MAZMUR 92 - Hakcipta - Biatah Bidayuh

Ragu Puji

¹ Munki masam kana-i nggen trima kaseh ka Kaam, O TUHAN, biragu nggen stabi di Kaam, O Tapa adi Sambu Sopŭrŭg,

² piagah pinyirindu Mai adi dŭh bisa birubah barang isan isan ka pinyitŭtŭd Mai barang ngarŭm,

³ ngga ragu so pingakas musik adi bitaris ka ngga ragu so kachapi.

⁴ Pingandai bās Mai, O TUHAN, bada aku gaŭn; sabab kayuh adi Kaam mbŭh ndai, aku biragu amai gaŭn.

⁵ Munki masam bās-i pingandai Mai, TUHAN! munki masam tŭrŭp-i pikir-kira Mai!

⁶ Anŭ inŭh kayuh adi daya budo dŭh puan; ka daya adi bawa dŭh tungang mirati:

⁷ Daya ginaka bisa timbu mun uduh, ka ngara adi ndai sarah bisa mujur; pak ngara re bana dog pirabur,

⁸ sabab Kaam, TUHAN, pinguasa adi bigatung ndŭg situi tui.

⁹ Kieh puan nang pinganyu Mai re kabŭs, ka sopŭrŭg daya ginaka re dog ngarah.

¹⁰ Kaam mbŭh bada aku bake mun dari sapi adi siga; Kaam mbŭh nyiberkat aku ngga udip sanang.

¹¹ Aku mbŭh kiris pinganyu ku arah ka dingah sien ngara adi ginaka.

¹² Daya tŭnggŭn re mujur mun tŭngŭn kurma; ngara re udip mun tŭngŭn sedar Lebanon.

¹³ Ngara keya ka tŭngŭn kayuh dog purun darŭm Ramin TUHAN, adi timbu mandis darŭm Ramin Tapa ta,

¹⁴ adi babŭ piruah buwa darŭm-i mbŭh minyamba ka babŭ barŭm buang tagap.

¹⁵ Ati kiren nang TUHAN inŭh tŭnggŭn, ka mating sarah Ayŭh adi grindung aku.