritah adi Siabo Bigatung

¹ TUHAN inŭh raja! Ong, gaŭn meh! Gaŭn, angān purau di rawŭt!

² Abun ngga pinyikarŭm kirurung Ayŭh; Ayŭh mritah ngga pinŭnggŭn ka pinyitŭnggŭn.

³ Apui panu diŭ so Ayŭh ka man pinganyu-I adi maning Ayŭh.

⁴ Kijat-I pijawa ong; ong kiris-i ka kimŭtŭr.

⁵ Sandah riris mun dian di sirung jawin TUHAN, di sirung jawin TUHAN ndi ong ong.

⁶ Rangit piagah pinŭnggŭn-I, ka sopŭrŭg bangsa kiris bragah-I.

⁷ Barang naan adi nyambah tibudo dog pimangŭh; sopŭrŭg tapa mutu ubak ngara di sirung jawin TUHAN.

⁸ Daya Zion mbŭh gaŭn, ka kupo kupo Judah pawŭn sabab pinyitŭnggŭn Mai, O TUHAN.

⁹ TUHAN adi Bisa-pŭrŭg, Kaam inŭh pinguasa yŭn ndi ong ong; Kaam inŭh rabis bās so sopŭrŭg tapa adi bŭkŭn.

¹⁰ TUHAN rindu ngara adi tiru di arap; Ayŭh grindung pimudip daya-I; Ayŭh pirupas ngara so kuasa daya ginaka.

¹¹ Jawa nyekar di tunduh daya tŭnggŭn, ka pinyigaŭn di tunduh daya kana.

¹² Sopŭrŭg ngan adi tŭnggŭn gaŭn meh sabab kayuh adi TUHAN mbŭh ndai! Ingat kayuh adi Tapa kudus mbŭh ndai, ka nggen trima kaseh di Ayŭh.