MAZMUR 91 - Hakcipta - Biatah Bidayuh

Tapa adi Pinyigrindung Ta

¹ Asi asi adi mandŭg ka TUHAN amai an dapŭd siramat, asi asi adi babŭ darŭm pinyigrindung-I adi Bisa-pŭrŭg,

² dapŭd nang di Ayŭh, “Kaam inŭh pingibān ngga pinyigrindung ku. Kaam inŭh Tapa ku; di Kaam aku sabah.”

³ Ayŭh re bada kuu pagŭng so sopŭrŭg jarat adi bisukan. ka so sopŭrŭg andam adi bisā.

⁴ Ayŭh re nutu kuu ngga urad-I; kuu re siramat darŭm tangan-I; pinyitŭtŭd-I re grindung ka ngibān kuu.

⁵ Kuu dŭhsah taru tadŭ tadŭ pinyusah singarŭm puan kah serang adi nyirŭgŭh di tipuh sandu

⁶ puan kah sesak andam adi nyerang singarŭm puan kah arap adi siŭ di tipuh jawa andu.

⁷ Sunggu siribu re kabŭs ngapid kuu, simŭng ribu maning kuu, pak kuu dŭh re kinaman.

⁸ Kuu re tingga ka kiris munki daya ginaka dog ukum.

⁹ Kuu mbŭh bada TUHAN jadi pingibān mu, Ayŭh adi Sambu Sopŭrŭg jadi pinyigrindung mu,

¹⁰ ka mating pinyirusag re dog kuu, mating pinyiganas re mandŭg di nyindŭk ramin mu.

¹¹ Tapa re bada malaikat-I jaga kuu, grindung kuu di barang yŭn mu panu.

¹² Ngara re digŭng kuu ngga tangan ngara isa kuu dŭh sagan kaja mu di batuh.

¹³ Kuu re digang singah ngga jippŭh, singah adi gaok ngga jippŭh adi bisā.

¹⁴ Tapa nang, “Aku re nyiramat ngara adi rindu Aku ka grindung ngara adi ngaku Aku TUHAN.

¹⁵ Kan ngara bagan Aku, Aku re nam ngara; kan ngara darŭm susah, Aku re agi ngga ngara. Aku re pirupas ngara ka stabi di ngara.

¹⁶ Aku re ngupah ngara ngga umbur adi ambu; Aku re nyiramat ngara.”